Pengajaran khusus bagi murid-murid ¹ Sementara yak, beribu-ribu urang urang mayuh dah begerumung, nyak nyuruh sidak bedesak-desak. Udek Yesus mulaia ngajar, pertama-tama ngau murid-murid Ya, jekuh Ya: "Waspada ngau ragi, kemunafikan urang Farisi. ² Ndai sik utai te tetutup te ndai debukak, ngau ndai sik utai te tepelabuk te ndai deketau. ³ Nyak nyuruh nama te kitak padah alam keleman bakal tedinga alam terang, ngau nama te kitak bisik ke pening alam kamar bakal depadah r'atau atap rumah. ⁴ Aku madah kitak, bala kaban Ku, nang kitak takut ngau sidak te tau munuh tubuh, udah yak ndai numut nama-nama agik. ⁵ Aku kak nunyuk ngau kitak, sapa te kalah deketakut kitak. Takut ke Ya, te udah munuh, bisik kuasa nyempalung urang k'alam neraka. Aku madah kitak benar, kalau takut ke Ya! ⁶ Ndai me burung pipit dejual limak ikuk dua duait? sunguh pun piak, ndai sik tedudi barang sikuk dekelupa ke Allah, ⁷ sampai ke buk dekepalak kitak teritung semua. Nyak nyuruh nang takut, empadai kitak lebih berega repada mayuh burung pipit. ⁸ Aku madah kitak: "Tiap urang te ngakuk Aku dedepan mensia, Anak Mensia bakal ngakuk ya dedepan malaikat-malaikat Allah. ⁹ Tapi barangsapa nyangkal Aku dedepan mensia, ya bakal desangkal dedepan malaikat-malaikat Allah. ¹⁰ Setiap urang te madah utai ngelawan Anak Mensia, ya bakal dampun; tapi barangsapa menghujat Roh Kudus, Ya ndai dapat dampun. ¹¹ Antik urang ngadap ke kitak ngau majelis-majelis atau ngau pemerintah-pemerintah ngau penguasa- penguasa, nang kitak gaduh ke nama te kalah kitak panai ngau mangan ke dirik. ¹² Empadai rama yak ugak Roh Kudus bakal ngajar kitak, nama te kalah kitak pulah." ¹³ Sikuk dentara urang mayuh diak banai ngau Yesus: "Guru, bak padah menyadik aku isak ya bebagi warisan ngau aku." ¹⁴ Tapi Yesus banai ngau ya: "Menyadik, sapa te udah ngangkat Aku jadi hakim atau pengentara atas kitak?" ¹⁵ Jekuh Ya agik ngau sidak: "Bejaga-jaga ngau ati-ati teradap semua ketamakan, empadai walaupun urang belimpah ruah reta bena, idup ya ndai tegantung re kekaya ya yak." ¹⁶ Udek ya madah ngau sidak sutik perumpamaan, jekuh Ya: "Bisik surang kaya, tanah ya ngasil belimpah-limpah. ¹⁷ Ya betanyak alam ati ya: Nama te kalah kupulah, empadai aku ndai sik pengkerang ngau ngengkah asil tanahku. ¹⁸ Udek jekuh ya: Tuk te kak kupulah; aku kak ngerumpang lupung-lupung aku, kupulah agik te lebih besai, ngau aku naruh bala bala genum ngau barang. ¹⁹ Udah yak aku banai ngau jiwaku, jiwa, entang dirik mayuh barang, tetimun betaun-taun pelamak; betegak, makai, minum, ngau senang-senang na! ²⁰ Tapi firman Allah ngau ya: "Ui mih urang budu, malam tuk ugak jiwa mih d'amik ari mih, nama te udah mih siap, untuk sapa yak? ²¹ Piak me kejade antik urang kaya ngumpul ke reta bena untuk ya kedirik, antik ya ndai kaya demua Allah." ²² Yesus banai ngau murid-murid Ya: "Nyak nyuruh Aku banai ngau kitak: nang gaduh ke idup kitak, nama te kalah kitak makai, nang gaduh ngau tubuh kitak, nama te tau kitak pengau. ²³ Empadai idup lebih penting repada pemakai, ngau tubuh lebih penting repada pengau. ²⁴ Perati ke bala burung te ndai nanam, ndai ngetam, ngau ndai sik lupung, tapi sidak deberik makai ulih Allah. Kitak jauh lebih repada burung-burung yak! ²⁵ Sapa dentara kitak te empadai gaduh tau nambah seseta jalai idup ya? ²⁶ Jadi, antik kitak ndai sangup mulah barang te palin mit, nama pulah kitak kalah gaduh ke hal-hal bukai? ²⁷ Perati ke bunga bakung te ndai memintal ngau ndai beranyam, tapi Ku madah kitak: Salomo alam semua kemegah ya pun ndai bepengau baik upa salah sutik re sidak yak. ²⁸ Jadi, antik rumput deuma, te ari tuk bisik ngau pagi udah debuai k'alam api, ndai sik sangak de rawat Allah, telebih agik kitak, urang te ndai pecayak! ²⁹ Jadi, nang sampai kitak nyo'al ke nama te kitak makai, nama te kitak minum, ngau nang gaduh ati kitak. ³⁰ Semua yak degegak bansa-bansa te ndai ngelala Allah. Tapi Apai kitak ketau, kitak merelu semua yak. ³¹ Tapi gegak lau Kerajaan Ya, maka semua yak bakal detamah ke ugak ngau kitak. ³² Nang takut, bala kitak kawanan mit! Empadai Apai kitak dah berkenan merik kitak Kerajaan yak. ³³ Jual ke semua pemisik kitak, ngau berik sedekah! Pulah ke bagi kitak pundi-pundi te ndai numut tuai, harta de surga te ndai tau abis, te ndai tau dekampir pencuri ngau te ndai deperusak gegat. ³⁴ Empadai dini ati kitak nugau, diak reta kitak nugau." ³⁵ Kewaspadaan "Pungung kitak kalah teketang seruntik ngau pelita kitak kalah idup. ³⁶ Ngau kitak kalah upa urang te nunguk tuak ya datai re gawai kawin, isak antik ya datai ngetuk lawang, lansung debukak bagi ya. ³⁷ Gaga me bala hamba te detemu tuan ya bejaga-jaga rama ya datai. Aku madah kitak: Ya ngetang pungung ya ngau nyuruh sidak duduk makai, ngau ya datai ngelayan sidak. ³⁸ Ngau antik ya datai tengah malam atau diniari, ngau nemu sidak upa yak, maka gaga me sidak. ³⁹ Tapi ketau ke tuk: "Antik tuan rumah ketau jam berapa pencuri datai, ya pesti ndai ngisak ke rumah ya debungkar. ⁴⁰ Kitak sik kalah siap sedia, empadai Anak Mensia datai rama te ndai kitak kira." ⁴¹ Jekuh petrus: "Tuhan, kami nama te Nuan maksud ngau perumpamaan yak atau semua urang?" ⁴² Saut Tuhan: "Jadi, sapa pengurus rumah te setia ngau bijaksana te bakal d'angkat urang tuai ya jadi kepalak atas semua hamba ya untuk merik pemakai ngau sidak rama senta? ⁴³ gaga hamba, te detemu tuan ya ngereja tugas ya yak, rama tuan ya yak datang. ⁴⁴ Aku madah kitak: Tuan yak bakal ngangkat ya untuk jadi pengawas semua empu ya. ⁴⁵ Tapi, antik hamba yak jaik ngau banai alam ati ya: Tuan ku ndai datai-datai, udek ya mulai maluk bala hamba bakas ngau hamba inuk, ngau makai minum ngau mabuk, ⁴⁶ maka tuan hamba yak bakal datai pada ari te ndai dekira ya, ngau rama te ndai deketau ya, ngau bakal munuh ya, ngau mulah ya jadi senasib ngau urang te ndai setia. ⁴⁷ Bisik hamba te ketau penekak tuan ya, tapi te ndai mulah persiapan atau te ndai mulah ke nama te kedekak tuan ya, ya bakal bulih mayuh paluk (pukulan). ⁴⁸ Tapi barangsapa te ndai ketau penekak tuan ya ngau mulah nama te kalah ngenatai ke pukulan, ya bakal bulih sikit pukulan. Setiap urang te ngau ya mayuh deberik, ari pada ya mayuh detuntut, ngau urang te lebih mayuh depecayak, ari pada ya bakal lebih mayuh agik detuntut." ⁴⁹ "Aku datai untuk nyempalung api ke bumi ngau betapa kah aku d'arap, api yak udah idup! ⁵⁰ Aku kalah nerimak baptisan, ngau betapa kah susah ati Ku, seapan hal yak ketengah (berlangsung)! ⁵¹ Kitak ngira, Aku datai ngemaik damai d'atau bumi? Bukai, jekuh Ku ngau kitak, bukai damai, tapi petangkap. ⁵² Empadai mulai re pitok bakal bisik pertentangan antara limak urang alam sebuah rumah, tiga ngelwan dua, ngau dua ngelawan tiga. ⁵³ Sidak bakal betentang sama direk, apai ngelawaan anak bakas ngau anak bakas ngelawan apai. Inai ngelawan anak inuk, ngau anak inuk ngelawan inai ya, mentua inuk ngelawan menantu inuk, ngau menantu inuk ngelawan mentua inuk ya." ⁵⁴ Yesus banai ugak ngau urang mayuh: "Antik kitak medak awan naik desepiak Barat, kitak kalah ngusung banai: Kak datai ujan, ngau hal yak benar tejadi. ⁵⁵ Ngau antik kitak medak ribut re Selatan besepu, kitak banai: Ari kak panas kayak, hal yak benar tejadi. ⁵⁶ Ui urang-urang munafik, upa bumi ngau langit kitak numut ngenilai ya, nama kitak ndai dapat menilai zaman tuk? ⁵⁷ Ngau nama kitak ndai ugak mutus ke kedirik nama te benar? ⁵⁸ Empadai, antik kitak ngau lawan kitak angkat ngadap pemerintah, berusaha bedamai ngau ya detengah jalai, isak nang sampai kitak dirit ya ngau hakim ngau hakim nyerah ke kitak ngau pemantuk ya, ngau pemantuk ya nyempalung kitak k'alam penyara. ⁵⁹ Aku madah kitak: Kitak ndai bakal keluar rin, seapan kitak mayar utang kitak sampai lunas."