¹ Jadi tam bala urang nya manurutai taladanku, uba aku nya bataladan agan Yesus nan. Tana kakuasaan ² inini, aku mamuji kolai obai kolai maingat aku dalam sagala jolu dahan mamigap bala adat uba nya kusampaian ka kolai. ³ Tapi, kahonaku kolai mangerti bhwa satiap lalaki inyanan Kristus, kapala batina nan lalaki, dahan kapala Kristus nan Allah. ⁴ Satiap lalaki nya ba doa dahan banubuat agan kapala nya batutup ntah mahormatai kapalanya. ⁵ Tapi, satiap batina nya badoa dahan banubuat agan kapala nya ntah batutup, mahina kapalanya, jolu ini sama uba amun kapalanya dicukur. ⁶ Sobab, amun siku batina ntah manutup kapalanya, kahonanya inya pan manotak ramutnya jam. Tapi, amun sakiranya mamaluan bagi sia batina mantok ramut atau mancukur kapalanya, kahonanya inya manutupai kapalanya. ⁷ Lalaki ntah ulih manutupai kapalanya obai inyanan gambaran dahan kamuliaan Allah. Tapi, batina inyanan kamuliaan lalaki. ⁸ Lalaki ntal baasal dari batina, tapi batina baasal dari lalaki. ⁹ Dahan, lalaki ntah diciptaan akai batina, tapi batina akai lalaki. ¹⁰ Inyan am sobabnya, batina harus ada tana kakuasaan di kapalanya obai para malaikat. ¹¹ Biarpan uba inyan, dalam Tuhan, tidak ada batina amun ntah ada lalaki, atau lalaki amun ntah ada batina. ¹² Sobab, batina baasal dari lalaki, uba inyan jam lalaki lahir malaluai batina. Dahan, sagala jolu baasal dari Allah. ¹³ Pertimakan tam siku, pantas ntah amun batina akai badoa ka Allah agan kapala ntah batutup? ¹⁴ Tapi pan alam siku ma nya mangajaran ka kolai bahwa lalaki baramut panjang, jolu inyan maruaan kahianaan bagi inya ma? ¹⁵ Tapi, amun batina baramut panyang, jolu inyanan kamuliaan baginya: Sobab, ramut inyan dikonyu ka inya sabagai panutup. ¹⁶ Amun ada urang nya hona mambantah, kami ntah ada kabiasaan inyan, uba inyan jam jemaat Tuhan. ¹⁷ Dalam mangonyu printah ini, aku ntah mamuji kolai obai kolai bakumpul bilanya akai lobih baik tapi akai jolu nya lobih buruk. ¹⁸ Pertama, waktu kolai bakumpul sabagai jemaat, aku mandinga kalau ada pocah bolah di antara kolai. Dahan, aku sadikit mempercayaainya. ¹⁹ Sobab, ada pocah bolah di antara kolai akai sia nya tabukti tahan uji manyadi jelas di antara kolai. ²⁰ Waktu kolai bakumpul di tompat nya sama, jolu inyan bilanya akai makan perjamuan Tuhan. ²¹ Obai waktu Tuhan makan, satiap urang lobih holu manguti makatan akainya siku sampai ada nya kalaparan dahan adanya mabuk. ²² Apa kolai nan ntah ada rumah akai makan minum? Atau, apa kolai nan mahina jemaat Allah dahan mampermaluan sia nya ntah ada apa-apa nan? Apa lagi nya harus aku kataan ka kolai ni? Harus bi aku mamuji kolai ni? Pasti nya antah! ²³ Obai, aku manarimanya dari Tuhan apa nya aku sorahan ka kolai nan, bahwa Tuhan Yesus, di malam waktu Inya di hianatai, manguti roti, ²⁴ dahan jadi maucap syukur, Inya mamocaha-mocahannya dahan bapanir, "iniam tubuhKu, nyaam akai kolai; labuhan tam manyadi paringatan agan Aku." ²⁵ Uba inyan jam, Inya manguti cangkir jadi makan lalu Inya bapanir, "Cangkir ini ni perjanjian baharu nya dalam darahKu. Labuhan tam ini, satiap kali kolai maminumnya, manyadi panringatan agan Aku." ²⁶ Sobab, satiap kali kolai makan roti ini dahan minum cangkir ini, kolai mambritaan kamatian Tuhan sampai Inya datang nona. ²⁷ Karna inyan, sopa nya makan roti atau minum cangkir Tuhan agan cara nya ntah pantas, inya basalah agan tubuh dahan darah Tuhan. ²⁸ Mansia harus mauji dirinya siku, agan uba inyan kahonanya inya makan roti dahan minum dari cangkir agan ntah mangakuai tubuh Tuhan, inya manatakan hukupan akai dirinya siku. ³⁰ Inyanam sobabnya, maapa banyak di antara kolai nya lomah dahan sakit, bahkan cukup banyak jam nya mati. ³¹ Tapi, amun kita manilai diri kita siku agan bonar, kita ntah dihukum ma. ³² Tapi, waktu kita dihukum, kita dididik Tuhan akai kita ntah dihukum sasama agan dunia. ³³ Jadi, bala samadikanku, waktu kolai bakumpul akai makan, sasama mananti tam. ³⁴ Amun ada urang nya kalaparan, biaram inya makan holu ka rumahnya akai jangan supaya bakumpul akai penghakipan. Dahan, bala jolu bukai pacaan aku atur pas aku datang.