¹ Limah iyah, aku maila Ana Domba badiri ka Bukit Sion, lalu uma-Nya tege 144 ribu urang, am mahompu nama Ompai-Nya ka dahi urang. ² Aku manongar suara mula sorga bera guruh arai am banya lalu bera suara guntur am nyaring, tapi suara am kudongar inyah bera suara pamain kacapi am mamainkan kacapi urang. ³ Urang manyanyikan nyanyian baharu ka paharap takhta lalu ka paharap kaompat makhluk, umakan ka paharap tuha*. Mayan siku urang mun am tahu mampalajar nyanyian iyah am bukan kasaratus ompat puluh ompat ribu urang am jadi kona towus mula bumi. ⁴ Urang iyaham urang am honta manajiskan diri akan kawan labini laie urang perjaka. Urang inyaham urang am uma Ana Domba ka manih kan Inya badari. Urang jadi kona towus mula antara kalunen jadi ana buah partama akan Hatalla umakan Ana Domba. ⁵ Honta ara dusta lalam nyawa urang; urang honta basalah. [Pantal mula Tolu Malaikat] ⁶ Aku maila malaikat bukan tarobang ka tongah-tongah langin, manaing injil* kekal honi mangabarkan ka urang am diam ka bumi umakan ka saluruh bangsa, suku, bahasa, umakan kaum ⁷ lalu inya bapaner honi suara nyaring,'' Golalah akan Hatalla lalu borikan kamulian ka-Inya laie waktu panghakiman-Nya jadi sampai; somahkan Inya am manciptakan langit, bumi, laut, umakan uras mata arai.'' ⁸ Lalu, malaikat am bukan, am kadua, mairing lalu bapaner,''Runtuh, jadi runtuh Babel am bakah iyah laie inya jadi mangaruh uras bangsa mamarai anggur nafsu seksualnya am honta baie.'' ⁹ Limah iyah, malaikat am bukan, am katolu, mairing kadua malaikat am sahompatnya, lalu bapaner honi suara nyaring,''Amun sapa mah manyomah lau inyah umakan patungnya, lalu manarima suti tana ka dahi atau ka jarinya, ¹⁰ urang inyah akan marai anggur murka Hatalls, am kona tumpah honi kakuatan ponuh ka lalam cawan murka-Nya, lalu inya akan kona siksa honi api umakan baranya ka paharap malaikat-malaikat kudus lalu ka paharap Ana Domba. ¹¹ Lalu, asap siksaan urang nai salama-lamanya. Urang mayan ara bagora waktu honi istirahat, baie siang atau malam, inya am urang am manyomah lau iyah umakan patungnya, atau sapa mun am manarima tana namanya.'' ¹² Itiam katekunan urang-urang kudus am mamalihara parintah Hatalla umakan iman urang ka lalam Yesus. ¹³ Lalu, aku manungar suara mula sorga am bapaner,''Tuliskan iti: Mula wayah iti, kona berkatlah urang mati, am mati ka lalam Tuhan.'' Roh* bapaner,'' Bujur, nyaman urang tahu baistirahat mula paoyoh urang laie pangawie urang uma urang.'' Bumi Kona Panen ¹⁴ Lalu, Aku maila suti awan putih lalu duru ka tingie awan inyah urang bera Ana Kalunen*, mahoni mahkota amas ka pala-Nya umakan sabit* am tajam ka jari-Nya. ¹⁵ Lalu, malaikat bukan maluar mula Bait Hatalla, lalu basoru honi suara nyaring ka Inya am duru ka tingie awan,'' Ayonkan sabit-Mu lalu panenkan laie waktu honi mamanen jadi datang lalu panen ka bumi jadi mansa.'' ¹⁶ Maka, Inya am duru ka tingie awan maayonkan sabit-Nya ka tingie bumi, lalu bumi pang kona panen. ¹⁷ Limah inyah, malaikat bukan maluar mula Bait Hatalla am ka sorga, lalu inya jam hompu sabit am tajam. ¹⁸ Lalu, malaikat bukan mula, am bakuasa ka tingie api, maluar mula altar*. Inya basuru honi suara nyaring ka malaikat am marigap sabit tajam iyah,''Ayonkan sabitmu am tajam iyah lalu kumpulkangugusan buah anggur mala puhun anggur ka bumi.'' ¹⁹ Maka, malaikat iyah maayonkan sabitnya ka bumi lalu mangumpulkan gugusan buah anggur mula puhun anggur ka bumi lalu manibarkannya ka lalam batukilangan bakah murka Hatalla. ²⁰ pamorah buah anggur iyah kona karuh ka luar kota, lalu darah malansur mula alat pamorah anggur iyah kira-kira satingie 2 m lalu sapanyang saribu onam ratus stadia.