¹ pitok bala urang Majus nyembah Yesus, se udah ya adai de Betlehem, de Yudea, rama Raja Herodes, pedak ke, bala urang Majus ari timur datai ke Yerusalem. ² Sidak nanyak, " Dini Ya te baruk adai? Raja sidak Yahudi? empadai kami udah medak bintang-Ya de timur, kami datai kak nyemah Ya." ³ Rama Raja Herodes ninga yak, tekejut me ya ngau pamar sidak de Yerusalem. ⁴ udek, dekumpul ke ya semua bala imam kepala ngau ahli Taurat bansa Yahudi, udah yak ya minta penyelas ari sidak, dini Ya kak adai. ⁵ Jekuh sidak ngau ya: "De Betlehem de tanah Yudea, empadai upa yak mek te udah detulis alam kitab nabi. ⁶ 'Ngau kitak Betlehem tanah Yehuda, kitak tuk bah matang bukai te palin senik de'ntara sidak te merintah Yehuda, ari kitak bakal bisik surang pemimpin te tau mimpin umatKu Israel. '" Mikha 5:2 ⁷ Udah yak, Herodes belamun ngumai bala urang Majus, udek ya nanyak buti-buti ngau sidak, sebila bintang yak tepedak. ⁸ Udek ya nyuruh sidak ke Betlehem, jekuh ya: "Angkat kin! ci'k buti-buti gisah nemiak yak, antik kitak udah nemu nemiak yak, ngusung madah aku, isak aku tau datai nyemah Ia. ⁹ Udah ninga jekuh Raja, angkat me sidak. Pedak em, bintang te depedak sidak de timur ngiring sampai sidak datai, udek betegak pas datau pengalai Nemiak. ¹⁰ Rama sidak medak bintang yak, matang gaga ndai sik sangak. ¹¹ Udek tamak me sidak kalam langkau yak, medak Nemiak yak ntang Maria, inai-Ya, udek nyemah nyujud Ya. Sidak mukak badah bala reta ben'a, udek merik ke yak ngau Ya, bala mas, kemenyan ngau mur. ¹² Empadai sidak dah desait alam mimpi ndai sagi bekalih ngau Herodes, pulai mek sidak ke menua asal ngelalu jalai bukai. ¹³ Udah bala Majus yak angkat, malaikat Tuhan mansut ke direk alam mimpi Yusuf, madah: "Was mih! amik sedua menyanak, bai'k rari ke Mesir, nugau na din, sampai Aku befirman ngau mih, empadai Herodes ngegak nemia'k Yak lalu kak debunuh." ¹⁴ Teruas me Yusuf lansung angkat ngamik sedua menyanak malam yak ugak, lalu belabuk ke Mesir, ¹⁵ nugau din sampai Herodes luput. Semua tuk tau piyak, ngau ngenap ke ute dah de firman ke Tuhan ngelalu nabi: "Ari Mesir Ku kumai Anak-Ku." ¹⁶ Rama herodes ketau ke direk dekemulak bala urang majus, luat bebenar ya. Udek ya nyuruh munuh semua nemiak de sekamat Betlehem, nemiak te berumur debabah dua taun, sama ngau waktu te deketau ya ari bala urang majus. ¹⁷ Genap me firman te depadah ke nabi Yeremia: ¹⁸ "Kedinga me ingan de Rama, sabak seru sidak, Rahel nyabak ke anak-anak ya, ngai delimpau, empadai sidak dah ndai sik agik." ¹⁹ Udah Herodes mati, malaikat Tuhan mansut kedirek alam mimpi Yusuf de Mesir, Jekuh ya: ²⁰ "Teruas me! ba'ik sedua menyanak angkat ke tanah Israel, empadai sidak te kak munuh nemiak yak dah mati." ²¹ Udek Yusuf teruas, deba'ik ya sedua menyanak angkat ke tanah Israel. ²² Tapi rama dedinga ya, Arkhelaus nyadi raja de Yudea nganti Herodes apak ya, Yusuf takut kin. Empadai dah denasehat alam mimpi, aangkat me Yusuf ke Galilea. ²³ Sepenatai din, ya pun nugau de kota te dekumai Nazaret. Semua yak isak ke genap firman te depadah bala nabi, Ya bakal detelah: Urang Nazaret.