Bait Allah dererak ¹ Udah yak Yesus keluar re Bait Allah, lalu angkat. Maka bala murid datai ngau Ya, nunyuk ke Bait Allah. ² Ya banai ngau sidak: "KItak medak semua yak? Aku madah kitak, ndai bakal bisik sigik batu pun tesusun datau pangan, semua kak derubuh." ³ Rama Yesus duduk datau bukit Zaitun, bala murid datai ngau Ya kak ngampur-ngampur tamai Ya kedirik. Jekuh sidak: "Padah ngau kami, sebila yak datai, nama kecelik penatai Nuan ngau kecelik denia kiamat?" ⁴ Saut Yesus ngau sidak: "Waspada, nang sampai bisik urang nyesat ke kitak! ⁵ Empadai mayuh urang datai ngau nama Aku, lalu banai: Aku tuk Mesias, udek sidak nyesat ke urang mayuh. ⁶ Kitak ninga peluluk bisik perang, ngau ninga auh perang. Tapi bejaga-jaga nang kitak kasak kisik; empadai semua yak kalah tejadi, tapi yak bukai kebaduk. ⁷ Bansa bangkit ngelawan bansa, kerajaan ngelawan kerajaan. Lapar ngau gempa diak-diak. ⁸ Tapi semua yak baruk peruba penisa dah kak damping zaman baru. ⁹ Rama yak page, kitak deserah untuk desisa, kitak kak debunuh, debencik semua bansa empadai nama Aku, ¹⁰ mayuh urang te murtad, bekebencik, mentimal nyerah ke pangan. ¹¹ Mayuh nabi pelsu pansut, nyesat ke urang mayuh. ¹² Empadai pengenyaik makin betamah, kasih mayuh urang jadi tabar. ¹³ Tapi urang te tan sampai ari kebadok, ya bakal selamat. ¹⁴ Innjil kerajaan tuk bakal depadah ke seluruh denia jadi kesaksian bagi semua bansa, udah yak baruk mek datang kiamat." ¹⁵ "Jadi, antik kitak medak pemunuh keji bediri de tempat kudus, menurut firman te depadah nabi Daniel-urang te maca kalah medak ke yak ¹⁶ maka bala urang de Yudea kalah rari ke pegunungan. ¹⁷ Urang te ketengah beribut datau langkau nang turun ngamik bala barang ralam langkau, ¹⁸ urang te ketengah duma nang pulai ngamik pengau ya. ¹⁹ Celaka mek bala ibuk te ketengah nganung ngau nusu kanak rama yak, ²⁰ Bedoa, isak rama kitak rari nang sampai rama musim celap ngau ari Sabat. ²¹ Empadai rama yak, bisik sisa te palin berat, upa te apan suah tejadi mulai re peruba denia sampai pituk, udek, ndai bakal teulang agik. ²² Sekira waktu ndai depegesak, ndai sik bala pengidup te selamat; tapi empadai urang-urang pilihan, waktu yak depegesak. ²³ Rama yak antik bisik urang banai ngau kitak: "Pedak, Mesias bisik dituk, atau Mesias bisik din, nang kitak pecayak. ²⁴ Empadai Mesias ngau nabi pelsu pansut, sidak mulah kecelik-kecelik ngau mujizat te nyampau, sekira tau, sidak nyesat ke urang pilihan ugak. ²⁵ Dinga ke bebuti, Aku udah madah kitak dulau. ²⁶ Jadi, antik bisik urang madah kitak: "pedak, Ya bisik de padang pasir, nang kitak kiak; atau: Ya bisik de bilik, nang kitak pecayak. ²⁷ Upa kilat mancak re sepiak timur ke barat, upa yak ugak mek page penatai Anak Mensia. ²⁸ Dini bisik bangkai, diak burung nazar bekerumun." ²⁹ "Dah baduk penisa rama yak, mata panas jadi keleman, bulan ndai bepenang, bala bintanag jatuk re langit, ngau bala kuasa langit guncang. ³⁰ Rama yak tampak Anak Mensia de langit ngau semua bansa de bumi meratap, sidak medak Anak mensia yak datai datau awan de langit, serta kuasa ngau kemuliaan Ya. ³¹ Ya nyuruh bala malaikat Ya keluar, nebah sangkakala te bingan kayah, sidak ngumpul bala urang pilihan Ya re keempat penyuru bumi, re ujung langit te sutik ke ujung langit te lain. ³² Amik pelajar re perempama tentang pun ara: antik dan mit mulai lemah, betaruk, kitak ketau bahwa musim panas dah damping. ³³ Upa yak ugak antik kitak medak semua tuk, ketau ke bereti waktu yak dah damping, dah demua lawang. ³⁴ Aku madah kitak: "Angkatan tuk ndai bakal belalu, seapan semua tuk tejadi. ³⁵ Langait ngau bumi bakal belalu, tapi anai Aku ndai belalu. ³⁶ Tapi ari nama jam berapa waktu yak datai, ndai sik urang te ketau, bala malaikat de surga ndai, Anak sik ndai, cuma Apai kedirik te ketau." ³⁷ Upa rama zaman Nuh, upa yak ugak page rama penatai Anak Mensia. ³⁸ Upa sidak sapan aik bah turun, makai ngau minum, kawin ngau ngawin ke urang, sampai ke ari Nuh tamak perau, ³⁹ sidak ndai ketau bala utai, sapan aik bah datai munuh sidak semua, piyak ugak page lusak rama penatai Anak Mensia. ⁴⁰ Rama yak antik bisik dua urang duma, surang debaik, surang dedudi; ⁴¹ antik bisik dua urang inuk ketengah mutar batu kilangan, sikuk debaik sikuk dedudi. ⁴² Maka kitak kalah bejaga-jaga, empadai kitak ndai ketau, sebila, ari nama Tuhan datai. ⁴³ Tapi ketaulah ke tuk: Antik tuak rumah ketau rama malam ari pencuri datai, ya pesti dah siap-siap, ndai bakal ya ngisak ke langkau ya debungkar. ⁴⁴ Maka kitak kalah bejaga-jaga ugak, empadai Anak Mensia datai rama te ndai kitak tabak." ⁴⁵ Sapa hamba te setia ngau bijaksana, yak te dangkat tuan ya ngurus urang-urang ya ngau merik makai rama dah senta? ⁴⁶ Gaga lah hamba te detemu tuan ya ketengah ngerja tugas, pas tuan ya datai. ⁴⁷ Aku madah kitak: Tuan yak bakal ngangkat ya jadi pengawas semua empu ya. ⁴⁸ Tapi antik hamba yak jaik, banai alam ati: ⁴⁹ Tuan aku ndai datai-datai, lalu ya mulai maluk hamba bukai, makai minum tamai bala pemabuk, ⁵⁰ maka tuan hamba yak datai rama ari te ndai detabak ya, ⁵¹ munuh ya, munuh ya, mulah ya senasib ngau bala urang munafik. Din bisik ratapan ngau kerit gigi."