Yesus ngutus tujuh puluh murid ¹ Udah yak Tuhan nunyuk tujuh puluh murid bukai, udek ngutus sidak dua dua ngenulau Ya ke setiap kota ngau tempat te kak deguang Ya. ² Jekuh Ya ngau sidak: "Te tau deputik mayuh, tapi te mutik sikit. Nyak nyuruh kalah mintak ngau tuak te ngempu, isak ya ngirim ke urang te tau jadi tukang putik. ³ Angkat, Aku ngutus kitak upa anak domba ke tengah-tengah serigala. ⁴ Nang ngemaik pundi, atau bekal, atau san'al, ngau nang merik salam ngau sapa-sapa selamak de jalai. ⁵ Antik kitak tamak ke sebuah rumah, padah lau: "Damai sejahtera bagi rumah tuk. ⁶ Ngau antik de rumah yak bisik urang te pantas nerimak damai sejahtera, maka salam kitak yak nugau atau ya. Tapi antik ndai, salam yak bekalih ngau kitak. ⁷ Nugau na de rumah yak, makai minum nama te deberik sidak ngau kitak, empadai pekerja patut bulih upah. Nang pinah-pinah rumah. ⁸ Ngau antik kitak tamak k'alam kota, ngau kitak deterimak diak, makai na nama te dehidang ngau kitak, ⁹ ngau semuh ke bala urang pedih te bisik diak, ngau padah ke ngau sidak: Kerajaan Allah dah damping kitak. ¹⁰ Tapi antik kitak tamak k'alam sebuah kota, ngau kitak ndai deterimak diak, angkat na ke jalai-jalai raya samil nyeru: " ¹¹ Debu kota kitak te lekat de kaki kami, kami kebas ke de mua kitak; tapi ketau ke tuk: Kerajaan Allah dah damping. ¹² Aku madah ngau kitak: pada ari tuk Sodom lebih lemput tangungan re pada kota yak." ¹³ "Celaka kau Khorazim! Celaka kau Betsaida! Empadai antik de Tirus ngau Sidon tejadi mujizat-mujizat te udah tejadi dentara kitak, udah lamak sidak betobat. ¹⁴ Tapi rama ari pengakiman, tangungan sidak lemput re kitak. ¹⁵ Ngau kitak Kapernaum, nama kitak bakal de naik sampai ke langit? Ndai, kitak bakal deturun sampai ke denia urang mati! ¹⁶ Barangsapa ninga ke kitak, ya ninga ke Aku; ngau barangsapa ndai nerimak kitak, ya ndai nerimak Aku; ngau barangsapa ndai nerimaak Aku, yaa ndai nerimak YA te ngutus Aku." ¹⁷ Udek ketujuh puluh murid bekalih ngau ati senang samil banai: "Tuhan, sitan-sitan takluk ngau kami demi nama Nuan." ¹⁸ Udek jekuh Yesus ngau sidak: "Aku medak Iblis jatuk upa kilat re langit. ¹⁹ Sebenar, Aku dah merik kuasa ngau kitak untuk nijak ular ngau kalajengking ngau kuasa ngetan penguat munsuh, nyuruh ndai sik te tau membahaya ke kitak. ²⁰ Tapi biar pun piak, nang ugak kitak gaga empadai roh-roh yak takluk ngau kitak, tapi gagalah empadai nama kitak terdaftar de surga." ²¹ Rama yak Yesus gaga ugak alam Roh Kudus ngau banai: "Aku besukur ngau Nuan Apai, Tuhan langit ngau bumi, empadai semua yak Nuan pelabuk re urang bijak ngau urang te numut, tapi Nuan padah ngau urang mit. ²² Semua dah deserah ke Apai ngau Aku, ngau ndai sik urang te ketau sapa Anak Mensia bukai re Apai, ngau sapa Apai bukai re Anak, ngau bala urang te dekedekat Anak yak madah ke hal yak." ²³ Udah yak Yesus ngupuk ngau murid-murid Ya kedirik, samil banai: "Bahagia mata te medak nama te kitak pedak. ²⁴ Empadai Aku banai ngau kitak: Mayuh nabi ngau raja ining medak nama te kitak pedak, tapi sidak ndai medak, ining kak ningaa nama te kitak dinga tapi ndai ninga." ²⁵ Bisik sekalik bediri sikuk ahli Tauraat kak ngencuba Yesus, jekuh ya: "Guru, nama te kalah kupulah isak bulih idup kekal?" ²⁶ Saut Yesus ngau ya: "Nama te tetulis alam ukum Taurat? Nama te mih baca din?" ²⁷ Saut urang yak: "Kasih ke Tuhan Allah ngau segenap ati, segenap jiwa, ngau segenap penguat ngau segenap akal budi, ngau kasih ke pangan mensia upa kasih ngau dirik." ²⁸ Jekuh Yesus ngau ya: "Saut mih kenak; pulah upa yak, maka mih idup." ²⁹ Tapi untuk ngemenar ke dirik, urang yak banai ngau Yesus: "Sapa sesama mensia?" ³⁰ Saut Yesus: "Bisik urang turun re Yerusalem ke Yerikho; ya jatuk ke jari penyamun-penyamun te bukai cuma ngerampuk ya sampai abis, tapi maluk ya udek angkat nudi ke ya setengah mati. ³¹ Kenamput bisik imam turun ngelalu jalai yak; yak medak mensia yak, tapi ya mansak re seberang jalai. ³² Piak ugak urang Lewi datai kiak, ; rama ya medak mensia yak, ya mansak re seberang jalai. ³³ Udek datai urang Samaria, te ketengah alam pejalai, ke tempat yak; rama ya medak mensia yak tegerak ati ya ngau belas kasih. ³⁴ Desung ya udek malut lukak mensia yak, udek degulai ya ngau minyak tamai anggur. Udek ya ngatung mensia yak katau keledai te detumpang ya, udek ngemaik mensia yak ke tempat bemalam (penginapan) ngau ngerawat ya. ³⁵ Ari sutek, ya nyerah ke dua dinar ngau uraang te empu pengkerang yak, jekuh ya: "Rawat mensia tuk, udek antik nuan belan'ya lebih repada tuk, aku ganti nunguk ku kituk agik. ³⁶ Sapa dentara sidak tiga yak menurut mih te sesama mensia ari urang te jatuk ke jari penyamun yak?" ³⁷ Saut urang yak: "Urang te dah nunyuk ke belas kasih ngau ya." Jekuh Yesus ngau ya: "Angkat, ngau bempulah upa yak!" ³⁸ Rama Yesus ngau bala murid agik alam pejalai, datai Ya de sebuah kampung. Sikuk inuk te benama Marta nerimak Ya de rumah. ³⁹ Inuk yak bisik menyadik benama Maria. Maria duduk damping kaki Tuhan, samil ninga ke anai Ya, ⁴⁰ sedang Marta sibuk ngelayan. Ya minik Yesus ngau banai: "Tuhan, ndai Nuan peduli, menyadik ku ngisak ke aku ngelayan kedirik? Suruh ya nulung aku." ⁴¹ Tapi Tuhan nyaut ya: "Marta, Marta, nang gaduh ngau nyusah ke dirik ngau mayuh pekara, ⁴² tapi cuma sutik na te perelu: Maria dah milih bage te palin baik te ndai tau d'amik repada ya."