Malaikat jongon Gulungan Kitab ketek ¹ Lalu, ambo maliek saincek malaikat kuek lainnyo turun dari surga, bapakkean awan jongon palangi ado di ate kapalonyo, jongon mukko nyo sakiro matohari, jongon kakkinyo sakiro tiang api. ² Malaikat tu mamaccik saincek kitab etek na tabukkak. dan, Inyo mamijakkan kakki kanannyo di laut jongon kakki kirinyo di darek, ³ lalu mamakkik jongon suaro kare, sakiro singo na mangaum; jongon satala inyo mamakkik, tujuh gemuruh guntur mampadangakan suaro sidak. ⁴ Katiko katujuh guntur tu ala basuaro, ambo handak manuliskannyo, tatapi ambo mandanga suaro dari surga mangeccek, "Segellah apo na ala dikatokan samo katujuh guntur tu! jangan manuliskannyo!" ⁵ Kamudian, malaikat na ambo liek tagak di laut jongon di darek tu mangangkek tangan kanannyo ka lanngit, ⁶ jongon basumpah demi Inyo na hidup salamo-lamonyo, na manciptokan langit jongon sagalo isinyo, dan bumi dan sagalo isinyo, dan laut jogon sagalo isinyo, bahwo indak ado panundaan lai, ⁷ tatapi pado maso bunyi malaikat katujuh, katiko inyo handak manghombus trompetnyo, mako taganapilah rahasio Allah, sakiro na Inyo sampekan kapado paro hamba-Nyo: paro nabi." ⁸ kamudian, suaro na tadi ambo danga dari surga mangeccek lai kapado ambo, katonyo, "Pai jongon ambiklah gulungan kitab tabukkak dari tangan malaikat na tagak di ate laut jongon darek tu." ⁹ Mako, ambo pai kapado malaikat tu jongon mamintaknyo mangagikan gulungan kitab ketek tu kapado ambo. Dan, malaikat tu mangeccek kapado ambo, "Ambiklah kitab ko jongon makkanlah parutkau pait, tatapi di mulutkau, itu akan taraso mani sakiro madu." ¹⁰ Lalu, ambo mangambik kitab ketek tu di tangan malaikat tu jongon mamakkannyo, dan di mulut ambo tu taraso mani sakiro madu; jongon katiko ambo ala mamakkannyo, parut ambo manjadi pait. ¹¹ Lalu, inyo mangeccek kapado ambo, "Kau harus banubuat lai di mukko banyak bangsa jongon kaum jongon bahaso jongon rajo-rajo."