¹ Satala itu, ambo mandanga suaro nyaring sakiro sakumpulan gadang urang di surga mangeccek, "Haleluya! Kasalamatan, kamulioan, jongon kakuasaan iyolah punyo Allah kito ² karano panghakiman-Nyo benar jongon adil; karano Inyo ala mangadili palacur gadang tu, na marusak bumi jongon kabejatannyo, jongon ala mambalaskan darah hamba-hamba-Nyo kapado pelacur tu." ³ Untuk kaduo kalinyo, sidak mangeccek, "Haleluya! Asok pelacur tu ala naik sampe salamo-lamonyo." ⁴ Lalu, kaduo puluh ampek tuo-tuo jongon kaampek makhluk tu sujud jongon manyambah Allah, na duduk di ate tahta, jongon mangeccek, "Amin! Haleluya!" ⁵ Kamudian, tadangalah suaro dari tahta, "Pujilah Allah kito, hai kau sadonyo na malayani Inyo, elok naketek maupun na gadang, na manghormati Inyo!" Pesta Parkawinan Anak Domba ⁶ Lalu, ambo mandanga suaro sakiro sakumpulan urang banyak, sakiro bunyi a'i bah, jongon sakiro bunyi guntur na hebat, mangeccek, "Haleluya! Sabab, Tuhan Allah kito Na Mahakuaso mamarinto. ⁷ Mo kito basukkocito jongon basorak-soryak, jongon mangagikan kamulioan kapado-Nyo karano hari pakawinan Anak Domba ala tibo, jongon pangantin padusi-Nyo ala siap. ⁸ Kapadonyo ala diagikan kain linen halus na bersih jongon camarlang, untuk dipakke karano kain linen tu iyolah pabuekan benar na dilakukan urang-urang kudus." ⁹ Kamudian, malaikat tu mangeccek kapadokau, "Tuliskanlah ikko: 'Dibarkatilah urang na diundang ka jamuan pakawinan Anak Domba!''' Jongon, inyo mangeccek lai kapado ambo, "Ikko iyolah kato-kato na benar dari Allah." ¹⁰ Lalu, ambo sujud di kakki malaikat tu untuk manyembah inyo. Namun, inyo mangeccek kapado ambo, "Jangan pabuek itu karano ambo pulo hamba sakirokau jobgon saudaro-saudarokau na bapaccik pado kasaksian Yesus. Sembahlah Allah karano kasaksian Yesus iyolah roh nubuat." Panunggang Kudo Putih ¹¹ Kamudian, ambo maliek surga tabukkak, jongon munculah saikku kudo putih; Inyo na duduk di atenyo banamo Satio jongon Benar, dan dalam kabenaran Inyo mangahakimi jongon baparang. ¹² Mato-Nyo sakiro nyalo api, di kapalo-Nyo ado banyak mahkota, jongon Inyo dikatahui saurang pun, kacuali diri-Nyo surang. ¹³ Inyo mamakke jubah na ala dicelupkan ka dalam darah, jongonnamo-Nyo iyolah Firman Allah. ¹⁴ Saluruh pasukan na ado di surga mangikkuti Inyo jongon manunggang kudo putih jongon bapakkean kain linen halus na putih bersih. ¹⁵ Dari mulut-Nyo, kalua saincek lading tajam na digunokan untuk mangampok bangsa-bangsa. Inyo akan mamarintoh ate sidak jongon tongkat basi. Inyo akan mamaras anggur dalam batu kilangan, na iyolah murko Allah Na Mahakuaso. ¹⁶ Pado jubah jongon paho-Nyo tatulis namo ko: RAJO ATE SAGALO RAJO JONGON TUAN ATE SAGALO TUAN. ¹⁷ Kamudian, ambo maliek saurang malaikat tagak di dalam matohari. Inyo baseru jongon suaro kare kapado sadonyo pipik na tabang di langit, "Mo, bakumpulah untuk ikkut dalam jamuan makkan gadang Allah, ¹⁸ supayo kau dapek makkan daging paro rajo, daging paro panglimo, daging urang-urang kuek, daging kudo-kudo jongon sidak na duduk di atenyo, jongon daging sadonyo urang, elok itu urang bebas maupun urang merdeka, urang ketek maupun urang gadang." ¹⁹ Lalu, ambo maliek binatang tu jongon paro rajo di bumi sarto pasukan sidak bakumpu untu baparang malawan Inyo na duduk di ate kudo putih tu jongon malawan pasukan-Nyo. ²⁰ Mako, binatang tu ditangkok, basamo nabi palsunyo na ala mangadokan tando-tando ajaib di mukko binatang tu, na jongonnyo inyo manyasekkan sidak na manarimo tando binatang tu jongon sidak na manyambah patungnyo. Sidak sadonyo dilantingkan hidup-hidup ka dalam lautan api na manyalo-nyalo samo belerang. ²¹ JOngon, sisinyo dibunuh jongon lading na kalua dari mulut Inyo na duduk di ate kudo putih tu jongon sadonyo pipik dikanyangkan jongon daging sidak.