Yesus ngutus kedua belas murid ¹ Maka Yesus ngumai kedua belas murid Ya, udek merik tenaga ngau kuasa ngau sidak untuk nguasai sitan-sitan, ngau untuk nyemuh ke mayuh pemedih. ² Ngau Ya ngutus sidak untuk madah ke kerajaan Allah ngau untuk nyemuh ke urang, ³ jekuh Ya ngau sidak: "Nang ngemaik nama-nama alam pejalai, nang ngemaik tungkat atau bekal, ruti atau duit, atau dua helai baju. ⁴ Ngau antik kitak udah deterimak alam sutik rumah, nugau na diak sampai kitak angkat. ⁵ Ngau antik bisik urang te ndai kak nerimak kitak, keluar re kota sidak, ngau kebas ke debu de kaki kitak sebagai peringatan teradap sidak." ⁶ Udek sidak angkat ngelingik desa samil madah ke Injil ngau nyemuh ke mayuh urang pedih de segala tempat. ⁷ Herodes, raja wilayah, ninga semua te tejadi yak, ngau ya berasai gaduh, empadai bisik te madah antik Yohanes dah bangkit re entara urang mati. ⁸ Bisik gak te madah Elia muncul agik, bisik ugak te madah nabi-nabi te subak dah bangkit. ⁹ Tapi Herodes banai: "Yohanes dah kutungkung kepalak ya. Sapa mensia yak te mulah te piak?" Udek ya berusaha isak tau betemu ngau Yesus. ¹⁰ Dah pulai, rasul-rasul yak, begisah ngau Yesus nama te sidak pulah. Udek Yesus ngemaik sidak ke kota te benama Betsaida, nyak nyuruh cuma sidak na te tamai Ya. ¹¹ Tapi urang mayuh ketau, udek nurut Ya. Ya nerimak sidak ngau banai tentang Kerajaan Allah ngau Ya nyemuh ke urang-urang te perelu semuh. ¹² Rama ari dah mulai kak malam, keduabelas murid datai ngau Ya ngau banai: "Suruh urang mayuh yak angkat, isak sidak ke desa-desa ngau kampung-kampung sekitar tuk untuk ngegak peninuk ngau pemakai, empadai tempat kita tuk sunyik." ¹³ Tapi Ya banai ngau sidak: "Kitak kalah merik sidak makai!" Sidak nyaut: "Te bisik ntang kami ndai lebih re limak utik ruti ngau dua ikuk ikan, lain antik kami angkat meli pemakai ngau urang pemayuh yak." ¹⁴ Empadai diak bisik limak ribu urang bakas. Udek Ya banai ngau murid-murid Ya: "Suruh sidak duduk bekelumpuk, kekira limak puluh urang sekelumpuk." ¹⁵ Bala murid ngereja nama te suruh Yesus. ¹⁶ Udah Ya ngamik limak ruti ngau dua ikan, Ya nenguak ke langit, ngucap berkat, melah ruti, deberik ngau bala murid, isak sidak magi ke ngau urang mayuh. ¹⁷ Sidak semua makai sampai kenyang. Udek dekumpul bala kredak ruti, besisak dua belas bakul penuh. ¹⁸ Bisik sekali rama Yesus bedoa kedirik, murid-murid datai ngau Ya. Udek Ya betanyak ngau sidak: "Jekuh urang mayuh, sapa Aku tuk?" ¹⁹ Saut sidak: "Yohanes pemanik, bisik ugak te madah: Elia, bisik ugak te madah salah sikuk re nabi te bangkit." ²⁰ Yesus betanyak ngau sidak: "Menurut kitak, Aku tuk sapa?" Saut Petrus: "Mesias re Allah." ²¹ Udek Yesus belaban ke sidak bebenar, nang madah sapa-sapa. ²² Ngau Yesus banai: "Anak Mensia kalah nangung mayuh penisa, ndai deterima bala tuai, imam kepalak ngau Ahli Taurat, udek debunuh ngau debangkit ke ari ke tiga." ²³ Jekuh Ya ngau semua sidak: "Tetiap urang te kak tamai Aku, ya kalah nyangkal dirik, nangkun salib tiap ari ngau tamai Aku. ²⁴ Empadai sapa te te nyelamat ke nyawa ya, ya ngayap ke nyawa ya; tapi sapa te nyawa ayap empadai Aku, ya nyelamat ke ya. ²⁵ Nama guna urang bulih seluruh denia, tapi ya ngeminasa atau ngerugi ke dirik kedirik? ²⁶ Empadai barangsapa malu empadai Aku ngau anai Aku, Anak Mensia malu ugak empadai urang yak, antik Ya datai page alam kemuliaan Ya ngau alaam kemuliaan Apai ngau malaaikat-malaikat kudus. ²⁷ Aku banai ngau kitak: Sebenar dentara urang te bisik dituk, bisik te ndai mati seapan sidak medak Kerajaan Allah." ²⁸ Kekira lapan ari udah segala pengajaran yak, Yesus ngemaik Petrus, Yohanes ngau Yakobus, udek naik katau bukit untuk bedoa. ²⁹ Rama Ya ketengah bedoa, upa mua Ya berubah jadi putih bepencak. ³⁰ Tampak dua urang banai ngau Ya, Musa sedua Elia. ³¹ Sedua nampak ke dirik alam kemuliaan ngau banai tentang tuju pengangkat Ya te bakal degenap de Yerusalem. ³² Sementara yak Petrus ngau bala kaban ya dah tinuk, ngau rama sidak teruas, sidak medak Ya alam kemuliaan: ngau sedua te bediri damping Ya. ³³ Ngau rama sedua kak nudi ke Yesus, Petrus banai ngau Ya: "Guru, kami matang gaga bebenar nugau dituk. Baik kami niri ke tiga kemah pituk, sigik untuk Nuan, sigik untuk Musa, sigik untuk Elia." Tapi Petrus ndai ketau nama te jekuh dirik ya. ³⁴ Ketengah ya banai miak, datai awan ngerumung sidak. Ngau rama sidak tamak awan, takut sidak. ³⁵ Udek tedinga ingan re awan yak te banai: "Tuk me Anak te Ku pilih, dinga ke Ya." ³⁶ Rama ingan yak tedinga, nampak cuma Yesus kedirik. Ngau bala murid ngeresia ke yak, ngau masa yak sidak ndai tekik madah ngau sapa-sapa nama te sidak pedak yak. ³⁷ Ari sutik rama sidak turun re bukit yak, datai urang mayuh begerumung betemu ngau Yesus. ³⁸ Sikuk re mayuh mensia yak banai: "Guru, aku mohon Nuan nyenguk anak ku, empadai kengkak sikuk yak me anak ku. ³⁹ Tetiba ya deserang roh, udek ngejut menciak ngau roh yak nguyu ya, nyuruh mulut ya bepupuk. Roh yak seruntik nisa ya ngau ampir ndai kak nudi ke ya. ⁴⁰ Ngau aku dah mintak ngau bala murid Nuan isak sidak ngusir roh yak, tapi sidak ndai numut." ⁴¹ Maka jekuh Yesus: "KItak angkatan te ndai pecayak ngau sesat, apa lamak agik Aku nugau dentara kitak ngau sabar teradap kitak? Baik anak mih kituk!" ⁴² Ngau rama nemiak yak minik Yesus, sitan yak ngempas ke ya ke tanah ngau nguyu tubuh ya. Tapi Yesus ngerara roh jahat yak ngau nyemuh ke nemiak yak, udek mulai ke ya ngau apai ya. ⁴³ Maka tebelenga semua urang diak empadai pempulah (kebesaran) Allah. Rama sidak diak ketengah iran ngau semua te depulah , Yesus banai ngau bala murid: ⁴⁴ "Dinga ngau pasak ke bebenar anai Ku tuk: Anak Mensia bakal deserah ke jari mensia." ⁴⁵ Sidak ndai ngereti anai yak, empadai rete tebelabuk bagi sidak, nyak nyuruh sidak ndai numut. Ngau sidak ndai sik te berani nanyak ke rete yak ngau sidak. ⁴⁶ Udek timul bantah dentara bala murid Yesus tentang sapa te palin besai dentara sidak. ⁴⁷ Tapi Yesus ketau pemikir sidak. Nyak nyuruh Ya ngamik sikuk nemiak mit delegak de sisi Ya, ⁴⁸ udek banai ngau sidak: "Barangsapa nyamut nemiak tuk alam namaKu, ya nyamut Aku; ngau barangsapa nyamut Aku, ya nyamut YA te ngutus Aku. Empadai te palin mit dentara kitak semua ya me te palin besai." ⁴⁹ Yohanes banai: "Guru, kami bisik medak urang ngusir sitan demi nama Nuan, udek kami pelaban urang yak, empadai ya bukai tamai kita." ⁵⁰ Yesus banai ngau ya: "Nang kitak belaban, empadai barangsapa ndai ngelawan kitak, ya depihak kitak." ⁵¹ Yesus ngau urang Samaria Rama ampir genap waktu Yesus d'angkat ke surga, Ya ngarah ke pemedak Ya untuk angkat ke Yerusalem, ⁵² ngau Ya ngirim utusan ngenulau Ya. Sidak yak angkat, udek tamak ke desa urang Samaria untuk nyiap ke ini itu bagi Ya. ⁵³ Tapi urang-urang Samaria yak ndai nerimak Ya, empadai pejalai Ya nuju ke Yerusalem. ⁵⁴ Rama murid Ya, Yakobus ngau Yohanes, medak yak, sedua banai: "Tuhan, Nuan nyagi ndai isak kami nyuruh api turun re langit untuk ngemenasa sidak?" ⁵⁵ Tapi Ya ngupuk ngau ngerara sidak. ⁵⁶ Udek sidak angkat ke desa bukai. ⁵⁷ Rama Yesus ngau bala murid nampung pejalai sidak, banai surang ngau Yesus: "Aku bakaal namai Nuan, kini kini Nuan angkat." ⁵⁸ Yesus banai ngau ya: "Serigala bisik liang ngau burung bisik sarang, tapi Anak Mensia ndai sik pengkerang untuk ngeletak ke kepalak Ya." ⁵⁹ Udek Ya banai ngau sidak bukai: "Buh tamai Aku!" Tapi urang yak nyaut: "Izin ke Aku angkat ngubur ke apai ku lau." ⁶⁰ Tapi Yesus banai ngau ya: "Isak urang mati ngubur ke urang mati; tapi mih kalah angkat ngau padah Kerajaan Allah dini dini." ⁶¹ Udek urang bukai agik banai: "Aku kak tamai Nuan Tuhan, tapi izin ke lau aku kak madah bala menyanak." ⁶² Tapi Yesus banai: "Tiap urang te siap ngebajak tapi medak ke belakang ndai pantas untuk Kerajaan Allah."