¹ Yesus deba'ik Roh ke padang pasir untuk duji sitan. ² Udah ndai makai ngempak empat puluh ari empat puluh malam, kejade lapar me Yesus. ³ udek, datai me te nguji yak, banai ngau-Ya: "Antik Mih Anak Allah, suruh isak bala batu tuk jadi ruti." ⁴ Saut Yesus: ⁵ Udek, Sitan ngemaik-Ya kuta suci, naruh Ya de bumung Bait Allah, ⁶ udek banai ngau Ya, "Antik mih anak Allah, nyatuk ke dirik ke babah kin, empadai bisik detulis: Tekenak ke Mih, Ya bakal merintah ke bala malaikat Ya ngau sidak bakal nadah ke Mih datau jari sidak, isak ke kaki Mih ndai tesentuk ke batu." ⁷ Yesus nyaut, " Bisik detulis, nang kitak nguji Tuhan Allah kitak!" ⁸ Sitan ngemaik Ya ugak katau bukit te palin tingik ngau nunyuk ke ngau Ya semua kerajaan ngau bala kemegah 'e, ⁹ ngau banai ngau Ya: "Semua yak kuberik ngau Mih, antik Mih sujud nyemah aku." ¹⁰ Maka banai me Yesus ngau ya: "Tungkal kau sitan! bisik detulis, 'Kitak kalah nyemah Tuhan Allah kitak, cuma ngau Ya na mek kitak tau bebakti!" ¹¹ Udek Sitan nulak ke Ya, pedak ke, malaikat-malaikat datai ngelayan Yesus. ¹² Tapi rama Yesus Ninga kalau Yohanes udah detangkap, Ya angkat ke Gaalilea. ¹³ Ya nudi ke Nazaret, ngau nugau de Kapernaum, de tepi lepung, daerah Zebulon ngau Naftali, ¹⁴ Isak ke genap firman te depadah Nabi Yesaya: ¹⁵ "Tanah Zebulon ngau tanah Naftali, jalai ke laut, daerah seberang Yordan, Galilea, wilayah bansa-bansa bukai, ¹⁶ Bansa te nugau alam keleman udah medak terang te besai, ngau bagi sidak te nugau ne negeri te dekelinuk maut, udah terbit terang." ¹⁷ Mulai re yak me Yesus merik ke berita, "Betubat ke, empadai kerajaan Surga udah damping!" ¹⁸ Rama Yesus ketengah bejalai mansak lepung Galilea, Ya medak dua urang menyadik, Simon te dejenang Petrus, ngau Andreas menyadik ya. Sedua ketengah nyempalung jala de lepung, empadai sedua penyala ikan. ¹⁹ Yesus banai ngau sidak: "Buh tamai aku, ngau kitak bakal ku jadi ke penyala mensia." ²⁰ Udek sedua lansung nudi ke jala, lalu namai Ya. ²¹ Udah Yesus angkat rin, depedak Ya ugak sedua menyadik, Yakobus sedua Yohanes tamai apai sedua Zebedeus mersih jala alam perau. Yesus ngumai sidak, ²² Sedua lansung nudi ke perau ngau apai, lalu tamai Ya. ²³ Yesus bekelingik de sekamat Galilea; Ya ngajar derumah-rumah ibadat ngau begisah ke Injil kerajaan Allah, nyemuh ke bala pemedih dentara bansa yak. ²⁴ Nyak me nyuruh tesiar kisah tentang Ya de sekamat Siria, debaik ke ngau Ya bala urang te nguman pedih, te kesarung, gila babi, lumpuh, udek Yesus nyemuh ke sidak. ²⁵ Nyak me nyuruh mayuh urang begerumung namai Ya. Sidak datai ari Galilea, ngau ari Dekapolis, ari Yerusalem ngau ari Yudea, ngau ari seberang Yordan.