Dara te bijaksana ngau dara te budu ¹ Rama yak, hal kerajaan surga sempama sepuluh dara, te ngamik pelita, angkat ngalu ke mempelai bakas. ² Limak budu, limak bijak. ³ Dara te budu yak ngemaik pelita tapi ndai ngemaik minyak, ⁴ dara te bijaksana ngemaik pelita ngau minyak ugak alam badah. ⁵ Tapi empadai mempelai lamak ndai datai-datai, sidak jadi ngantuk, lalu tetinuk. ⁶ Rama tengah malam, kedinga ingan te mangkas: Mempelai datai, iring ke ya! ⁷ Semua dara te tadik te angkat, nyiap ke pelita sidak. ⁸ Dara te budu banai ngau dara te bijaksana: Merik kami sikit minyak kitak yak, empadai pelita kami ampir padam. ⁹ Saut bala dara te bijaksana: Ndai dapat, ilak ndai cukup depengau kami ngau depengau kitak, kitak meli ngau penyual minyak na, meli din. ¹⁰ Tapi rama sidak angkat meli minyak, mempelai yak datai, ngau sidak te udah siap, tamak bereta ngau pengantin tamak ruai gawai kawin, udek lawang detutup. ¹¹ Udek bala dara te budu tadik banai: Tuan Tuan, bukak ke kami lawang! ¹² Tapi saut Ya: Sebenar, Aku ndai ngelala kitak. ¹³ Maka kitak kalah bejaga-jaga, empadai kitak ndai ketau sebila, ari nama, jam berapa Ya datai." ¹⁴ Hal kerajaan surga sempama tuan te kak angkat ke negeri bukai, ya ngumai bala hamba Ya, nyerah ke bala pemisik ya untuk durus. ¹⁵ Te surang deberik ya limak talenta, te surang agik dua, te surang agik sutik, sesuai ngau kemampu sidak, udek ya angkat. ¹⁶ Hamba te bulih limak talenta yak lalu angkat. Ya nyalan ke limak talenta, bulih untung limak talenta agik. ¹⁷ Hamba te bulih dua talenta piyak ugak, ngau bulih dua talenta. ¹⁸ Tapi hamba te bulih sutik talenta, angkat ngali lubang alam tanah lalu ngelabuk duit tuan yak. ¹⁹ Lamak udah yak, tuan yak pulai, beritung ngau bala hamba ya. ²⁰ Hamba te nerimak limak talenta yak datai, ngemaik limak talenta, jekuh ya: Tuan, limak talenta tuan pecayak ke ngau aku, pedak, aku bulih untung limak talenta. ²¹ Maka saut tuan yak ngau ya: Baik nar pempulah nuan hamba Aku te baik ngau setia; nuan setia ngau pekara mit, ku berik agik tangung jawab ngau pekara te lebih besai. Tamak ngau tamai alam kebahagiaan tuan nuan. ²² Lalu datai hamba te nerimak dua talenta, jekuh ya: Tuan, dua talenta tuan pecayak ke ngau aku, pedak, aku bulih untung dua talenta. ²³ Maka jekuh tuan yak ngau ya: Baik benar pempulah nuan yak hamba ku te baik ngau setia, nuan setia mikul tangung jawab alam pekara mit, aku kak merik tangung jawab te lebih besai agik. Tamak, tamai me alam kebahagiaan tuan nuan. ²⁴ Udek hamba te nerimak sutik talenta datai ugak, lalu banai: Tuan, aku ketau kalau tuan yak mensia te kejam, mutik te ndai tuan unsai, ngumpul asil te ndai tuan tanam. ²⁵ Maka aku takut, udek kukubur talenta te nuan berik alam tanah! ²⁶ Saut tuan yak: "Ui mih hamba te jaik ngau lemau, jadi mih ketau kalau aku mutik ndai kuunsai, ngumpul te ndai kutanam? ²⁷ Maka sebenar mih kalau merik keduit aku yak ngau urang, isak urang nyalan ke yak, jadi pas aku datai, aku nerimak serta ngau bunga ya. ²⁸ Amik ke talenta yak re ya, berik ke ngau te empu sepuluh talenta. ²⁹ Sapa te bisik, ya deberik agik, isak ya makin bisik mayuh. Tapi sapa te ndai bisik, asal empu ya bakal damik. ³⁰ sempalung ke hamba te ndai beguna tuk ke tempat te palin keleman. Din bisik ratap ngau kerit gigi." ³¹ "Antik Anak Mensia datai alam kemuliaan ngau semua malaikat tamai Ya, Ya besemayam datau tahta kemuliaan Ya. ³² Udek semua bansa dekumpul demua Ya, deperarak Ya sisksuk surang, upa gembala merarak domba re kaming, ³³ Ya naruh domba desepiak kanan ngau kaming desepiak kibak Ya. ³⁴ Raja banai ngau te desepiak kanan Ya: "Buh, kitak te deberkat Apai Ku, terimak ke kerajaan te udah desiap ke untuk kitak mulai re denia depulah. ³⁵ Empadai rama Aku lapar, kitak merik Aku makai; Aus kitak berik minum; Aku jadi urang penatai kitak merik aku penugau; ³⁶ Aku telanyang kitak merik Aku pengau; Aku pedih kitak ngurus Aku; Aku depenyara kitak nyenguk Aku. ³⁷ Saut sidak: "Sebila kami medak Nuan lapar lalu kami berik makai, Aus kami berik minum? ³⁸ Sebila kami medak Nuan jadi penatai ngau kami merik Nuan penugau, Nuan telanyang kami merik Nuan pengau? ³⁹ Sebila kami medak Nuan pedih ngau depenyara lalu kami nyenguk Nuan? ⁴⁰ Saut Raja yak: Aku madah kitak, nama te kitak pulah ngau menyadik Aku te palin hina, kitak mulah yak untuk Aku. ⁴¹ Udek Ya banai ngau te desepiak kibak: Tungkal kitak re mua Aku, bala urang tekutuk, tamak kin kalam api kekal te desiap ke untuk iblis ngau bala malaikat ya. ⁴² Empadai rama Aku lapar kitak ndai merik Aku makai, Aus ndai merik Aku minum; ⁴³ rama Aku jadi jadi penatai ndai merik Aku penugau, telanyang ndai merik Aku pengau; rama Aku pedih ngau depenyara kitak ndai ngurus Aku. ⁴⁴ Saut sidak: Tuhan, sebila kami medak Nuan lapar, aus, numpang, telanyang, pedih atau depenyara lalu kami ndai ngelayan Nuan? ⁴⁵ Saut Ya: Aku madah kitak, nama te ndai depulah kitak ngau menyadik Ku te palin hina, kitak ndai ngerja ke yak untuk Aku. ⁴⁶ Sidak tuk tamak kalam sisa kekal, tapi urang benar tamak kalam idup kekal."