¹ babarapo hari kamudian, waktu balek Yesus ka Kapernaum, tadongarlah barito bahwa Dio di rumah. ² Lalu, banyak orang bakumpul sampek tak muat ruang tu, sampek disamping pintu pun Dio mangatokan firman Tuhan ka orang-orang tu. ³ Lalu, orang-orang tu manjumpoi Dio mambawak saorang yang lumpuh yang digotong omapt orang. ⁴ Waktu orang-orang tu tak biso mambawaknyo ka dokat Yesus karono orang rame, orang-orang tu mambuko atap diatas Yesus dan mambukonyo, di turunkan orang tu lah tilam tompat orang lumpuh tu tagolek. ⁵ Waktu dilihat Yesus iman orang tu, bacakap lah Dio samo orang lumpuh tu, "Hai anak-Ku doso-doso kau sudah diampuni." ⁶ Tapi babarapo nang jago Taurat ni yang duduk disano muloi bapikir dalam hati orang tu, ⁷ "Mangapo orang ni bacakap macam tu? Dio sodang manghujat! Siapo yang biso mangampuni doso-doso kacuali Allah sandiri?" ⁸ Lansung tau Yesus dari dalam Roh-Nyo bahwa orang-orang tui bapikir dalam hati orang tu. Dio bacakap samo orang tu, "Mangapo kamu bapikir macam tu? ⁹ Mano yang lobih mudo, mangatokan ka orang lumpuh tu, 'Doso-doso kau diampuni', atau mangatokan 'Bangun, angkat tompat tidur mu dan bajalan lah'? ¹⁰ Tapi, katahuilah bahwa anak manusio punyo kuaso untuk mangampuni doso-doso di bumi ni. "Bacakap Yesus samo orang lumpuh tu, ¹¹ "Bacakap Aku samo kau: bangun, angkat tompat tidur mu, pogi kaluar pulanglah ka rumah mu. " ¹² Orang lumpuh tu lansung badiri, diambeknyo tompat tidurnyo, pogi kaluar, di hadapan samuo orang. Orang-orang tu samuo heran dan mamuliokan Allah sambil bacakap, "Bolum pornah kami manengok macam ni!" ¹³ Pogi lah Yesus ka tapi danau, dan yang ramean orang datang ka Dio dan di ajarkan-Nyo lah orang tu. ¹⁴ Waktu Dio lewat ditengok-Nyo Lewi, anak Alfeus, sodang duduk di pambayaran pajkak. Lalu bacakap Yesus samo dio, "Moh ikut lah Aku." Lalu, si Lewi badiri dan di ikutinyo Yesus. ¹⁵ Dan, samantaro Yesus makan di rumah orang Lewi tu, banyak pangumpul pajak dan orang-orang badoso jugo makan samo Yesus serta murid-murid-Nyo, karono banyak orang mangikut Yesus. ¹⁶ waktu babarapo nang jagok Taurat dari kalompok Farisi manengok Yesus lagi makan samo orang-orang badoso dan pangumpul-pangumpul pajak, ditanyo nyo pado murid-murid-Nyo, "Mangapo dio makan samo panagih pajak dan orang-orang badoso?" ¹⁷ Waktyu Yesus mandongarnyo, bacakaplah Dio ka orang tu, "Orang tu sehat tak porlu dokter tapi orang tu yang sakit. Awak datang bukan mamanggil orang-orang botul, tapi orang-orang badoso ." ¹⁸ Murid-murid Yohanes dan orang-orang Farsi ni bapuaso. Batanyo orang tu kapado-Nyo, " Mangapo murid-murid si Yohanes dan orang-orang Farisi ni bapuaso, tapi murid-murid Mu tak puaso?" ¹⁹ Lalu Yesus bacakap ka orang tu, "Bisonyo ni pangiring panganten bapuaso samantaro panganten laki-laki ni masih basamo orang tu? salamo panganten laki-laki tu masih dengan orang tu, orang tu tak biso puaso. ²⁰ Tapi, harinyo tu akan datang waktu panganten laki-laki diambek dari orang tu, pada hari tu lah orang tu tak bapuaso. ²¹ Tak ado orang manambalkan pakean lamo nang kuyak dengan nang baru. Jiko bagitu, tambalan kaen nang baru tu dapat manguyak pakean lamo, kuyakannyo akan batamboh bosar. ²² Dan, tak ado orang nang manuangkan anggur baru tu ka dalam tompat nang lamo. Jiko bagitu, anggur tu akan manguyak tampat tu sabolum anggur atau tompatnyo rusak. Sabaliknyo, anggfur baru ni disimpan di tompat nang baru." ²³ Suatu hari Sabat, lewat Yesus ka ladang gandum, di parjalanan tu, murid-murid-Nyo mamotik bulir-bulir gandum. ²⁴ Lalu, orang-orang farisi bacakap pado-Nyo, "Tengok, mangapo orang tu malanggar hukum hari Sabat?" ²⁵ Lalu, bacakap Yesus ka orang tu,"Bolum pornah kamu baco yang apo yang dipabuat Daud waktu dio dan orang-orang samonyo kakurangan dan kalaparan? ²⁶ Camano dio masuk ka Rumah Allah maso tu Abyatar manjabat sabagai Imam Bosar, dan mambagi roti tu ka orang-orang yang ado samonyo?" ²⁷ Lalu, bacakap Yesus ka orang farisi tu, " Hari Sabat dibuat untuk manusio, bukan manusio untuk Hari Sabat. ²⁸ Jadi, anak manusio adalah Tuhan, jugo atas hari Sabat."