¹ Limah iyah, aku maila malaikat turun mula surga, naing kunci jurang maut umakan suti rantai bakah ka jarinya. ² Inya manangkap naga iyah, si ular tuha, iyaham Setan rangnua Iblis, lalu mangobatnya salama saribu tahun, ³ mamibarkannya ka lalam jurang maut, manutupnya, lalu manyegelnya nyaman inya honta mula manyosat bangsa-bangsa mula, sampai saribu tahun iyah baakhir. Limah iyah, inya akan lopas samantara waktu. ⁴ Lalu, aku mailae takhta umakan ka tingienya duru urang am kona bori kuasa honi manghakimi. Aku maila jiwa urang am kona samolih palanya laie kasaksian Yesus umakan laie firman Hatalla, lalu urang am honta manyomah lau jolu iyah atau patungnya lalu honta manarima tana lau jolu iyah ka dahi atau jari urang. Urang hirup mula lalu mamarintah uma Kristus salama saribu tahun. ⁵ Akan tapi,urang mati am bukannya honta hirup mula sahompan masa saribu tahun iyah baakhir. Iti ka bangkitan partama. ⁶ Kona berkat lalu kudus urang am baulih bagian lalam kabangkitan* partama iyah. Paharap urang iti, pamati kadua honta bakuasa, tapi urang akan jadi iman-iman Hatalla umakan Kristus, lalu akan mamarintah uma Inya salama saribu tahun. Kakalah Iblis ⁷ Limah masa saribu tahun baakhir, Iblis akan kona lopas nola pajaranya. ⁸ Inya akan manyosatkan bangsa-bangsa mala ka ompat panjuru bumi, Gog umakan Magog, amakan magumpulkan urang nyaman bakalahi. Jumlah urang bera pasir ka laut ⁹ Urang naie ka towing bumi lalu mangapung parkemahan urang kudus lalu kota am siha. Tapi, api turun mula langit lalu mahasut urang. ¹⁰ Lalu, Setan am metuh manyosatkan urang tatibar ka lalam lautan api lalu babarah, diah jam lau jolu umakan nabi palsu iyah jam tatibar. Urang akan kona siksa siang malam salama-lamanya. Panghakiman ka Paharap Takhta Putih Limah iyah, aku mailae takhta putih am bakah lalu Inya duru ka tingienya, am mula paharap-Nya bumi lalu langit hila lalu honta dapat mula homan urang mula. ¹² Lalu, aku mailae urang mati, bakah umakan koni, badiri ka paharap takhta iyah. Lalu, kona buka kitab-kitab lalu suti kitab am bukan, iyaham kitab Kahidupan, lalu urang mati iyah kona hakim badasarkan apa am tatulis lalam kitab iyah, sasuai pangawie urang. ¹³ Laut manyorah urang mati am tege ka lalamnya, maut umakan Hades jam manyorah urang mati am tege ka lalamnya lalu urang kona hakim, masing-masing manurut pangawienya. ¹⁴ Lalu, maut umakan Hades kona tibar ka lalam lautan api. Iti pamati am kadua--lautan api. ¹⁵ Amun siku urang namanya honta tatulis lalam kitab Pahirup, inya akan kona tibar ka lalam lautan api iyah.