Bala inuk te ngelayan Yesus ¹ Ndai lamak udah yak Yesus bejalai bekeliling re kota ke kota ngau re desa ke desa madah ke Injil Kerajaan Allah. Kedua belas murid Ya tamai Ya, ² ngau bisik bala inuk te dah desemuh ke re roh-roh jahat ngau mayuh pemedih, Maria te detelah Magdalena te dah debebas ke re tujuh roh jahat, ³ Yohana bini Khuza bendahara Herodes, Susana ngau inuk bukai. Bala inuk yak ngelayan romongan yak ngau pemisik sidak. ⁴ Rama urang mayuh begerumung datai, bala urang re kota ngamuh ke dirik ngau Yesus, udek Ya banai alam perumpamaan: ⁵ "Bisik penabur keluar nabur ke benih. Rama ya nabur, bisik benih te jatuk de sisi jalai, udek detijak urang, ngau bala burung makai yak sampai abis. ⁶ Kedak jatuk de tanah te bebatu-batu, udah tumuh ya teberangkai empadai ndai sik aik. ⁷ Kedak jatuk de tengah rampuk durik, rampuk yak tumuh bereta, ngempik ya sampai mati. ⁸ Ngau kedak jatuk de tanah te baik, udah tumuh bebuah seratus kalik lipat." Udah banai miak, Yesus madah: "Sapa te bisik pening, ya kalah ninga!" ⁹ Murid-murid Ya betanyak ngau Ya, nama rete perumpamaan yak. ¹⁰ Udek saut Ya: "Ngau kitak deberik karunia untuk ngetau resia Kerajaan Allah, tapi ngau urang-urang bukai, hal yak depadah alam perumpamaan, isak sekalikpun sidak ngupuk, sidak ndai medak, ngau ninga tapi sidak ndai nyaruk. ¹¹ Tuk reti perumpamaan yak: Benih yak firman Allah. ¹² Te jatuk de sisi jalai yak urang te ninga, udek datai Iblis ngamik firman yak re alam ati sidak, isak sidak ndai pecayak ngau ndai deselamat. ¹³ Te jatuh detanah te bebatu-batu yak urang te dah ninga firman yak, nerimak ngau gaga,tapi sidak ndai berakar, sidak pecayak sekejap na, ngau alam masa pencobaan sidak murtad. ¹⁴ Te jatuk alam rumpuk durik yak, urang te udah ninga firmaan yak, alam masa penumuh sidak dempik ngau pengaduh, kekaya, ngau penyaman idup, nyak nyuruh sidak ndai ngasil ke buah te besuh. ¹⁵ Te jatuk de tanah te baik yak urang te dah ninga firman yak, naruh yak alam ati te baik ngau ngeluar ke buah alam perajin (ketekunan)." ¹⁶ "Ndai sik urang nimuk pelita udek detutup ngau tepayan atau detaruh debabah peninuk, tapi ya naruh yak datau kaki dian, isak semua urang te tamak ke rumah tau medak pen'ang. ¹⁷ Empadai ndai sik utai te tepelabuk te ndai depadah, ngau ndai sik resia te ndai deketau ngau dumum ke. ¹⁸ Nyak nyuruh, perati ke kitak ninga. Empaadai sapa te bisik, ngau deberik, tapi sapa te ndai sik, semua te ntang ya damik." ¹⁹ Yesus ngau bala menyanak-Ya Inai ngau menyadik Yesus datai ngau Ya, tapi sidak ndai dapat nemu Ya empadai urang mayuh. ²⁰ Urang madah ngau Ya: "Inai ngau menyadik Mih bisik de luar, sidak kak betemu ngau Mih." ²¹ Tapi Ya nyaut sidak: "Inai ngau menyadik Ku yak sidak, te ninga firman Allah ngau ngereja ya." ²² Bisik sari Yesus naik k'alam perau tamai bala murid-Ya, Ya banai ngau sidak: "Buh kita ke seberang lepung." Udek sidak angkat. ²³ Ngau rama sidak ketengah belayar, Yesus tinuk. Mungkak turun taufan ke lepung, nyuruh perau tamak aik ngau sidak alam bahaya. ²⁴ Nyak nyuruh bala murid datai neguk Ya, jekuh sidak: "Guru, Guru, kita benasa!" Ya angkat, udek ngemaduk ke ribut kayah te ngerutau. Ribut baduk, lepung yak tenang. ²⁵ Udek jekuh Ya ngau sidak: "Dini kepecayak kitak?" Nyak nyuruh sidak takut ngau iran, udek banai sama direk: "Sapa mensia tuk, nyuruh Ya merik perintah ngau ngau ribut, sidak patuh ngau Ya?" ²⁶ Udek Yesus ngau bala murid Ya naik de tanah urang Gerasa te teletak de seberang Galilea. ²⁷ Udah Yesus naik ke darat, datai urang bakas re kota yak nemu Ya; urang yak kesarung sitan, ngau udah lamak ya ndai bepengau, ndai nugau de rumah tapi nugau de belayan kubur. ²⁸ Rama ya medak Yesus, ya mangkas samil nyungkam de mua Yesus, ya banai ngau ingan kayah: "Nama urus Mih ngau aku, Yesus Anak Allah te palin Tingik? Aku mohon ngau Mih, nang sampai Mih nisa Aku." ²⁹ Ya banai miak empadai Yesus merintah ke roh jahat yak keluar re mensia yak. Empadai pisit roh yak ngirit ya, nyak nyuruh ngau nyaga ya, ya derantai ngau depetuk, tapi deputus delecut ya semua yak, ngau sitan ngemaik ya re te sunyik. ³⁰ Ngau Yesus betanyak ngau ya: "Sapa nama mih?" Saut ya: "Legion," empadai ya kesarung mayuh sitan. ³¹ Udek bala sitan yak mohon ngau Yesus, isak Ya nang sampai merintah ke sidak tamak k'alam jurang maut. ³² Diak mayuh babi ketengah ngegak pemakai de riring bukit, udek sitan-sitan yak mintak ngau Yesus, isak Ya nyagi sidak tamak k'alam babi babi yak. Yesus ngabul ke pemintak sidak. ³³ Udek keluar bala sitan re mensia yak ngau tamak k'alam babi-babi yak. Segerumung babi yak terjun re sisi jurang k'alam lepung udek mati lemas. ³⁴ Udah penyaga-penyaga babi yak medak nama te tejadi, sidak rari udek ngisah ke yak de kota ngau de kampung-kampung sekamat yak. ³⁵ Udek keluar me bala urang medak nama te tejadi. Sidak datai ngau Yesus ngau sidak nemu urang te dedudi ke sitan yak duduk de kaki Yesus; ya dah bepengau ngau udah antus. Nyak nyuruh sidak takut. ³⁶ Urang-urang te dah medak kedirik semua yak, madah ke ngau sidak, tipa urang te dah kesarung sitan yak deselamat ke. ³⁷ Udek seluruh penduduk daerah Gerasa mintak ngau Yesus isak Ya nudi ke sidak, empadai sidak takut bebenar. Nyak nyuruh Ya naik k'alam perau, udek belayar agik. ³⁸ Ngau urang te dedudi ke sitan yak mintak kak tamai Yesus. Tapi Yesus nyuruh ya angkat, jekuh ya: ³⁹ "Pulai na ke rumah mih, gisah ke nama semua te depulah Allah atas mih." Mensia yak udek angkat ngelingik kota ngau madah ke nama semua te dah depulah Yesus ngau ya. ⁴⁰ Rama Yesus bekalih, urang mayuh nyamut Ya, empadai sidak semua nunguk Ya. ⁴¹ Datai urang te benama Yairus. Ya kepalak rumah ibadat. Samil tesungkur de kaki Yesus, ya mohon ngau Ya, isak Yesus datai ke langkau ya, ⁴² empadai anak inuk ya te kengkak sikuk, te berumur kekira dua belas taun, ampir mati. Alam pejalai kiak, Yesus dedesak-desak urang mayuh. ⁴³ Bisik anak dara te dah dua belas taun pedih pendarahan, ndai mampu desemuh ke sapa-sapa. ⁴⁴ Ya maju minik Yesus re belakang ngau nyapai ram'ai juban Ya, sekelin yak semuh pendarahan ya. ⁴⁵ Udek Jekuh Yesus: "Sapa te nyapai Aku?" Empadai ndai sik te ngakuk, Petrus banai: "Guru, urang mayuh ngelingik ngau nesak Nuan." ⁴⁶ Tapi Yesus banai: "Bisik urang nyapai Aku, empadai Aku berasai bisik kuasa keluar re Aku." ⁴⁷ Rama inuk yak medak, pempulah ya kenak ketau, ya datai ngau begetar, tesungkur demua Yesus, ngau begisah ngau uraang mayuh nama sebab ya nyapai, ngau sekelin yak ugak ya semuh. ⁴⁸ Maka jekuh Ya ngau inuk yak: "Anak Ku, iman dik dah nyelamat ke dik, angkat ngau selamat!" ⁴⁹ Rama Yesus agik banai, datai urang re menyanak kepalak rumah ibadat yak ngau banai: "Anak mih dah mati, nang agik mih nyusah ke Guru!" ⁵⁰ Tapi Yesus ninga ngau banai ngau Yairus: "Nang takut, pecayak na, anak mih selamat." ⁵¹ Sepenatai de rumah Yairus, Yesus ndai nyagi sikuk pun tamai tamak ngau Ya, bukai re Petrus, Yohanes ngau Yakobus ngau apai inai nemiak yak. ⁵² Semua urang nyabak ngenang nemiak yak. Tapi Yesus madah: "Nang nyabak, ya ndai mati, tapi tinuk." ⁵³ Sidak ketawak ke Ya, empadai sidak ketau nemiak yak dah mati. ⁵⁴ Udek Yesus megai jari nemiak yak, samil banai: "Ui nemiak, angkat!" ⁵⁵ Maka bekalih roh nemiak yak ngau sekelin yak ya bediri. Udek Yesus nyuruh sidak merik nemiak yak makai. ⁵⁶ Ngau tebelenga urang tuai nemiak yak, tapi Yesus ndai nyagi sidak madah ngau sapa-sapa nama te tejadi.