¹ Sobab, kahonaku kolai tidak mangatahuainya, Bala samadikan, bahwa para upuy hiang kita holu tai, samuanya ada di babah awan dahan malaluai laut. ² Sia samua di baptis dalam Musa, di dalam awan dahan di dalam laut. ³ Sia samua makan makatan rohani nya sama, ⁴ dahan samuanya minum minuman rohani nya sama. Sobab, sis minum dari batu rohani nya jumpat sasama agan sia, dahan batu inyan inyaam Kristus. ⁵ Biarpan uba inyan, Allah tidak berkenan agan sabagian bosar dari sia. Obai inyan, sia dibunuh di tongah hutan. ⁶ Inini, bala jolu ini dijadian contoh akai kita supaya kita tidak manyadi urang nya bakahona jahai ubanya sia kahonaai. ⁷ Jangan nyadi panyomah berhala uba adanya nan, uba nya tatulis, "Bangsa inyan duduk akai makan dahan minum, lalu angkat dahan bamain," ⁸ Jangan kita malabuhan perzinahan uba nya dilabuhan adanya nan sampai 23 ribu mati dalam saari. ⁹ Kita pan ntah ulih mancubaai Tuhan, ubanya nya sia labuhan adanya nan mancubaai dahan dibanasaan agan bala ular. ¹⁰ Dahan jangan am basungut-sungut obai siaan nya basungut-sungut nan di banasaan malaikat maut. ¹¹ Bala jolu ini malabuhai sia sabagai contoh dahan ditulisan sabagai paringatan akai kita, ka sopa akhir zaman nya datang nan. ¹² Karna inyan, biaram urang nya manyangka kalau dirinya badiri togap siap akai inya ntah jatu! ¹³ Ntah ada pencobaan nya kala malabuhai kolai kacuali pencobaan nya biasa akai mansia. Dahan, Allah nan setia, Inya tidak akan mambiaran kolai dicubaai malobihai kamampuan kolai. Tapi, sasama agan pencobaan inyan, Inya pacaan manyadiaan jalan kaluar akai kolai dapat manangungnya. ¹⁴ Karna inyan, bala samadikanku nya terkasih, palaukan tam diri kolai dari panyomahan berhala. ¹⁵ Aku bapanir uba agan bala urang nya bijaksana, pertimakan tam apa nya kukataan nan. ¹⁶ Mongka cangkir berkat nya kita syukurai inyan nam persekutuan dalam darah Kristus? Dahan, mongka roti nya kita pocahan inyan inyaam persekutuan dalam tubuh Kristus? ¹⁷ Karna ada sabuti roti, maka kita nya banyak inini inyaam satu tubuh; obai kita samua nyadi bagian dari sabuti roti inyan tai. ¹⁸ Perhatian tam bala urang Israel, mongka sia nya makan persembahan manguti bagian dalam altar? ¹⁹ Jadi, apa maksudku? apa makatan nya dipersembahan akai berhala inyanan jajolu? atau, apa berhala inyanan jajolu? ²⁰ Tidak. Aku mangataan ka kolai bahwa bala jolu nya bala bangsa bukai kurbanan, sia mangurbanannya akai bala roh jahai, bukainya pakai Allah. Dahan, aku tidak hona kolai basakutu agan bala roh jahai. ²¹ Kolai ntah ulih minum cangkir Tuhan dahan cangkir bala roh jahai. Kolai ntah ulih jadi bagian dari jamuan Tuhan dahan jamuan bala roh jahai. ²² Atau, apa kita ni marangsang kacamuruan Tuhan? Apa kita ni lobih kuat dari Inya? ²³ "Sagala jolu diizitan ma," tapi ntah samuanya baguna. "Sagala jolu diizitan ma," tapi ntah samuanya mambangun. ²⁴ Jangan ada siku pan nya mangoyap kabaikan akai diri siku, tapi akai kabaikan urang bukai. ²⁵ Makan tam apa pan nya dijual di pasar daging dahan ntah ija mamariksainya, demi hati nurani. ²⁶ Obai, bumi agan samua isinya ni umpu Tuhan. ²⁷ Amun ada urang nya bolum percaya maundang kolai dahan kolai hona datang, makan ja apa pan nya disadiaan di hadapan kolai nan dahan jangan ija di priksa, demi hati nurani. ²⁸ Tapi, amun nta ada urang bapanir ka kolai, "Mkayan ini jadi persembahan k aberhala," jngan kolai makan, demi urang nya mamboritahu kolai tai dahan demi hati nurani. ²⁹ Maksudku, bukainya baya demi hati nurani kolai siku, tapi hati nurani urang bukai jam. Maapa kabebasanku ditontuan agan hati nurani urang bukai? ³⁰ Amun aku manguti bagianku agan ucapan syukur, maapa aku disalahan obai makatan dahan pan akainya aku maucap syukur? ³¹ Jadi,antah kolai makan atau minum pan, atau apa pan nya kolai labuhan, labuhan tam samua inyan akai kamuliaan Allah. ³² Jangan manjawat urang tersandung, baik urang Yahudi, urang Yunani, atau pan jemaat Allah, ³³ Uba aku pan dalam sagal hal manyonangan samua urang, agan ntah mangoyap kauntukanku siku, tapi kauntukan akai urang banyak akai sia dapat disalamatan.