Pemadah keempat tentang penisa Yesus-rencana munuh Ya ¹ Yesus dah temuk ngajar, Ya banai ngau bala murid: ² "KItak ketau, dua ari agik deraya ke paskah, maka Anak Mensia kak deserah untuk desalib." ³ ama yak bala imam kepalak ngau bala penuai bansa Yahudi bekumpul de depan istana imam besai te penama Kayafas, ⁴ sidak bepekat berencana kak nangkap Yesus ngau tipu kemulak ngau munuh Ya. ⁵ Tapi sidak madah: "Nang rama gawai, isak ndai ruh dentara rayat." ⁶ Rama Yesus de Bethania, de langkau Simon te pedih kusta, ⁷ datai urang inuk ngau Ya ngemaik badah berisik minyak wangi te mahal. Minyak yak decurah ke ya katau kepalak Yesus te ketengah duduk makai. ⁸ Medak piyak bala murid sau lalu banai: "Kak kenama beruak yak? ⁹ Minyak yak tau dejual mahal, duit asil penyual tau deberik ngau urang meskin." ¹⁰ Yesus ketau ke pemikir sidak lalu banai: "Nama kitak medih inuk tuk? ya mulah pempulah te baik ngau Aku. ¹¹ Empadai urang miskin tau tamai kitak seruntik, tapi Aku ndai tau seruntik tamai kitak. ¹² Ya nyurah ke minyak yak ke tubuh Aku, berete ya siap untuk pengubur Aku. ¹³ Aku madah kitak: Dini-dini Injil tuk depadah de seluruh denia, nama te depulah ya tuk bakal detelah ugak ngau ngingat ya." ¹⁴ Udek surang re kedua belas murid te penama Yudas angkat riyak, betemu ngau imam kepalak. ¹⁵ Jekuh ya: Nama te kak kitak berik ngau aku, isak aku nyerah ke Ya ngau kitak?" Sidak merik duit 30 pirak ngau ya. ¹⁶ Mulai re yak, ya seruntik ngegak rama te baik untuk nyerah ke Yesus. ¹⁷ Ari pertama ari raya ruti ndai beragi, bala amurid Yesus datai ngau Ya, banai: "Nuan kak kami nyiapkan pejamuan paskah untuk Nuan dini?" ¹⁸ Saut Yesus: "Angkat ke kuta ngau sanuk, padah ngau ya: pesan Guru: Dah kak senta waktu Aku tuk; alam langkau mih tuk Ku kak ngeraya ke Paskah tamai bala murid Aku." ¹⁹ Udek bala murid ngerja ke te deperintah Yesus ngau sidak, nyiap ke Paskah. ²⁰ Ari dah malam, Yesus duduk makai tamai kedua belas murid Ya. ²¹ Ketengah sidak makai, Ya banai: "Aku madah kitak, surang dentara kitak dituk bakal nyerah ke Aku." ²² Ngau perasai sedih, surang-surang sidak mentimal banai ngau Ya: "Bukai aku kah Tuhan?" ²³ Saut Ya: "Ya te tamai Akau enculup ke jari ya ke pingan tuk, yak me te nyerah ke Aku. ²⁴ Anak Mensia mimang kalah angkat sesuai ngau te detulis tentang Ya, tapi celaka me urang te empadai ya Anak Mensia deserah. Lebih baik bagi ya ndai delahir." ²⁵ Yudas te kak nyerah ke Ya banai: "Bukai aku kah Rabi?" Saut Yesus ngau Ya: "Dirik udah madah ke yak." ²⁶ Rama sidak ketengah makai, Yesus ngamik ruti, ngucap berkat, melah-melah ke ruti yak, lalu deberik ngau sidak, samil banai: "Amik, makai, tuk tubuh Aku." ²⁷ Udah yak Ya ngamik cawan, ngucap syukur, udek merik ke yak ngau sidak, samil banai: "Minum bala kitak re cawan tuk. ²⁸ Empadai tuk darah Aku, darah pejanyi, te detumpah bagi urang mayuh ngau pengampun dusa. ²⁹ Tapi Aku madah kitak: Mulai re pitok, Aku ndai minum agik asil pun anggur sampai pada ari aku minum yak, de ari baru, tamai kitak alam kerajaan Apai Aku." ³⁰ Dah temuk nyanyi bala lagu pujia, Yesus tamai bala murid Ya ke bukit Zaitun. ³¹ Maka Yesus banai ngau sidak: "Malam tuk kitak bakal teguncang iman empadai Aku. Sebab bisik tetulis: Aku kak munuh gembala, ngau bala segerumung domba bakal teperarak. ³² Tapi seudah Aku bangkit, Aku bakal ngenulau kitak ke Galilea." ³³ Petrus nyaut Ya: "Biarpun sidak semua teguncang iman empadai Nuan, aku sekalik-kalik ndai." ³⁴ Saut Yesus ngau ya: "Aku madah mih, malam tuk sapan manuk engkukuk, mih udah nyangkal Aku tiga kalik." ³⁵ Saut Petrus ngau Ya: "Biarpun aku kalah mati tamai Nuan, aku ndai bakal nyangkal Nuan." Semua murid te bukai madah piyak ugak. ³⁶ Udek Yesus tamai bala murid datai ke tempat te benama Getsemani. Lalu Ya banai ngaua sidak: "Duduk em dituk, Aku kin kak bedoa." ³⁷ Ya ngemaik Petrus, ngau kedua urang anak Zebedeus bereta Ya. Udek Ya mulai berasai sedih ngau gentar, ³⁸ jekuh Ya ngau sidak: "Ati Ku sedih nar, asai te kak mati. Nugau em dituk, kitak bejaga-jaga tamai Aku." ³⁹ Udek Ya maju sikit, sujud ngau bedoa, jekuh Ya: "Apai, sekira mungkin, isak ke cawan tuk lalu re Aku, tapi nang sampai penekak Aku te tejadi, tapi penekak Nuan." ⁴⁰ Udek Ya bekalih ngau bala murid, nemu sidak ketengah tinuk. Udek Ya banai ngau Petrus: "Ndai nama Mih sangup sejam na bejaga-jaga tamai Aku? ⁴¹ Bejaga-jaga ngau bedoa, isak kitak ndai jatuk alam pencubaan: roh mimang kuat, tapi dagin lemah." ⁴² Udek Ya angkat kedua kalik untuk bedoa, jekuh Ya: "Apai, antik caawan tuk ndai dapat lalu, kecuali Aku minum tuk, jadi em upa penekak Nuan!" ⁴³ Rama Ya bekalih agik, Ya medak sidak tetinuk, empadai mata sidak dah berat. ⁴⁴ Ya ngisak ke sidak diak, udek angkat agik, bedoa ketiga kalik ngau doa te sama. ⁴⁵ Udek ya bekalih ngau bala murid, lalu banai ngau sidak: "Tinuk galai em pitok. pedak, dah damping, Anak Mensia deserah ke jari urang bedusa. ⁴⁶ Was, buh kita angkat. Ya te nyerah ke Aku dah damping." ⁴⁷ Ketengah Yesus banai, datai Yudas, salah asurang kedua belas murid Ya, segerumung besai urang tamai ya maik bala pedang ngau pentung, desuruh bala imam kepalak ngau tuai-tuai bansa Yahudi. ⁴⁸ Urang te kak nyerah ke Ya udah merik kecelik ngau sidak: "Urang te kusium yak mek Ya, tangkap na." ⁴⁹ Ya lansung maju nemu Yesus, serta banai: "Salam Rabi," lalu nyium Ya. ⁵⁰ Tapi Yesus banai ngau ya: "U kaban, untuk tuk kah mih datai?" Lalu majulah sidak megai Yesus, lalu nangkap Ya. ⁵¹ Tapi surang re sidak te nyerta Yesus, ngulur ke jari ya, mirus pedang, detetak ya pening hamba imam besai sampai putus. ⁵² Jekuh Yesus ngau ya: "Saruk pedang yak kalam sarung, sapa te ngau pedang, bakal benasa empadai pdang. ⁵³ Atau sangkak mih, Aku ndai tau nyuruh ApaiKu sekelin tuk ngirim ke lebih re dua belas pasukan malaikat isak nulung Aku? ⁵⁴ Antik piyak, tipa ngenap ke te detulis de Kitab Suci te madah kalah tejadi upa tuk?" ⁵⁵ Rama Yesus banai ngau urang mayuh: "Sangkak kitak Aku tuk penyamun, nyuruh kitak datai lengkap maik bala pedang, pentung, ngau nangkap Aku? Padahal tiap-tiap ari Aku duduk ngajar de Bait Allah, kitak ndai nangkap Aku. ⁵⁶ Tapi semua tuk tejadi isak genap te detulis alam kitab nabi-nabi." Udek semua murid Ya nudi ke Ya, ngerari ke dirik. ⁵⁷ Udah sidak nangkap Yesus, sidak ngemaik Ya ngadap Kayafas, imam besai. Diyak dah bekumpul bala ahli Taurat ngau tuai-tuai. ⁵⁸ Petrus nurut Ya re jauh sampai ke halaman Imam besai, dah tamak ke dalam, ya duduk dentara pengawal-pengawal kak medak kesudah pekara yak. ⁵⁹ Bala imam kepalak ngau seluruh mahkamah agama ngegak kesaksian pelsu teradap Yesus, isak Ya tau dukum mati, ⁶⁰ tapi sidak ndai sik bulih walau mayuh tampil saksi pelsu. Tapi kebadok tampil dua urang, ⁶¹ te madah: "Mensia tuk banai: Aku tau ngerubuh ke Bait Allah, udek dalam tiga ari Kudiri ke agik." ⁶² Udek Imam Besai yak bediri banai ngau Ya: "Ndai nama Dirik nyaut bala sangkak re saksi-saksi tuk?" ⁶³ Tapi Yesus gik mansih nugau. Udek jekuh Imam Besai yak ngau Ya: "Demi Allah te idup, padah ngau kami, Dirik tuk Mesias, anak Allah atau bukai?" ⁶⁴ Saut Yesus: "Dirik dah madah miak. Tapi Aku mdah kitak, mulai re pitok kitak medak Anak Mensia duduk desepiak kanan te palin Bekuasa, ngau datai datau bala awan de langit." ⁶⁵ Maka Imam Besai yak ngeridang pengau ya lalu banai: "Ya ngujat Allah. Kak kenama kita saksi agik? Kitak dah ninga hujatYa. ⁶⁶ Tipa penapat kitak?" Saut sidak: " Saut sidak: "Ya kalah dukum mati!" ⁶⁷ Udek sidak ngelecui mua Ya, ngucuh Ya; bala urang lain maluk Ya, ⁶⁸ ngau banai: "Cuba padah kami, u Mesias, sapa te maluk Mih?" ⁶⁹ Sementara Petrus duduk de luar halaman. Udek datai hamba inuk ngau ya, banai: "Mih seruntik ugak tamai Yesus urang Galilea yak." ⁷⁰ Tapi ya nyangkal depan semua urang, jekuh ya: "Aku ndai ketau nama te jekuh kitak." ⁷¹ Rama ya angkat ke gerbang, bisik hamba bukai medak ya lalu banai ngau sidak diyak: "Mensia tuk tamai Yesus urang Nazaret yak." ⁷² Ya nyangkal agik ngau besumpah: "Aku ndai ngelala mensia yak." ⁷³ Ndai lamak udah yak, bala urang diyak datai ngau Petrus, jekuh sidak: "Pesti mih salah surang re sidak, nampak re anai mih." ⁷⁴ Maka mulai petrus ngutuk ngau besumpah: "Aku ndai ngelala mensia yak." Rama yak engkukuk manuk. ⁷⁵ Udek Petrus tekingat ke nama te depadah Yesus ngau ya: Sapan manuk engkukuk, mih nyangkal Aku tiga kalik." Udek ya keluar, nyabar nguman.