¹ Lalue katikae Ana Tabiri maungkap segel am katujuh, surga yah benyem tunis sakitar satongah jam lamatnya. ² Lalue, aku mailae tujuh malekat am badirie kan paharap Hatalla, lalue tujuh tarompet di borie akan pamanya. ³ Tege, malekat bukan sampaie lalue badirie ka masbah*, mangongam suti parapen amas; lalue kannya diborie banya garue manyan akan di hamur barotae doa-doa kawan-urang kudus ka tinggie mesbah amas ka paharap tahta iyah. ⁴ Lalue, asap parapen iyah barotae akan doa-doa kawan-urang kudus, nai kapaharap Hatalla mulae jarie malekat iyah. ⁵ Tege, malekat diyah mangalap parapen lalue maisienya honie apie am dialapnya mulae mesbah lalue manibarnya ka tanah; maka tadongoram bungie guntur kilat lalue bakanyah. (Tarompet am Sulanya datang ka Tarompet Kaompat Ditiup) ⁶ Limahiyah, tujuh malekat am mangongam tujuh tarompet iyah basia-siap akan maniup tarompet pamanya. ⁷ malekat pasulanya maniup tarompetnya, makae salenga jadie ujan es umakan apie bacampur darah; lalue jatue ka tingie tanah. makae habis hangus saper tolue tanah lalue saper tolue puhon kayue umakan uras rumput hijau. ⁸ Malekat kaduae maniup tarompetnya, makae tege berae bukit haguncang hangus laie apie berae konae tibar ka lalam tasi; lalue saper toleu tasi iyah jadie darah, ⁹ makae saper tolue mulae imun tege ka tasi umakan am hirup yah matie urasnya, beraiyah jam saper tolue kapal hancur urasnya. ¹⁰ Malekat katolue maniup tarompetnya, maka jatueam mulae langit suti bintang bakah, manyalae berae colok, lalue bintang maningang saper tolue sungaie umakan matae araie. ¹¹ Nama bintang iyah Apsintus. Makae, saper tolue mulae uras araie jadie apsintus lalue bannya urang matie laie araie iyah sabab araie iyah jadi pahit. ¹² Malekat kaompat maniup tarompet, makae tahompasam saper tolue matae arie, saper tolue bulan, saper tolue bintang lalue saper tolue mulae pamanya jadi hila, lalue saper tolue siang arie jadie hila lalue berae iyahjam akan malam arie. ¹³ Lalue, aku mailae lalue manongar siku burung rajawali tarowang tongah langit, bapaner nyaring, "Gawat, gawat, gawatam pamanya am tege ka tanah laie bungie tarompet katolue malekat bukan am masih hona maniupnya."