¹ Limah iyah, aku maila siku lau jolu am sia maluar mula lalam laut, bagura sapuluh tanu rang nua tujuh pala. Mula satiap tanunya tege mahkota lalu mula satiap palanya tatulis nama-nama hinaan. ² Lau jolu am sia am tailaku inyah mirip bera macan tutul, kakinya bera kaki baruang, lalu nyawanya bera nyawa singa. Naga iyah mamori lau jolu am sia iyah kakuatan, takhta, umakan kuasa am bakah. ³ Aku maila suti mula palanya bera kona luka am tahu mangaruh pampati, tapi luka inyah jadi baie.Saluruh dunia kagum lalu uma lau jolu am sia inyah. ⁴ Lalu, urang manyomah naga inyah laie jadi mamori kakuatan ka lau jolu am sia inyah; Lalu urang manyomah lau jolu am sia inyah lalu bapaner,'' Sapa am bera lau jolu am sia iti lalu sapa am tahu bakalahi malawan inya?'' ⁵ Lalu, ka inya kona bori nyawa am bapaner sombong umakan panyumpah, lalu kuasa mangaruhnya salama 24 bulan. ⁶ Inya mamuka nyawanya manyumpah malawan Hatalla, honi manyumpah nama-Nya, lalu kemah-Nya, lalu urang am diam ka surga. ⁷ Inya jam tahu honi mangalahi urang kudus lalu mangalahkan urang; Lalu ka inya kona bori kuasa ka tinggi uras suku, kaum, bahasa, umakan bangsa. ⁸ Uras am diam ka bumi akan manyomahnya, iyaham satiap urang am namanya honta tatulis metuh dunia jadi lalam kitab pahirup hompu Ana Domba, am jadi kona samolih. ⁹ Satiap urang am baponing honakah inya mamongar iti: ¹⁰ ''Amun urang kona tunyu jadi tawanan inya akan jadi tawanan; amun urang mampati honi pisau, honi pisau inya harus kona pati.'' Iyah am sumpah lalu iman urang kudus. [Lau jolu am maluar mula Bumi] ¹¹ Lalu, aku maila siku lau jolu am sia am bukan maluar mula lalam bumi; lalu lau iyah bagora dua tanu bera ana domba, tapi inya bapaner bera siku naga. ¹² Inya manyalankan uras kuasa lau jolu am sia am partama iyah ka paharapnya, lalu mangaruh bumi umakan urang am diam ka lalamnya manyomah lau jolu am sia partama, am luka parah jadi kona sangka. ¹³ Inya mangaruh tana ajaib am bakah, bahkan manurunkan api mula langit ka bumi, ka paharap urang. ¹⁴ Lalu, inya manyosatkan urang am diam ka bumi honi tana ajaib am kona izin ka inya honi mangaruh ka paharap lau jolo am sia am partama. Inya bapaner ka urang am diam ka bumi honi mangaruh patung lau jolu am sia am partama, am luka laie pisau, tapi totap hirup iti. ¹⁵ Inya maizinkan urang mamori hangan ka patung lau jolu am sia inyah sampai patung lau jolu am sia inyah tahu bapaner lalu mangaruhkan urang am honta manyomah patung iyah kona pati. ¹⁶ Lalu, inya mangaruhkan uras urang, koni atau bakah, kaya atau miskin, hulun atau urang mardeka, kona bori suti tana ka jari kanan atau kadahinya, ¹⁷ nyaman honta tege siku urang mun tahu mamoli atau bajual kacuali inya hompu tana iyah, iyaham nama lau jolu am sia iyah atau bilangan namanya. ¹⁸ Hal iti mambutuhkan hikmat. Biar am urang am bijaksana mahitung angka lau jolu am sia inyah laie angkanya iyah inyaham angka siku kalunen; lalu angkanya onam ratus onam puluh onam.