Hal berdoa ¹ Bisik sekalik Yesus ketengah bedoa de sutik tempat. Rama Ya baduk bedoa, banai sikuk re bala murid ngau Ya, jekuh ya: "Tuhan, ajar kami bedoa, upa te dajar ke Yohanes ngau bala murid ya." ² Saut Yesus ngau sidak: "Antik kitak bedoa, padah: Apai, dekudus ke nama Nuan; datai ke Kerajaan Nuan. ³ Berik kami pemakai cukup tiap ari ⁴ ngau ampun ke kami re dosa kami, empadai kami ngampun urang te besalah ngau kami; ngau nang ngemaik kami k'alam pencobaan." ⁵ Udek jekuh Ya ngau sidak: "Antik bisik urang tengah malam datai ke langkau kaban ya ngau banai: Menyadik, pinyau ke aku tiga igik ruti, ⁶ empadai kaban aku te ketengah alam pejalai singah ke rumah, ngau aku ndai sik nama-nama te tau desurung ngau ya; ⁷ ndai patut ya te dalam rumah yak nyaut: Nang ngaru aku, lawang dah ku tutup, anak bini ku dah tinuk; aku ndai tau angkat merik ke yak ngau nuan. ⁸ Aku madah kitak: Sekalikpun ya ndai angkat empadai yak kaban ya, tapi empadai kaban ya yak ndai malu, ya angkat ugak, merik nama te deperelu ke ya. ⁹ Nyak nyuruh Aku madah kitak: "Mintak, maka kitak deberik; gegak maka kitak nemu; ketuk, maka lawang debukak. ¹⁰ Empadai tiap urang te mintak, bulih ngau urang te ngegak, nemu, ngau urang te ngetuk, bagi ya lawang debukak. ¹¹ Apai sapa te antik anak mintak ruti, deberik ular ngau nganti ruti yak? ¹² Atau antik ya mintak teluk, deberik kalajengking? ¹³ Jadi antik kitak te jaik tau merik ke te baik ngau anak kitak, apalagik Apai kita de surga! Ya merik Roh Kudus ngau sidak te mintak ngau Ya." ¹⁴ Bisik sekalik Yesus ngusir re urang sitan te nyuruh bisuk. Rama sitan yak keluar, urang bisuk yak tau banai. Maka iran urang mayuh. ¹⁵ Tapi bisik dentara sidak te banai: "Ya ngusir sitan ngau kuasa Beelzebul, pengulu sitan." ¹⁶ Bisik ugak te mintak kecelik re surga ngau Ya untuk ngencuba Ya. ¹⁷ Tapi Yesus ketau pemikir sidak, udek banai: "Setiap kerajaan te pecah belah pesti benasa, ngau tiap rumah tangak te pecah belah pesti rubuh. ¹⁸ Antik Iblis tebagi-bagi ngau ngelawan dirik kedirik, tipa ya tau tan? Empadai kitak banai madah Aku ngusir sitan ngau kuasa Beelzebul. ¹⁹ Jadi, antik Aku ngusir sitan ngau kuasa Beelzebul, ngau kuasa pengikut kitak ngusir ya? Empadai sidak me te jadi hakim kitak. ²⁰ Tapi antik Aku ngusir sitan ngau kuasa Allah, maka sebenar Kerajaan Allah dah datai ngau kitak. ²¹ Antik urang yak kuat ngau besenjata lengkap nyaga rumah ya kedirik, maka aman me semua empu ya. ²² Tapi antik urang te lebih kuat repada ya nyerang ngau ngalah ke ya, maka urang yak ngerampas senjata te dean'al ke ya, ngau magi ke utai te derampas ya. ²³ Sapa ndai tamai Aku ya ngelawan Aku, ngau sapa ndai ngumpul tamai Aku, ya besarak." ²⁴ "Antik roh jahat keluar re mensia, ya udek gentayangan ngegak tempat-tempat te ransi ngau betegak, ngau empadai ya ndai bulih, ya banai: Aku bakal bekalih ke langkau te dah lamak ku dudi. ²⁵ Udek ya angkat, depedak ya langkau yak bersih tesapu ngau rapi tesusun. ²⁶ Udek ya keluar ngaum tujuh roh bukai te lebih jaik repada ya, udek sidak tamak ngau nugau diak. Nyak nyuruh mensia yak lebih parah re peruba." ²⁷ Rama Yesus gik ketengah banai, bisik inuk bingan dentara urang mayuh, jekuh ya: "Gaga inai te nganung Mih ngau te udah nusu ke Mih." ²⁸ Tapi saut Ya: "Urang te gaga yak, sidak te ninga firman Allah ngau te nyaga ya." ²⁹ Rama urang mayuh ngelingik Ya, Yesus banai: "Angkatan tuk angkatan te jaik. Sidak kak mintak kecelik, tapi ngau sidak ndai deberik bukai re kecelik nabi Yunus. ³⁰ Upa Yunus dah jadi kecelik bagi urang Niniwe, piak ugak Anak Mensia jadi kecelik bagi angkatan tuk. ³¹ Rama penghakiman, ratu re Selatan yak bakal bangkit tamai urang angkataan tuk ngau ya bakal ngukum sidak. Empadai ratu tuk datai re ujung bumi kak ninga hikmat salomo, ngau sebenar te dituk lebih repada Salomo! ³² Rama waktu penghakiman, urang Niniwe bakal bangkit bereta angkatan tuk ngau sidak bakal ngukum. Empadai urang-urang Niniwe yak betobat ninga pemadah Yunus ngau te dituk sebenar lebih repada Yunus!" ³³ "Ndai sik urang te ngidup pelita udek ngengkah ya debabah rumah atau debabah gantang, malah ke datau kaki dian, isak semua aurang te tamak, tau medak pen'ang ya. ³⁴ Mata yak pelita tubuh, antik mata kitak jaik, keleman tubuh kitak. ³⁵ Nyak nyuruh perati ke isak terang te bisik ntang kitak nang sampai jadi keleman. ³⁶ Antik seluruh tubuh kitak terang ngau ndai sik te keleman, maka terang seluruh, sama upa pelita dah nerang kitak ndau pen'ang ya." ³⁷ Rama Yesus temuk ngajar, surang Farisi ngun'ang Ya makai de rumah ya. Maka Ya tamak ke rumah yak, udek duduk makai. ³⁸ Urang Farisi yak iran medak Yesus ndai masuk jari seapan makai. ³⁹ Tapi Tuhan banai ngau ya: "Kitak urang-urang Farisi, kitak meresih ke bagian luar cawan ngau pingan, tapi sepiak ke dalam penuh rampasan ngau pengenyaik. ⁴⁰ Ui urang-urang budu, ndai me Ya te nyadi ke bagian luar, Ya ugak te nyadi ke bagian dalam? ⁴¹ Tapi, berik ke isik yak sebagai sedekah, sebenar semua yak bakal jadi bersih bagi kitak. ⁴² Tapi celaka kitak, urang-urang Farisi, empadai kitak mayar persepuluhan re selasih, inggu ngau semua jenis pakuk, tapi kitak ngabaikan keadilan ngau kasih Allah. Te semacam depulah, nang ngabaikan te bukai. ⁴³ Celaka kitak bala urang Farisi, empadai kitak rajin duduk dedepan de rumah ibadat, ngau gaga bulih penghormatan de pasar. ⁴⁴ Celaka kitak, empadai kitak sama upa kubur te ndai ngau kecelik; urang-urang te bejalai datau yak ndai ketau." ⁴⁵ Sikuk dentara urang ahli-ahli Taurat yak nyaut ngau banai ngau Ya: "Guru, ngau banai miak, Nuan menghina kami ugak." ⁴⁶ Tapi Ya nyaut: "Celaka ugak kitak bala ahli Taurat, kitak ngeletak ke beban te ndai mampu tepikul ngau urang, tapi kitak kedirik ndai kak neguk beban yak murung ke ngau sutik jari. ⁴⁷ Celaka kitak, empadai mulah kubur bala nabi tapi akik inik kitak dah munuh sidak. ⁴⁸ Ngau piak kitak ngakuk, kitak ngemenar ke bala pempulah akik inik kitak, empadai sidak dah munuh nabi-nabi yak udek kitak mulah kubur e. ⁴⁹ Nyak nyuruh hikmat Allah banai: "Aku bakal ngutus ngau sidak nabi-nabi ngau rasul-rasul ngau setengah re bala nabi ngau bala rasul yak debunuh sidak ngau desisa, ⁵⁰ isak re angkatan tuk detuntut darah semua nabi te dah tetumpah mulai re denia jadi, ⁵¹ mulai dari darah Habel sampai Zakharia te dah debunuh dentara mezbah ngau Rumah Allah. Aku madah kitak: Semua tuk bakal detuntut re angkatan tuk. ⁵² Celaka kitak, ui ahli-ahli Taurat, empadai kitak dah nemu kunci penumut (pengetahuan); kitak kedirik ndai tamak ke dalam ngau urang te berusaha kak tamak kitak pekang-pekang." ⁵³ Ngau seudah Yesus angkat re tempat yak, bala ahli Taurat ngau bala urang Farisi selampur ngintai ngau menuh Ya ngau macam-macam soal. ⁵⁴ Untuk yak sidak berusaha mancin ya, isak sidak tau nangkap Ya bedasar ke nama te detelah Ya.