¹ Dan, Yesus mangimbo kaduo bale murid-Nyo, jongon mangagi sidak kuaso ate roh-roh najis tu untuk mangusir roh-roh tu dan untuk mancegakkan sagalo maccam panyakkik maupun sagalo maccam kasakkitan. ² Ikkolah namo-namo kaduo bale rasul tu: Na partamo, Simon na disabut Petrus, dan Andreas sodaronyo, dan Yakobus anak Zebedeus, dan Yohanes sodaronyo, Filipus, dan Bartolomeus, Tomas, jongon Matius si pangumpu pajak, Yakobus anak Alfeus, dan Tadeus, ⁴ Simon urang Zelot, jongon Yudas Iskariot na manghianati Yesus. ⁵ Yesus mangutus kaduo bale rasul tu jongon mamarintokan sidak, "Jangan pai ka jalan bangsa-bangsa lain untuk masuk ka dalam kota urang Samaria, ⁶ malainkan pailah kapado domba-domba na tasasek dari antaro umat Israel. ⁷ Dan, salamo kau pai, baritokanlah jongon bacakkap. , 'Karajaan Surga ala dakkek.' ⁸ Cegakkanlah na sakkik, hidupkanlah na mati, tahirkanlah na kusta, jongon usirlah roh-roh jahek. Kau na manarimo jongon cumo-cumo, agikanlah jongon cumo-cumo. ⁹ Jangan kau mambaok ame, ato perak, ato tembago dalam kabek pinggangkau, ¹⁰ ato tas untuk pajalanan, ato duo helai baju, ato solop, ato tongkat sabab saurang pakarajo pantas untuk makkanannyo. ¹¹ Dan, di kota ato desa mano pun na kau masuki, salidikilah siapo na layak di didalamnyo jongon tinggalah di sinun sampe kau barangkek. ¹² Katiko kau mamasuki rumoh tu, agikanlah salam. ¹³ Dan, jiko rumoh tu layak, padialah dame sajatro kau turun atenyo, tatapi kok indak, padialah dame sajatro kau kambali kapado kau. ¹⁴ Dan, siapo sajo na indak manarimo kau ato indak mau mandanga pakatoan kau, katiko kau kalua dari rumoh ato kota tu, kebaskanlah kabut kakki kau. ¹⁵ Ambo mangatokan na sabananyo kapado kau bahwa pada hari panghakiman, tanah Sodom jongon Gomora akan labi bisa mananggungnyo daripado kota tu." KASUSAHAN-KASUSAHAN NA NANDAK DIHADAPI PARO MURID ¹⁶ "Liek, Ambo mangutus kau sakiro domba na tanga-tanga sarigalo. Karano itu, jadilah cadik sakiro ula dan tulus sakiro pipik-pipik marpati. ¹⁷ Akan tatapi, bahati-hatilah tahadok urang-urang karano sidak akan mansarahkan kau kapado Sanhedrin jongon nandak mancambuk kau di sinagoge-sinagoge sidak. ¹⁸ Dan, kau akan mambaok ka mukko paro panguaso jongon paro rajo dami Ambo, sabage kasaksian untuk sidak jongon untuk bangsa-bangsa lain. ¹⁹ Namun, katiko sidak mansarahkan kau, jangan riso tantang maccammano ato apo na kau katokan karano saat tu juo nandak diagikan kapado kau apo na harus kau katokan. ²⁰ Sabab, indak kau na mangeccek, tatapi itu iolah Roh Ayah kau na bacakkap di dalam kau. ²¹ Sodaro akan mansarahkan sodaronyo kapado kamatian, jongon ayah tahadok anaknyo. Dan, anak-anak akan malawan paro urang tuo dan mambunuh sidak. ²² Kau akan dibanci samo sadonyo karano namo-Ambo, tatapi urang na batahan sampe akhir akan disalamatkan. ²³ Katiko sidakmanganiayo kau dalam saincek kota, larilah kakota na lain. Ambo mangatokan na sabananyo kapado kau bahwa kau indak nakkan salase malewati kota-kota Israel sampe Anak Manusio datang. ²⁴ Murid indak malabihi gurunyo, damikian pulo hamba indak malabihi tuannyo. ²⁵ Cukkuplah jiko murid sakiro gurunyo, jongon hamba manjadi sakiro tuannyo. Jiko sidak manyabut tuan rumoh tu Beelzebul, labi buruk lai kapado anggota kalurganyo." TAKKUTLAH KAPADO ALLAH INDAK KAPADO MANUSIO ²⁶ "Karano itu, jangan kau takkut tahadok sidak sabab indak ado pun na ta tutup na indak akan di ungkap, ato na tasondok na indak nakkan kane tau. ²⁷ Apo na Ambo katokan kapado kau dalam kagalapan, katokanlah itu dalam tarang. Jongon apo na kau danga dibisikkan di talingo kau, baritokanlah di ate atok rumoh. ²⁸ Jangan takkut kapado sidak na mambunuh badan, tatpi indak dapek mambunuh jiwo, malainkan talabih takkutlah kapado Inyo na dapek mamusnokan jiwo maupun badan di narakko. ²⁹ Indakkah duo ikku pipik dijua untuk saincek kepeng? Jongon indak ado saikku pun dari sidak akan jatuh ka tanah di lua kahandak Ayahkau. ³⁰ Bahkan, rambut kapalo kau sadonyo tahitung. ³¹ Karano itu, jagan takkut, kau labi banile daripado pipik." MANGAKKUI YESUS DI MUKKO URANG LAIN ³² "Jadi, satiok urang na mangakkui Ambo di mukko manusio, Ambo juo akan mangakkuinyo di mukko Ayah-Ambo na ado di surga. ³³ Akan tatapi, siapo na manyangkal Ambo di mukko manusio, Ambo pulo akan mayangkalnyo di mukko Ayah-Ambo na ado di surga." TUJUAN KADATANGAN YESUS ³⁴ "Jangan bapikki bahwo Ambo datang untuk mambaok padamean di bumi. Ambo datang indak untuk mambaok padamean, malainkan padang. ³⁵ Sabab, Ambo datang untuk mamisahkan lakki-lakki dari ayahnyo, anak padusi dari umaknyo, minantu padusi dari umak mintuonyo, ³⁶ jongon musuh sasaurang iyolah dari anggota kaluargonyo. ³⁷ Siapo na labi mangasihi ayah ato umaknyo daripado Ambo, indak layak bagi-Ambo. Jongon, siapo na labi mangasihi anak lakki-lakki ato anaknyo padusi daripado Ambo, indak layak bagi-Ambo. ³⁸ Jongon siapo na indak mamikul salibnyo dan mangikkuti Ambo, indak layak bagi-Ambo, ³⁹ Siapo na mampartahankan nyawonyo akan kahilangan nyawonyo, dan siapo na kahilangan nyawonyo dami Ambo akan mandapekkannyo." UPOH DARI ALLAH ⁴⁰ "Siapo na manarimo kau, manarimo Ambo. Jongon, siapo na manarimo Ambo, manarimo Inyo na mangutus Ambo. ⁴¹ Siapo na manrimo nabi dalam namo nabi akan manarimo upoh nabi. Jongon, siapo na manarimo urang benar dalam namo urang benar akan manarimo upoh urang benar. ⁴² Dan, siapo na mangagi minum kapado salah satu dari urang-urang na ketek ko padiapun hanyo sacangki ai dingin dalam namo saurang murid, Ambo mangatokan na sabananyo kapado kau, inyo indak akan kahilangan upohnyo."