¹ Akuni kan urang bebas? Akuni kan rasul? Akuni kan jadi maniat Yesus am, Tuhan kita nan? Kolaini kan inyanam hasil pakarojaanku dalam Tuhan? ² Amun bagi urang bukai akuni bukainya rasul, tapi paling ntah akuni rasul akai kolai. Sobab, kolai nam segel karasulanku dalam Tuhan. ³ Iniam pambelaanku agan sia nya mamariksa aku. ⁴ Apa kamini ntah ada hak akai makan dahan minum? ⁵ Apa kamini ntah ada hak akai mambaba siku bini nya saiman, sama uba bala rasul nya bukai, bala samadikan Tuhan, dahan Kefas pan? ⁶ Atau, baya Barnabas ma dahan aku nya ntah ada hak akai ntah bakroja nan. ⁷ Sopa pani nya kala mangabdi sabagai tantara makai biaya siku nan? Sopa pani ny mananamai kobun angur dahan ntah mamakan buahnya? Atau, sopa pani nya mangambalaan inguan dahan nyah maminum susunya? ⁸ Apa akuni mangataan jolu ini manurut mansia? Mongka Hukum Taurat pan mangataan bala jolu nya sama jam? ⁹ Sobab, ada tatulis dalam Hukum Taurat Musa, "Jangan kolai mambarangus lembu nya tongahan mairik ganum!" Apa lembu bi nya tongahan Allah perhatian nan? ¹⁰ Atau, apa Inya mangataannya demi kita? Au, demi kita nam jolu in yan ditulis nan obai nya mambajak harus mambajak dalam pengharapan akai mandapatan bagiannya. ¹¹ Amun kami manabur umpan rohani di antara kolai, apa balobihan bi amun aku pan mamanen bala jolu materi dari kolai? ¹² Amun urang bukai ba hak uba inyan agan kolai, apa lagi kami lobih nyam? Biarpan uba inyan, kami ntah malabuhan hak kami inyan. Sabaliknya, kami manangung sagala jolu akai ntah manjawat halakan bagi Injil Kristus. ¹³ Apa kolai an ntah tahu bahwa sia nya mangarojaan bala jolu nya kudus inyan, makan makatan dari Bait Allah jam? dahan, si nya malayatai di altar bandapat bagian dari kurban persembahan inyan jam? ¹⁴ Uba inyan jam, Tuhan mamarintahan sia nya mambritaan Injil akai hidup dari Injil jam. ¹⁵ Tapi, aku ntah kala mamakai sabuti pan dari hak-hak ini. Dahan, aku ntah manulisan bala jolu uba ini akai dilabuhan ka aku. Sobab, lobih baik aku mati daripada siku urang maantahan kabanggaanku. ¹⁶ Obai, amun aku mambritaan Injil, aku ntah ada alasan akai bamegah obai kawajiban inyan ada di aku. Calaka am aku, amun aku ntah mambritaan Injil nan. ¹⁷ Kalau aku mambritaan Injil obai kahonakku siku, Aku dapat upah. Tapi, kalu ini bilanya kahonakku, iniam tugas nya dipercayaan agan aku. ¹⁸ Kalau uba inyan, apa am upahku? Upahku inyaam waktu aku mambritaan Injil, aku suba mambritaan Injil ntah baupah dahan ntah manyalahgunaan hakku dalam Injil. ¹⁹ Tapi, biar pan aku bebas agan samua urang, aku manyadian diriku siku hamba akai samua urang akai aku suba mamonangan lobih banyak lagi. ²⁰ Akai urang Yahudi, aku manyadi uba urang Yahudi. Akai urang nya hidup di babah Hukum Taurat, aku manyadi uba urang nya hidup di babah Hukum Taurat [biar pan aku siku tidak di babah Hukum Taurat] akai aku dapat mamonangan sia nya ada di babah Hukum Taurat. ²¹ Akai sia nya tidak mamakai Hukum Taurat, aku manyadi uba nya tidak mamakai Hukum Taurat jam [bukainya tidak mamakai hukum Allah, tapi di babah hukum Kristus] akai aku dapat mamonangan sia nya tidah mamakai Hukum Taurat. ²² Akai urang nya lomah, aku manyadi lomah akai aku dapat mamonangan sia nya lomah. Aku jadi nyadi sagala jolu akai samua urang supaya agan sagala cara aku dapat manyalamatan babaropa urang. ²³ Aku malabuhan samua ini demi Injil akai aku mandapat bagian di dalamnya ²⁴ Ntah kolai tahu bi bahwa sia nya balari dalam sabuah pertandingan samuanya balari, tapi baya siku ma nya manarima hadiah? jadi, balari tam uba apa pan akai kolai mandapatannya! ²⁵ Satiap urang nya bataning balatih manguasaai diri dalam sagala jolu. Sia malabuhannya akai manarima mahkota nya fana, tapi kita akai mandapatan nya abadi.v 26Sobab inyan, aku tidak balari uba inyan ntah ada tujuan. Aku tidah maninyu uba urang maninyu angin. ²⁷ Tapi, aku malatih tubuh maha koras dahan manguasaainya akai pas aku mambritaan Injil akai urang bukai, aku siku ntah ditulak.