¹ Lamah iyah, aku manongar suara am nyaring bera sakumpulan bakah urang ka surga bapaner, ''Haleluya! Kasalamatan, Kamulian, umakan kakuasaan iyaham hompu Hatalla diri ² Laie panghakiman-Nya bakah umakan adil; laie Inya jadi maadil palacur bakah iyah, am marusak bumi honi kajahatnya, lalu limah mamalaskan darah hamba-hamba-Nya ka palacur iyah.'' ³ Akan ka dua kalinya, urang bapaner, ''Haleluya! Asap palacur iyah jadi nai sampai salama-lamanya.'' ⁴ Lalu, kadua puluh ompat tuha-tuha* lalu kaompat mahluk iyah sujud lalu manyomah Hatalla, lalu duru ka tingie takhta, lalu bapaner, ''Amin!* Haleluya!'' ⁵ Limah iyah, tadongar mula suara mula takhta, Pujikan Hatalla diri, ui kolai urasnya am malayan Inya, baie am koni atau am bakah, am mahormat Inya!'' (Pesta Kawin Ana Domba) ⁶ Lalu, aku manongar suara bera sakumpulan urang banya, bera suara arai bah, lalu bera sura guntur am hebat, bapaner, ''Haleluya! Laie, Tuhan Hatalla diri Am Mahakuasa mamarintah. ⁷ Ayo diri basukacita lalu basorak sorai, lalu mamori kamulian ka-Inya laie pangawin Ana Domba jadi sampai, lalu panganten labini-Nya jadi siap. ⁸ Kainya jadi kona bori kain linen halus am barasih lalu mantining, nyaman kona honi laie kain linen iyah ayaham karuhan bakah am kona karuh urang-urang kudus.'' ⁹ Limah iyah, malaikat iyah bapaner ka aku, ''Tuliskan iti:'Kona berkatlah urang am kona undang ka jamuan pangawin Ana Domba!''' Lalu, inya bapaner mula ka aku, Itie iyaham paner am bujur mula Hatalla.'' ¹⁰ Lalu, aku sujud ka kaki malaikat iyah honi manyomah inya. Tapi, inya bapaner ka aku, ''Hinang mangaruh iyah laie aku jam hamba bera kolai umakan kawan manyarimu am barigap kasaksian Yesus. Somahkan Hatalla laie kasaksian Yesus iyaham roh nubuat.*'' Panumpang Kuda Putih ¹¹ Limah iyah, aku maila soga tabuka, lalu tege siku kuda putih; Inya am duru ka tingienya am banama Satai umakan bujur, Inya mahakim lalu bakalahi. ¹² Mata-Nya bera nyala api, ka pala-Nya tege banya mahkota, lalu Inya hompu mana am tatulis, am honta ingansaku urang mun, kacuali nari-Nya kaniri. ¹³ Inya bahoni jubah am jadi kona colop ka lalam darah, lalu nama-Nya iyaham Firman Hatalla. ¹⁴ Saluruh pasukan am tege ka surga uma Inya lalu manumpang kuda putih lalu bapakaian kain linen halus am putih barasih. ¹⁵ Mula nyawa-Nya, maluar suti pisau tajam am honi marabas bangsa-bangsa. Inya akan mamarintah tingie urang honi tungkat bosi. Inya akan mamorah anggur lalam batu kilangan, am iyaham murka Hatalla Am Mahakuasa. ¹⁶ Mula jubah umakan paha-Nya tatulis nama iti:RAJA KATINGIE RAJA UMAKAN TUAN KATINGIE SAGALA TUAN. ¹⁷ Limah iyah, aku maila siku urang malaikat badiri ka lalam taarie. Inya basoru honi surar nyaring ka uras burung am tarobang ka langit,''Ayo, bakumpul uma lalam jamuan makan bakah Hatalla, ¹⁸ Nyaman kolai tahu makan daging para raja, daging para panglima, daging urang onya, daging kuda-kuda umakan urang am duru ka tingienya, umakan daging uras urang, baie iyah urang bebas atau urang mardeka, urang koni atau urang bakah.'' ¹⁹ Lalu, aku mailae lau jolu iyah lalu para raja ka bumi uamkan pasukan urang bakumpul bakalahi malawan Inya am duru ka tingie kuda putih iyah lalu malawan pasukan-Nya. ²⁰ Maka, lau jolu iyah kona tangkap, umakan nabi palsunya am jadi maara tana ajaib ka paharap lau jolu iyah, am uma inya manyosatkan urang am manarima tana lau jolu iyah lalu urang am manyomah patungnya. Uras urang kona tibar hirup-hirup ka lalam lautan api am manyala laie barahnya. ²¹ Lalu, sisanya kona pati honi pisau am maluar mula nyawa-Nya am duru ka tingie kuda putih iyah lalu uras burung konyang laie daging urang.