¹ Inini, mangonaai karunia-karunia rohani, Bala samadikan, kahonaku kolai ntah mangatahuainya. ² Kolai tahu ma waktu kolai ija nyadi bala urang nya bolum mangenal Allah, kolai di sosatan ka berhala bisu, ubanya kolai dipimpin. ³ Karna inyan, aku boritahu agan kolai bahwa ntah suku pan, nya bapanir agan Roh Allah, nya bapanir, "Yesus terkutuk," dahan ntah ada siku pan nya dapat bapanir, "Yesus inyanan Tuhan," salain obai Roh Kudus. ⁴ Ada bamacam karunia rohani, tapi Rohnya sama. ⁵ Dan, ada bamacam palayatan, tapi Tuhannya sama. ⁶ Ada bamacam pakarojaan, tapi Allah nya sama nya mangarojaan sagala jolunya dalam samua urang. ⁷ Agan tiap-tiap urang nya dikaruniaan penyataan Roh akai kabaikan sasama. ⁸ Akainya siku dikonyuai kata-kata hikmat malaluai Roh dahan akainya bukai kata-kata pangatahuan agan Roh nya sama. ⁹ Akai nya bukai dikonyuai iman agan Roh nya sama, akai nya bukai lagi karunia-karunia panyembuhan agan Roh nya suti inyan. ¹⁰ Akai nya bukai dikonyuai bala pakarojaan mukjizat, akai nya bukai nubuatan. Akai nya bukai dikonyuai kamampuan akai mambedaan bala roh, akai nya bukai bamacam bahasa lidah, dahan nya bukai maartian bahasa-bahasa lidah inyan. ¹¹ Samuanya ini dikrojaan agan Roh nya satu dahan nya sama, nya mambagi ka tiap-tiap urang, uba nya Inya kahonaai. ¹² Sama uba tubuh inyanan satu, tapi ada banyak anggota tubuh, biar pan banyak, inyanan satu tubuh, uba inyan jam Kristus. ¹³ Sobab, obai roh satu, kita samua jadi dibaptis ka dalam satu tubuh, baik urang Yahudi atau pan urang Yunani, baik budak atau pan urang merdeka, dahan kita samua dikonyuai minum dari satu Roh. ¹⁴ Karna tubuh ntah terdiri dari satu anggota, tapi banyak anggota. ¹⁵ Amun kaki bapanir, "Obai aku bukainya tangan, jadi aku bukainya bagian dari tubuh," tidak baarti inya ntah bagian tubuh. ¹⁶ Dahan, amun poning bapanir, aku bukainya anggota tubuh," tidak baarti inya ntah nya bagian tubuh. ¹⁷ Amun saluruh tubuh inyanan mata, di muna bi pandingaan? Amun saluruh nya inyanan poning, di muna bi panciupan? ¹⁸ Tapi, inini Allah manompatan bala anggota inyan, satiap urang dari sia, di dalam tubuh, ubanya Inya kahonaai. ¹⁹ Amun samuanya inyanan satu anggota, di muna bi tubuh? ²⁰ Jadi, memang ada banyak anggota, tapi baya satu tubuh ma. ²¹ Sobab inyan, mata ntah ulih bapanir ka tangan, "Aku ntah mamerluan kolai!" Atau lagi, kapala ka ka kaki, "Aku ntah mamerluan kolai!" ²² Sabaliknya, bala anggota tubuh nya ulahnya lobih lomah sabonarnya maha diperluan. ²³ Dahan, bala anggota tubuh nya kita pikir kurang tahormat, justru konyuai tam penghormatan lobih. Dahan, bala anggota tubuh, nya kita angap kurang pantas tampil, harus dijawat akai lobih pantas tampil, ²⁴ Obai bala bagian nya jadi pantas tampil ntah mamerluannya. Tapi, Allah jadi maatur tubuh inyan agan mangonyu penghormatan lobih bosar ka bala anggota nya kakurakan, ²⁵ Akai ntah ada pocah bolah dalam tubuh, tapi supaya bala anggota tubuh inyan dapat mamperhatian suti agan nya bukai. ²⁶ Amun satu anggota mandarita, samua anggota sasama mandarita jam. Amun, satu anggota dimuliaan, samua anggota sasama bersukscita jam. ²⁷ Inini kolai nan tubuh Kristus dahan kolai masing-masing nan bala anggotanya. ²⁸ Allah jadi manotapan dalam jemaat, pertama nan para rasul, nya kadua para nabi, nya katiga para guru, jadi inyan bala mukjizat, bala karunia panyembuhan, pertolongan, kapamimpinan, dahan bamacam-macam bahasa. ²⁹ Apa samuanya rasul? Apa samuanya nabi? Apa samuanya guru? Apa samua inyanan panjawat mukjizat? ³⁰ Apa samuanya ada karunia panyembuhan? Apa samuanya bapanir agan bahasa-bahasa? Apa samuanya maartian? ³¹ Tapi, kahonaai tam bonar-bonar bala karunia nya paling bosar. Dahan, pacaan manunyuan jalan ka kolai nya jauh lobih baik.