Pemangkit Yesus ¹ Udah ari Sabat ngelalu, mata panas baruk kak tumuh de ari peruba mingu yak, Maria Magdalena ngau Maria te bukai, angkat jenguk kubur yak. ² Mungkak gempa bumi besai, empadai malaikat Tuhan turun re langit, datai, lalu nguling ke batu, udek duduk datau yak. ³ Mua ya upa kilat, pengau ya putih upa salju. ⁴ Penyaga-penyaga diyak takut nar sampai upa urang mati. ⁵ Tapi malaikat banai ngau bala inuk diyak: "Nang kitak takut; aku ketau kitak ngegak Yesus te desalib. ⁶ Ya ndai sik dituk, empadai Ya udah bangkit, munyi te udah depadah Ya. Buh, pedak pengkerang Ya depegalai. ⁷ Angkat kin sigat, padah ngau bala murid Ya kalau Ya dah bangkit dentara urang mati. Ya ngenulau kitak ke Galilea; din kitak medak Ya. Sebenar aku dah madah ngau kitak." ⁸ Sidak angkat seklin riyak, takut bekamuh gaga, rari sigat-sigat untuk madah ke yak ngau bala murid Yesus. ⁹ Tiba-tiba Yesus betemu ngau sidak, banai: "Salam Bagimu." Sidak minik Ya, merekut kaki Ya lalu nyemah Ya. ¹⁰ Jekuh Yesus ngau sidak: "Nang takut. Angkat, padah ngau bala menyadik Ku, isak sidak angkat ke Galilea, din sidak bakal medak Aku." ¹¹ Rama sidak detengah jalai, datai sidak re bala penyaga yak ke kuta, madah ke semua te tejadi din ngau bala imam kepalak. ¹² Udah sidak bepekat ngau bala tuai-tuai, sidak ngamik keputus lalu merik ke duit ngau bala serdadu diyak ¹³ samil banai: "Kitak kalah madah kalau murid-murid Ya datai kiak malam-malam, encuri mayat Ya rama kitak tetinuk. ¹⁴ Antik tuk sampai tedinga ulih wali negeri, kami tau banai ngau ya, isak kitak ndai bulih bala penyulit." ¹⁵ Sidak nyamut duit yak, mulah nama te deperintah ke ngau sidak. Udek cerita yak tesiar dentara urang Yahudi sampai pituk. ¹⁷ Perintah untuk nyebar ke Injil ¹⁶ Kesebelas murid yak angkat ke Galilea, ke bukit te udah detunyuk ke Ya ngau sidak. Rama medak Ya, sidak nyemah Ya, tapi bisik te ragu-ragu. ¹⁸ Yesus minik sidak lalu banai: "Segala kuasa de surga ngau debumi dah deberik ngau Aku. ¹⁹ Maka, angkat kin, jadi ke semua bansa muridKu, baptis ke sidak alam nama Apai, Anak ngau Roh Kudus, ²⁰ ajar sidak upa te Kupadah ngau kitak. Ketau ke, Aku nyerta kitak sampai kebaduk zaman."