¹ Satala masuk ka sampan, Yesus manyubarangi danau dan tibo di kota-Nyo sorang. ² Dan, liek, sidak mambaok kapado-Nyo saurang lumpuh na tagolek di tampek tidu. Katiko maliek iman sidak, Yesus bacakkap kapado sidak, Yesus bacakkap kapado urang lumpuh tu, "Taguhkan hatikau, anak-Ambo, dosakau ala diampuni." ³ Kamudian, babarapo ahli Taurek bacakkap dalam hatinyo, "Urang ko manghujek!" ⁴ Namun, Yesus manau pikkiran sidak, cakkap-Nyo, "Mangapo kau mamikkikan na jahek dalam hatikau? ⁵ Manokah na labi mudoh, bacakkap, 'Doso-doso kau diampuni,' ato bacakkap, 'Jagolah jongon bajalanlah'? ⁶ Akan tatapi, supayo kau dapek manau bahwa di bumi Anak Manusio bakuaso untuk mangampuni doso." Kamudian, Yesus bacakkap kapado urang lumpuh tu, "Jagolah, angkeklah tapek tidu kau, dan pulanglah!" ⁷ Mako, inyo jago dan pulang. ⁸ Namun, katiko urang banyak maliek hal ko, sidak manjadi takjub jongon mamuliokan Allah na mangagi kuaso sakiro itu kapado manusio. MATIUS PANGUMPU PAJAK MANGIKKUT YESUS ⁹ Katiko Yesus pai dari situ, Inyo maliek saurang na diimbo Matius tanga duduk di tampek pangumpuan pajak. Lalu, Yesus bacakkap kapadonyo, "Ikkutlah Ambo." Jongon Matius tagak dan mangikkut Yesus. ¹⁰ Pado waktu Yesus duduk makkan di dalam rumoh tu, liek, banyak pangumpu pajak jongon urang-urang badoso datang, lalu duduk makkan basamo Yesus jongon murid-murid-Nyo. ¹¹ Dan, katiko urang-urang Farisi maliek hal ko, sidak bacakkap kapado murid-murid-Nyo, "Mangapo Gurukau makkan basamo paro pangumpu pajak jongon urang-urang badoso?" ¹² Akan tatapi, katiko Yesus mandanga hal tu, Inyo bacakkap, "Sidak na sehat indak mambutuhkan dukkun, malainkan sidak na sakkik. ¹³ Namun, pailah dan palajari apo artinyo ko, 'Ambo mangkahandaki raso kasian, indakknyo pasembahan,' sabab Ambo datang indak nandak mangimbo na benar, malainkan urang-urang badoso." PATANYOAN TANTANG BAPUASO ¹⁴ Kamudian, murid-murid Yohanes datang kapado Yesus jongon batanyo, "Mangapo kami dan urang-urang Farisi malakukan puaso, tatapi murid-murid-Kau indak bapuaso?" ¹⁵ Dan, Yesus bacakkap kapado sidak, "Dapekkah paro pangiring pangantin badukkocito salamo pangantin marampule masih basamo-samo jongon sidak? Akan tatapi, akan tibo waktunyo katiko pangantin marampule tu diambik dari sidak, jongon kamudian sidak akan bapuaso." ¹⁶ Indak ado saurang pun na manambalkan kain na baru pado pakkean na lamo, karano tambalan tu mancabik pakkean na lamo jongon masih gadang cabiknyo. ¹⁷ Juo indak ado urang na manunggang anggur baru ka dalam sakku kulikna lamo. Jiko damikian, sakku kulik tu akan cabik, dan anggurnyo akan tunggang, jongon sakku kuliknyo hancur. Akan tatapi, sidak manyimpan anggur na baru ka sakku kulik na baru pulo sahinggo kaduonyo tapaliharo." YESUS MAMBANGKIKKAN JONGON MANCEGAKKAN ¹⁸ Samantaro Yesus mangatokan hal-hal ko kapado sidak, liek, saurang pamimpin rumoh ibadah datang jongon manyembah-Nyo, dan bacakkap, "Anak padusi ambo baru sajo mati. Akan tatapi, datang jongon latakkanlah tangan-Kau ka atenyo, mako inyo akan hidup." ¹⁹ Lalu, Yesus jago jongon mangikkuti urang tu, baitu pulo jongon murid-murid-Nyo. ²⁰ Dan, lieklah, saurang padusi na ala mandarito pandarahan salamo duo bale tahun mandakeki Yesus daru balakkang jongon manjamah ujung jubah-Nyo, ²¹ sabab padusi tu bacakkap kapado dirinyo surang, "Jiko ambo mamaccik jubah-Nyo sajo, ambo akan cegak." ²² Akan tatapi, Yesus babalik jongon mamandang padusi tu, lalu bacakkap, "Taguhkanlah hatikau, hei anak-Ambo, imankau ala mancegakkan kau." Sakatiko tu juo, cegaklah padusi tu. ²³ Katiko Yesus tibo dirumoh kapalo ibadah tu dan maliek paro panghombus saruling jongon karumunan urang na manyababkan kahebohan, ²⁴ Inyo bacakkap kapado urang-urang tu, "Pailah, karano anak padusi tu indak mati, malainkan tanga tidu." Dan sidak manggalakkan Yesus. ²⁵ Namun, katiko urang banyak tu ala diusir kalua, Yesus masuk lalu mamaccik tangan anak tu, jongon anak padusi tu pun jago. ²⁶ Barito tu tasebar ka saluruh daerah tu. YESUS MANCEGAKKAN DUO URANG BUTO ²⁷ Katiko Yesus pai dari sinun, duo urang buto mangikkuti Inyo sambi mamakkik-makkik, "Kasihanilah kami, Anak Daud." ²⁸ Satala Inyo mamasuki rumoh tu, kadua urang buto tasabut mandatangi-Nyo jongon batanyo kapado sidak, "Apokah kau piccayo kok Ambo dapek mambuek hal ko?" Sidak bacakkap kapado-Nyo, "Yo, Tuhan!" ²⁹ Kamudian, Yesus manjamah mato sidak, kato-Nyo, "Jadilah kapadokau manurut imankau." ³⁰ Jongon tabukkolah mato sidak. Yesus jongon tegas mamparingekkan sidak, "Parhatikanlah, jangan ado saurang pun manau hal ko." ³¹ Akan tatapi, sidak kalua jongon manyebarkan barito tantang Yesus ka saluruh daerah tu. YESUS MANCEGAKKAN URANG BISU ³² Satala kaduo urang tu kalua, lieklah, urang-urang mambaok saurang bisu na dirasuk roh jahek kapado Yesus. ³³ Satala roh jahek tu diusir, urang bisu tu pun mangeccek. Urang banyak tu manjadi taharan-haran jongon bacakap, "Hal sakiro ikko balim pana taliek di Israel." ³⁴ Akan tatapi, urang-urang Farisi bacakkap, "Inyo mangusir roh-roh jahek jongon panguaso roh-roh jahek." BANYAK PANENAN SAKETEK PAKARAJO ³⁵ Yesus pai mangalilingi sadonyo kota jongon desa sambil mangajar di sinagoge-sinagoge sidak, jongon mambaritokan Injil Karajaan, sarto mancegakkan sagalo panyakkik jongon kasakkitan. ³⁶ Katiko Yesus maliek urang banyak tu, Inyo maraso kasihan kapado sidak karano sidak litak dan talantar sakiro domba-domba tanpa gambalo. ³⁷ Kamudian, Inyo bacakkap kapado murid-murid-Nyo, "Sasunggunyo, panenan banyak, tatapi pakarajo-pakarajonyo saketek." ³⁸ Karano itu, mintaklah kapado Tuhan na mampunyoi panenan, untuk mangirimkan pakarajo-pakarajo dalam panenan-Nyo."