Yesus nyemuh ke hamba perwira de Kapernaum ¹ Udah temuk Yesus banai de mua urang mayuh, Ya tamak ke Kapernaum. ² Diak bisik perwira te bisik hamba te palin dekesenang ya. Hamba yak pedih nguman ngau ampir mati. ³ Rama perwira yak ninga tentang Yesus, ya nyuruh surang dua urang tuai-tuai Yahudi ngau Ya mintak Ya isak datai ngau nyemuh ke hamba ya. ⁴ Sidak datai ngau Yesus, ngau sangat sidak mintak tulung Ya, jekuh sidak: "Ya patut Nuan tulung, ⁵ empadai ya ngasih bansa kita, ngau ya me te nangung rumah ibadat kami." ⁶ Udek Yesus angkat bereta sidak. Rama Ya ndai jauh agik re rumah perwira yak, perwira yak nyuruh kaban-kaban ya madah ngau Ya: "Tuan, nang besusah payah, empadai aku ndai layak nerimak Tuan alam rumah aku; ⁷ nyak nyuruh aku ngangap aku ndai layak datai ngau Nuan. Tapi padah ke na sutik anai, maka hamba ku yak pasti semuh. ⁸ Empadai aku tuk urang bawahan ugak, debabah aku bisik agik prajurit. Antik aku banai ngau prajurit yak: Angkat!, maka ya angkat, ngau prajurit bukai: Datai!, maka ya datai, ataupun ngau hamba aku: Kerja ke yak, maka dekereja ya." ⁹ Udah Yesus ninga aanai yak, Ya iran ngau ya, samil medak ngau urang mayuh te tamai Ya, Ya banai: "Aku mdah kitak, iman sebesai tuk pan suah Ku temu, sekalikpun dentara urang Israel!" ¹⁰ Ngau udah urang-urang te desuruh bekalih ke rumah, depedak sidak hamba yak udah sehat agik. ¹¹ Udek Yesus angkat ke kota te benama Nain. Murid-murid Ya angkat tamai Ya, ngau urang mayuh nyereta Ya beterigus. ¹² Ya dam damping gerbang kota, bisik urang mati dusung keluar, anak bakas, anak tungal inai ya te dah janda, ngau mayuh urang re kota yak te nyereta janda yak. ¹³ Ngau rama Tuhan medaak janda yak, tegerak ati Ya ngau belas kasih, udek Ya banai ngau ya: "Nang nyabak!" ¹⁴ Samil minik penangkun, Ya neguk yak, ngau ketengah bala penangkun yak betegak, Ya banai: "Urang biak, Aku madah mih, angkat!" ¹⁵ Maka nemiak yak angkat duduk ngau mulai banai, ngau Yesus merik ke ya ngau inai ya. ¹⁶ Semua urang diak takut bebenar, sidak memulia ke Allah samil banai: "Surang nabi besai dah paansut detengah-tengah kita," ngau "Allah dah nyaga umat Ya." ¹⁷ Maka tesiar kabar tentang Yesus de seluruh Yudea ngau de sekamat daerah damping yak. ¹⁸ Rama Yohanes ninga kabar tentang semua pempulah yak re murid-murid ya, ¹⁹ ya ngumai dua urang ngau nyuruh sidak betanyak ngau Tuhan: "Nuan nama te kak datai yak, atau kami kalah nunguk urang bukai agik?" ²⁰ Rama sedua yak datai ngau Yesus, sedua betanyak: "Yohanes Pemanik nyuruh kami betanyak ngau Nuan: Nuan nama te kak datai, atau kami kalah nunguk urang bukai agik?" ²¹ Rama Yesus nyemuh ke mayuh urang re segala macam pemedih ngau ari roh-roh jahat, ngau merik ke pemedak ngau urang te butak. ²² Ngau Yesus nyaut sidak: "Angkat, padah ngau Yohanes nama te kitak pedak ngau kitak dinga: Urang butak medak, urang lumpuh bejalai, urang kusta tahir, urang tulik ninga, urang mati debangkit, ngau urang meskin deberik kabar baik. ²³ Ngau bahagia urang te ndai jadi kecewa ngau ndai nerimak Aku." ²⁴ Udah urang te desuruh Yohanes yak angkat, Yesus mulai banai ngau urang mayuh tentang Yohanes: "Nama pulah kitak angkat ke padang pasir? Medak buluh te desepu ribut kin kituk? ²⁵ Atau kenama kitak angkat? Medak urang te bepengau alus? Urang te bepengau baik ngau idup mewah, penugau ya de istana raja. ²⁶ Jadi kak kenama kitak angkat? Medak nabi? Benar, Aku madah kitak, bahkan lebih repada nabi. ²⁷ Empadai tentang ya bisik tetulis: Pedak, Aku nyuruh utusanKu ngenulau Mih, ya nyiap ke jalai dadap mua Mih. ²⁸ Aku madah kitak: Dentara sidak te delahir ke urang inuk, ndai sik sikuk pun te lebih besai repada Yohanes, tapi te palin mit alam Kerajaan Allah lebih besai repada ya." ²⁹ Seluruh urang mayuh te ninga anai-Ya, temasuk bala pemungut cukai, ngakuk kebenaran Allah, empadai sidak dah merik dirik depanik ulih Yohanes. ³⁰ Tapi urang-urang Farisi ngau ahli-ahli Taurat ndai nerimak maksud Allah teradap sidak, empadai sidak ndai kak depanik ulih Yohanes. ³¹ Jekuh Yesus: "Ngau nama Aku umpama ke urang-urang re angkatan tuk, ngau nama sidak yak sama? ³² Sidak yak sempama nemiak te duduk de pasar sama (saling) nyeru: Kami ngesuh suling bagi kitak, tapi kitak ndai menari, kami nyanyi ke kidung duka, tapi kitak ndai nyabak. ³³ Empadai Yohanes Pemanik datai, ya ndai makai ruti, ndai minum anggur, ngau kitak madah: Ya kesarung sitan. ³⁴ Udek Anak Mensia datai, Ya makai ngau minum, ngau kitak banai: Pedak, Ya rangkak muluk makai minum, kaban pemungut cukai ngau urang bedosa. ³⁵ Tapi hikmat debenar ke ulih semua urang te nerimak yak." ³⁶ Surang Farisi ngun'ang Yesus makai de rumah ya. Yesus datai ke rumah urang Farisi yak, udek duduk makai. ³⁷ De kota yak bisik sikuk inuk te tekenal sebagai urang bedosa. Rama inuk yak ninga Yesus ketengah makai de langkau urang Farisi yak, ya ngemaik buli-buli pualam te berisik minyak wangi. ³⁸ Samil nyabak ya angkat bediri de belakang Yesus damping kaki Ya. Ya masah kaki Yesus ngau aik mata ya, ngau nyapu yak ngau buk ya, udek ya nyium kaki Yesus, degulai ya ngau minyak wangi yak. ³⁹ Rama urang Farisi te ngunang Yesus medak hal yak, ya banai alam ati ya: "Antik Ya tuk benar nabi, tentu Ya ketau, sapa ngau upa nama inuk te nyapai Ya; tentu Ya ketau, antik inuk yak urang bedosa." ⁴⁰ Udek Yesus banai ngau ya: "Simon, bisik te kak Ku padah ngau mih." Saut Simon: "Padah na, Guru." ⁴¹ "Bisik dua urang berutang ngau urang pelepas duit. Sikuk berutang limak ratus dinar, te sikuk agik limak puluh. ⁴² Empadai sidak ndai sang'up mayar, maka ya ngapus utang sedua. Sapa dentara sedua yak te palin ngasih ya?" ⁴³ Saut Simon: "Aku kira ya te palin mayuh dapus utang ya." Jekuh Yesus ngau ya: "Benar penapat mih." ⁴⁴ Ngau samil ngupuk ngau inuk yak, Ya banai ngau Simon: "Mih medak inuk tuk? Aku tamak ke langkau mih, tapi mih ndai merik Aku aik ngau masuk kaki, tapi ya masuk kaki Aku ngau aik mata ya, ngelap yak ngau buk ya. ⁴⁵ Mih ndai nyium Aku, tapi mulai re peruba Aku tamak, ya ndai baduk-baduk nyium kaki Aku. ⁴⁶ Mih ndai ngeminyak kepalak Ku ngau minyak, tapi ya ngeminyak kaki Aku ngau minyak wangi. ⁴⁷ Nyak nyuruh Aku madah mih: "Dosa ya te mayuh yak dah dampun, empadai ya dah mayuh bebuat kasih." ⁴⁸ Udek Ya banai ngau inuk yak: "Dosa dik dah dampun." ⁴⁹ Ngau sidak te duduk makai tamai Ya, bepikir alam ati sidak: "Sapa Ya tuk, tau ngampun dosa?" ⁵⁰ Tapi Yesus banai ngau inuk yak: "Iman dik dah nyelamat ke dik, angkat ngau selamat!"