¹ Limah iyah, tege suti tana am bakah ka langit: siku labini bapakaian mata ari uamkan bulan ka loba kakinya umakan mahkota mula dua belas bintang ka palanya. ² Labini iyah metuh nganung umakan lalam pandaritaannya hona luas, inya basoru kasakitan. ³ Limah iyah, tege suti tana bukan ka langit: siku naga bakah bawarnamirah am bagora tujuh pala umakan sapuluh tanu umakan tujuh mahkota ka palanya. ⁴ Iku naga iyah manarik sepertiga bintang ka langit lalu manibarkannya ka bumi. Naga iyah badiri ka paharap labini am hona luas iyah nyaman netuh labini iyah jadi luas, inya tahu manolat Ananya. ⁵ Labini iyah maluaskan siku Ana kalaki, am akan mamarintah bangsa-bangsa honi tungkat bosi; tapi Ana iyah kona robut lalu kona taing ka Hatalla lalu ka paharap takhta-Nya. ⁶ Labini iyah baguang manguang padang belantara, ka homan am kona jadi sadia Hatalla akan inya nyaman koyah, inya kona pelihara saribu dua ratus onam puluh ari. ⁷ Lalu, tajadilah paperangan ka surga, Mikhael umakan para malaikatnya bakalahi malawan naga iyah. Naga iyah bakalahi basamah para malaikatnya, ⁸ tapi urang honta cukup onya sampai mayan ara mula homan urang ka surga. ⁹ Naga bakah iyah kona tibar ka loba, si ular tuha am kona joku Iblis atau setan, am manyosatkan saluruh dunia, inya kona tibar ka bumi, lalu para malaikatnya manibarkannya ka loba uma inya. ¹⁰ Lalu, aku manongar suara am nyaring ka surga bapaner, ''Wayah iti, jadi datang kasalamatan, Kuasa, , umakan Karajaan Hatalla diri, umakan kakuasaan Kristus*-Nya laie si panuduh kawan manyari diri, am manuduh urang ka paharap Hatalla siang umakan malam, jadi kona tibar ka loba. ¹¹ Urang mangalahkannya honi darah Ana Domba, lalu honi pamaner kasaksian urang; Laie urang honta sayangkan nyaw urang, bahkan metuh maharap pampati. ¹² Laie iyah, basukacitalah, ui surga umakan urangam diam ka lalamnya! Tapi, calakalah bumi umakan laut laie Iblis jadi turun ka kolai lalam pangusarnya am bakah laie inya tahu laie waktu am hompunya singkat.'' ¹³ Metuh naga iyah mailae laie inya jadi kona tibar ka bumi, inya manganiaya labini am jadi luas Ana kalaki tari. ¹⁴ Akan tapi, labini iyah badiri dua sayap burung rajawali am bakah nyaman inya tahu tarobang ka padang belantara, ka homannya, ka manih inya kona pelihara salama satu masa, dua masa, umakan satongah masa jauh mula paharap si ular. ¹⁵ Ular iyah manyamur arai am bera sungai ka arah labini iyah, honi mahayutkan si labini ka lalamnya. ¹⁶ Tapi, bumi manulung labini iyah; bumi mamuka nyawanya lalu manolan arai am kona samur maga iyah. ¹⁷ Maka, naga amat bujur gosar ka labini iyah lali badari honi mangalahi ana am bukan mula labini iyah, iyaham urang am mamelihara parintah-parintah Hatalla lalu bakalahi ka saksian Yesus. ¹⁸ Naga iyah badiri ka sisi laut.