Yesus deserah ke ngau Pilatus Pemati Yudas ¹ Ari dah kak tengari, semua imam kepalak ngau tuai-tuai bansa Yahudi bekumpul ngamik keputus kak munuh Yesus. Sidak ngetang Ya, ngemaik lalu nyerah ke Ya ngau Pilatus, wali negeri yak. ^{2 3} Rama Yudas medak Yesus dejatuk ukum mati, ya nyesal. Udek ya mulai ke duit tiga puluh pirak ngau bala imam kepalak ngau bala tuai, ⁴ jekuh ya: "Aku udah bedusa, dah nyerah ke darah urang te ndai sik salah." Tapi saut sidak: "Nama urus yak ngau kami, yak urusan mih." ⁵ Udek ya nyempalung ke duit pirak yak ke Bait Suci, udek angkat riyak ngantung dirik. ⁶ Bala Imam Kepalak ngamik duit pirak yak lalu banai: "Ndai tau namak ke duit tuk kalam peti persembahan, empadai tuk duit darah." ⁷ Udah bepekat, sidak meli tanah ngau duit yak, tanah te dejenang Tukang Sampau kak depulah ke kubur urang penatai. ⁸ Yak mek nyuruh sampai ari tuk tanah diyak dejenang tanah darah. ⁹ Ngau upa yak, genap firman te depadah nabi Yeremia: "sidak nerimak tiga puluh duit pirak, rega te detentu untuk surang menurut penilaian te belaku dentara urang Israel, ¹⁰ udek sidak merik ke duit yak ngau tukang sampau, upa te depesan Tuhan ngau aku." ¹¹ Udek Yesus dadap ke ngau wali negeri. Wali negeri betanyak ngau Ya: "Dirik kah raja urang Yahudi?" Saut Yesus: "Nuan dah madah miak." ¹² Tapi bala sangkak te daju ke bala imam kepalak ngau tuai-tuai teradap Ya, ndai sik Ya nyaut murung ke sigik. ¹³ Jekuh Pilatus ngau Ya: "Dirik ndai ninga mayuh nar sangkak sidak ngau Mih?" ¹⁴ Tapi Ya saja ndai sik nyaut, sampai iran wali negeri yak. ¹⁵ Dah jadi kejama bagi wali negeri ngelepas ke surang te dukum rama ari raya sesuai ngau ketuju urang mayuh. ¹⁶ Rama yak bisik alam penyara te palin tekenal ngau pengenyaik te benama Yesus Barabas. ¹⁷ Empadai sidak dah bekumpul din, Pilatus betanyak ngau sidak: "Kitak kak aku ngelepas ke sapa, Yesus Barabas atau Yesus te detelah Kristus?" ¹⁸ Ya mimang ketau, kalau sidak nyerah ke Yesus empadai dengki. ¹⁹ Ketengah Pilatus duduk de bangku pengadilan, bina ya ngirim pesan ngau ya: "Nang dirik campur tangan urusan urang benar yak, empadai Ya aku semalam matang sisa alam mimpi." ²⁰ Tapi empadai asut bala imam ngau tuai-tuai, urang mayuh betikat isak Barabas delepas, ngau Yesus dukum mati. ²¹ Wali negeri nyaut, lalu banai ngau sidak: "Sapa dentara sedua te kedekak kitak lepas?" Saut sidak: "Barabas." ²² jekuh Pilatus ngau sidak: "Antik piyak nama te kalah kupulah ngau Yesus te detelah Kristus yak?" Seru sidak: "Ya kalah desalib!" ²³ Jekuh ya: "Tapi kesalah nama te depulah Ya?" Tapi sidak makin kayah bingan: "Ya kalah desalib!" ²⁴ Pilatus medak bala usaha sia-sia, malah timul kacau, ya ngamik aik, lalu masuk jari dedepan sidak mayuh, samil banai: "Aku ndai besalah teradap darah mensia tuk, yak urusan kitak!" ²⁵ Semua rayat nyaut: "Isak darah Ya detangung kami ngau bala anak kami!" ²⁶ Udek ya ngelepas Barabas bagi sidak, Yesus desisa lalu deserah ke untuk desalib. ²⁷ Udek bala serdadu wali negeri ngemaik Yesus ke ruang pengadilan, lalu ngumai semua pasukan bekumpul ngelingik Yesus. ²⁸ Sidak ngelecut pengau Ya, udek nyaruk ke jubah ungu ngau Ya. ²⁹ Sidak nganyam mahkota re durik, naruh yak atau kepalak Yesus, udek merik Ya sebatang buluh de jari kanan Ya. ³⁰ Sidak ngeludah Ya, lalu ngamik buluh dejari Ya, depaluk ke kepalak Ya. ³¹ Udah sidak nguluk-uluk Ya, sidak ngelecut ke jubah yak re Ya, udek pengau Ya desaruk ke ngau Ya agik. Udek sidak ngemaik Ya keluar kak desalib. ³² Rama sidak ketengah bejalai ke luar kuta, sidak betemu ngau Simon urang Kirene. Urang yak depaksa sidak suruh nangkun salib Yesus. ³³ Udek sidak datai ke tempat te benama Golgota, rete e: tempat tengkorak. ³⁴ Udek sidak merik ya minum anggur becampur lempedu. Dah dasai Ya, ndai kak Ya minum. ³⁵ Udah sidak nyalib ke Ya, pengau Ya debagi-bagi ngau cabut un'i. ³⁶ Udek sidak duduk diyak nunguk Ya. ³⁷ Datau kepalak Ya tepasang tulisan te nyebut ngapa Ya dukum: "Tuk mek raja urang Yahudi." ³⁸ Tamai Ya, desalib ke ugak dua urang penyamun, surang desepiak kibak, surang desepiak kanan. ³⁹ Bala urang te ngelalu yak ngujat Ya samil ngilik ke kepalak, ⁴⁰ jekuh sidak: "Ui Mih te kak ngerubuh ke Bait Suci ngau mampu niri kagik alam tiga ari, selamat ke dirik lau, antik Mih anak Allah, turun re salib yak!" ⁴¹ ugak bala imam kepalak, ahli Taurat, ngau tuai-tuai nguluk-uluk Ya samil banai: ⁴² "Urang bukai deselamat ke Ya, tapi ndai numut Ya nyelamat ke direk! Ya raja Israel? Baik Ya turun re salib yak, kami bakal pecayak. ⁴³ Ya ngarap ngau Allah: Isak Allah nyelamat ke Ya, Antik Allah ngenak ngau Ya! Empadai Ya udah banai: "Aku anak Allah." ⁴⁴ Sampai penyamun te desalib minik Ya, nganuk Ya miak ugak. ⁴⁵ Mulai re jam duabelas, keleman kajit seluruh daerah yak sampai jam tiga. ⁴⁶ Kira-kira jam tiga, Yesus mangkas: "Eli, Eli, lama sabakhtani?" te berete: AllahKu, AllahKu, nama Nuan nudi ke Aku? ⁴⁷ Ninga Ya miak, dekira sidak Ya ngumai Elia. ⁴⁸ Bisik surang re sidak datai; ya ngamik bunga karang, decukup ya kalam anggur masam, decucuk ya ke buluh, lalu merik Yesus minum. ⁴⁹ Tapi sidak te bukai banai: "Nang, baik kita pedak, Elia datai nulung Ya ndai." ⁵⁰ Yesus mangkas agik lalu nyerah ke nyawa Ya. ⁵¹ Pedak, tabir Bait Suci tebelah dua re atau sampai ke babah, udek gempa bumi, bukit-bukit batu tebelah, ⁵² ngau bala kubur tebukak, urang kudus te udah mati bangkit. ⁵³ Udah Yesus bangkit, sidak keluar re kubur, lalu tamak kalam kuta kudus ngau nampak kedirik ngau urang mayuh. ⁵⁴ Kepalak pasukan ngau prajurit te nyaga Yesus jadi takut nar, rama sidak medak gempa bumi ngau nama te udah tejadi, lalu banai: "Matang benar, Ya tuk anak Allah." ⁵⁵ Bisik diyak bala inuk te medak re jauh, bala inuk te nurut Yesus re Galilea untuk ngelayan Ya. ⁵⁶ Dentara sidak bisik Maria Magdalena, Maria inai Yakobus, Yusuf, ngau inai bala anak Zebedeus. ⁵⁷ Dah kak malam, datai kiyak Yusuf, urang kaya re Arimatea, udah jadi murid Yesus ugak. ⁵⁸ Ya angkat ngadap Pilatus ngau mintak mayat Yesus. Pilatus merintah merik ke mayat ngau ya. ⁵⁹ Yusuf ngamik mayat yak, malut Ya ngau kain lenan te putih bersih, ⁶⁰ udek ngalai ke Ya alam kubur te baru, te dekali ya de bukit batu, dah deguling ke ya batu besai ke lawang kubur yak, ya angkat. ⁶¹ Tapi Maria magdalena ngau Maria te bukai, duduk demua lawang kubur. ⁶² Ari sutek, udah ari siap-siap, datai bala imam kepalak ngau urang Farisi bereta ngadap Pilatus, ⁶³ sidak banai: "Tuan, kami ingat, penyesat yak rama agik idup madah: Udah tiga ari, Aku bakal bangkit. ⁶⁴ Maka perintah ke isak kubur yak dejaga sampai ari ketiga; antik ndai, bala murid tau kiak encuri mayat Ya, lalu madah ngau bala urang: Ya udah bangkit dentara urang mati, sehinga penyesatan te kebadok akibat e lebih jaik re te peruba." ⁶⁵ Jekuh Pilatus ngau sidak: "Tuk penyaga-penyaga untuk kitak, angkat, jaga kubur yak baik-baik." ⁶⁶ Udek sidak detulung bala penyaga angkat, memeterai ke kubur ngau nyaga yak.