¹ Katiko Yesus ala manyalasekan pakatoan-pakatoan ko, Inyo barangkek dari Galilea dan tibo di wilayoh Yudea, di subarang sunge Yordan. ² Jongon, karumunan gadang urang banyak mangikkuti-Nyo, dan Inyo mancegakkan sidak di sinun. ³ Babarapo urang Farisi datang kapado Yesus untuk mancuboi Inyo dan batanyo, "Apokah dibenarkan bagi lakki-lakki untuk mancarekan bininyo jongon bamaccam alasan?" ⁴ Lalu, Yesus manjawab dan bacakkap, "Indakkah kau mambacco bahwo Inyo, na manciptokan sidak sajak samulo, manjadikan sidak lakki-lakki jongon padusi, ⁵ dan Inyo bafirman, 'Karano itu, lakki-lakki harus maninggakan ayahnyo jongon umaknyo, dan manjadi saincek jongon bininyo, dan kaduonyo tu akan manjadi saincek badan'? ⁶ Jadi, sidak indak lai duo, malainkan saincek badan. Karano itu, apo na ala dipasatukan Allah, manusio indak bisa mamisahkannyo." ⁷ Sidak bacakkap kapado Yesus, "Lalu, mangapo Musa mamarintokan untuk mangagikan surek care dan mancarekan bininyo?" ⁸ Yesus bacakkap kapado sidak, "Karano kakarean hatikau, Musa mangijinkan kau mancarekan binikau. Akan tatapi, pado mulonyo indaklah damikian. ⁹ Dan, Ambo mangatokan kapadokau bahwo siapo na mancarekan bininyo, kacuali karano zino, lalu manikka jongon padusi lain, inyo bazino." ¹⁰ Murid-murid bacakkap kapado-Nyo, "Jiko sakiro ikko halnyo lakki jongon bininyo, labi elok indak manikka." ¹¹ Namun, Yesus bacakkap kapado sidak, "Indak sadonyo urang dapekmanarimo pakatoan ko, kacuali sidak na dikarunioi. ¹² Sabab, ado urang na indak manikka karano memang lahe damikian dari rahim umaknyo, jongon ado urang na indak manikka karano dimandulkan samo urang lain, dan ado juo urang na mandul na mamandulkan dirinya sorang dami Karajaan Surga. Barangsiapo dapek manarimo hal ko, padialah inyo manarimonyo." YESUS JONGON ANAK-ANAK KETEK ¹³ Kamudian, babarapo anak ketek dibaok kapado-Nyo supayo Inyo dapek malatakkan tangan-Nyo ate anak-anak tu jongon mandoakan sidak. Akan tatapi, murid-murid mansapo urang-urang tu. ¹⁴ Namun, Yesus bacakkap, "Padiakanlah anak-anak ketek tu. Jangan manghalangi sidak datang kapado-Ambo sabab Karajaan Surga iyolah punyo urang-urang na sakiro anak-anak ketek ko." ¹⁵ Satala Yesus malatakkan tangan-Nyo ate anak-anak tu, Inyo pai dari situ. BAAPO MANDAPEK HIDUP KEKAL? ¹⁶ Kamudian, datanglah sasaurang kapado Yesus jongon batanyo, "Guru, hal elok apo na harus ambo pabuek supayo mandapek hidup na kekal?" ¹⁷ Dan, Yesus bacakkap kapado urang tu, "Mangapo kau batanyo kapado-Ambo tantang apo na elok? Hanyo ado saincek na elok. Namun, jiko kau nandak masuk ka dalam hidup, turutilah parinto-parinto tu." ¹⁸ Urang tu batanyo kapado Yesus, "Parinto na mano?" 'Jawab Yesus, "Jangam mambunu, jangan bazino, jangan mancilok, jangan mangagi kasaksian palsu, ¹⁹ hormatilah ayahkau jongon umakkau, dan kasihilah sasamokau manusio sakiro dirikau sorang." ²⁰ Urang mudo tu bacakkap kapado-Nyo, "Sadonyo hal tu ala ambo turuti, apo lai na masih kurang?" ²¹ Yesus bacakkap kapadonyo, "Jiko kau nandak sampurno, pai dan jualah sadonyo na kau punyo. Lalu, agikanlah kapado urang miskin, dan kau akan mampunyoi harto di surga, dan mo ikkutkah Ambo." ²² Namun, katiko urang mudo mandanga panyatoan ko, inyo pai jongon sedih sabab inyo kayo bana ²³ Lalu, Yesus bacakkap kapado murid-murid-Nyo, "Ambo mangatokan na sabananyo kapadokau, susah bagi urang kayo untuk masuk ka dalam Karajaan Surga. ²⁴ Sakkali lai, Ambo mangatokan kapadokau bahwo labi mudo bagi saikku unta untuk malewati lubangjarum daripado urang kayo ka dalam Karajaan Allah." ²⁵ Katiko paro murid mandanga pakatoan tu, sidak manjadi tacangang-cangang bana, jongon bacakkap, "Kok baitu, siapo na biso disalamatkan?" ²⁶ Sambi mamandang sidak, Yesus bacakkap, "Basamo manusio, hal ko mustahil, tatapi basamo Allah, sadonyo hal tu mungkin." ²⁷ Kamudian, Petrus bacakkap kapado-Nyo, "Lieklah, kami ala maninggakan sadonyo jongon mangikkuti Kau. Jadi, apo na nandak kami tarimo?" ²⁸ Dan, Yesus bacakkap kapado sidak, "Ambo mangatokan na sabananyo kapadokau bahwo kau, na mangikkuti Ambo dalam dunio na baru, katiko Anak Manusio duduk di tahta kagadangan-Nyo, kau pulo akan duduk di ate duo bale manghakimi kaduo bale suku Israel. ²⁹ Dan, satiok urang na ala maninggakan rumoh, sodaro lakki-lakki, sodaro padusi, ayah, umak, anak-anak, ato ladangnyo karano namo-Ambo akan manarimo saratus kali lippek dan akan mawarisi hidup na kekal. ³⁰ Akan tatapi, banyak urang na partamo manjadi na tarakhir, dan na tarakhir manjadi na partamo."