¹ Rama yak tampil me Yohanes pemanik de padang pasir Yudea, jekuh ya: ² "Betubat me, empadai kerajaan Surga udah damping!" ³ ya tuk me te depadah Nabi Yesaya rama banai: "bisik urang te bingan de padang pasir: Siap ke jalai ngau Tuhan, gitik ke jalai ngau-Ya." ⁴ Yohanes mengau jubah bulu unta ngau ketang pungung kulit, pemakai ya buntak ngau madu rimak. ⁵ Kebak datai me ngau ya urang ari Yerusalem, Yudea, ngau sekamat Yordan. ⁶ Udek samil ngakuk dosa, sidak depanik Yohanes de sungai Yordan. ⁷ Tapi rama ya medak mayuh urang Farisi ngau Saduki datai kiyak kak debaptis, banai me ya ngau sidak, "Ui kitak kenturun ular beludak, sapa te madah ngau kitak kalau kitak agkil belaban ke dirik ari celaka te kak datai? ⁸ Jadi, asil ke buah te sempulik ngau pertobatan. ⁹ Nanglah ngira kalau kitak tau banai alam ati: Abraham yak apai kami! Kumadah kitak: Allah tau mulah bala batu tuk jadi anak-ya. ¹⁰ Kapak udah bisik siap de akar pun kayu, pun kayu te ndai ngasil ke buah te baik, pesti detebang, ngau debuai kalam api. ¹¹ Aku bemanik kitak ngau aik, kecelik ari pertobatan, tapi Ya te datai seudah aku, lebih bekuasa re aku, ngelecut ke sanal-Ya, aku ndai layak. Ya bakal bemanik kitak ngau Roh Kudus ngau api. ¹² Capan bisik de jari ya. Ya mersih ke tempat pengiling, ngau ngumpul ke genum kalam lupung, tapi sekuk yak detunu Ya kalam api te ndai angkil padam. ¹³ Datai me Yesus ari Galilea ke Yordan ngau Yohanes untuk depanik. ¹⁴ Tapi Yohanes nagang Ia, jekuh ya: "Aku tuk te tau depanik Mih, Mungkak mih te kak datai ngau aku? ¹⁵ Udek Yesus nyaut, jekuh Ya: Isak me hal tuk lalu, empadai piyak me sepatutnya kita ngenap ke semua kedekak Allah, udek Yohanes nunak te jekuh-Ya. ¹⁶ Seudah depanik, Yesus lansung keluar re aik, rama yak ugak langit tebukak, ngau ya medak Roh Allah upa burung Merpati turun katau-Ya, ¹⁷ Udek tedinga me ingan ari surga te madah: "Tuk me Anak-Ku te Kukasih, ngau Ya tuk me aku bekenan.