¹ Lalu, Yesus masuk balek ka Sinagoge, di situ ado saorang yang tangannyo lumpuh sabolah. ² Orang-orang tu manengoi Yesus ondak manengok apo Dio mau manyombuhkan orang sakit tu pada hari Sabat biar orang-orang tu bisa mamitnah Dio. ³ Udah tu, Yesus bacakap ka orang yang tangannyo lumpuh sabolah tu, "Togaklah di tongah-tongah !" ⁴ Lalu, Yesus Bacakap samo orang-orang tu, "Apo boleh mambuat elok atau mambuat tak jahat pas hari Sabat? Manolonh nyawa atau mambunuh ?" Tapi, orang-orang tu diam. ⁵ Lalu, Yesus manengoi samuo orang-orang tu sampe goram. Dio bagitu sodih karna kadogilan hati orang-orang tu. Udah tu, Yesus bacakap samo orang yang tangannyo lumpuh sabolah tu, "julurkan tangan kau". Lalu, orang tu pun manjulurkan tangannyo dan tangannyo pun sombuh. ⁶ Karono itu, orang-orang Farisi langsung pogi,dan mulai bapokat samo orang-orang Herodian yang mambonci-Nyo camano cara mambunuh-Nyo. ⁷ Tapi, Yesus samo murid-murid-Nyo manyingkir ka Danau, dan banyak orang dari wilayah Galilea mangikuti Dio, dan dai Yudea, ⁸ dari Yerusalem, Idumea, daerah saborang Sunge Yordan, dan juga dari dokat Tirus dan Sidon, banyak orang waktu mandongar samuo yang Yesus korjokan, datang ka Dio. ⁹ Karna orang banyak tu, Yesus bacakap ka murid-murid-Nyo biar manyiapkan satu sampan untuk-Nyo biar orang-orang tu ta mandorong Dio. ¹⁰ Karna Yesus sudah manyombuhkan banyak orang, mako samuo orang yang ado sakitnyo torus badatangan supayo bisa mamegang-Nyo ¹¹ Lalu, waktu roh-roh najis manengok Yesus, roh-roh itu sujud di dopan-Nyo lalu manjorit, "Kau adalah Anak Allah." ¹² Tapi, Yesus malarang botul orang-orang tu mancaritokan siapo Dio ¹³ Lalu, Yesus naik ka bukit dan mamanggil orang-orang yang Dio sukoi, dan orang-orang tu pun datang ka Dio. ¹⁴ Dio mamilih duo bolas orang basamo dengan Dio, supayo Dio bisa manyuruh orang-orang tu ondak bakotbah, ¹⁵ dan mangkasi kakuatan ondak mangusir setan-setan. ¹⁶ Yesus mamilih kaduo bolas orang tu: Simon ( yang di panggil Yesus, Petrus ), ¹⁷ Yakobus, anak Zebedeus, dan Yohanes, saudaro Yakobus (yang ka dio Yesus mangkasi orang tu namo Boanerges, artinyo "Budak-budak Guruh"), ¹⁸ Andreas, Filipus, Bartolomeus, Matius, Tomas, Yakobus, budak Alfeus, Tadeus, Simon orang Zelot, ¹⁹ dan Yudas Iskariot, yang manghianati Dio. ²⁰ ( Kuaso Yesus Barasal Dari Allah ) Kamudian Yesus masuk ka salah satu rumah, dan orang bakarumun tu balek bakumpul di situ sampe Yesus dan murid-murid-Nyo tak dapatan roti. ²¹ waktu kaluarga-Nyo mandongar hal tu, orang tu datang ondak mambawa Yesus balek, karono orang tu mambilang kalo Dio sudah tak waras lagi. ²² Lalu, jago-jago Taurat yang datang dari Yerusalem mambilangkan, "Dio karasukan Beelzebul !" dan "Dio mangusir setan dengan kakuatan pamimpin setan". ²³ Udah tu, Yesus mamanggil orang tu datang ka-Dio, dan bacakap pake parumpamaan, "Camano bisa Iblis mangusir Iblis? ²⁴ Bilo sabuah karajaan tapocah-bolah malawan dirinyo sandiri, karajaan tu tak dapat batahan. ²⁵ Lalu, bilo sabuah rumah tapocah-bolah malawan dirinyo sandiri, rumah tu takkan bisa batahan. ²⁶ Bilo Iblis bangkit malawan dirinyo sandiri lalu tapocah-bolah, dio tak dapat batahan, tapi habislah riwayatnyo. ²⁷ Tak ado saorang pun bisa masuk ka rumah orang yang kuat lalu marampok harto bondanyo, kacuali lobih dulu dio mangikat orang kuat tu, mako barulah dio bisa marampok rumahnyo". ²⁸ Aku mambilangkan yang sabonarnyo ka kamu, samuo dosa anak-anak manusio bisa di ampuni, jugo samuo cacian yang orang-orang ucapkan. ²⁹ Tapi, siapo sajo yang mancaci Roh Kudus takkan pornah di ampuni, malainkan basalah karono dosa kokal". ³⁰ Sobab tu, jago-jago Taurat tu bacakap, "Dio karasukan roh najis". ³¹ Kamudian, omak dan saudaro-saudaro Yesus datang dan badiri di luar rumah. Orang tu manyuruh orang ka-Dio ondak mamanggil-Nyo. ³² Banyak orang sodang duduk mangalilingi Yesus, lalu orang tu bacakap ka-Dio, "Tengok, omak-Kau samo saudaro-saudaro-Kau ado di luar sodang mancari Kau". ³³ Lalu, Yesus manjawab orang tu dan mambilang, "Siapokah omak-Ku samo saudaro-saudaro-Ku ?" ³⁴ Kamudian, Dio manengok samuo orang yang duduk mangkalilingi-Nyo dan mambilang, "Tengoklah, inilah omak-Ku samo saudaro-saudaro-Ku ! ³⁵ Sobab, siapo sajo yang malakukan kamauan Allah adalah saudaro-Ku laki-laki, samo saudaro parampuan-Ku, samo omak-Ku".