Dosa ngau penisa ¹ Rama yak datai sidak ngau Yesus ngemaik berita tentang urang-urang Galilea, te darah ya decampur Pilatus ngau darah korban te sidak persembaahkan. ² Yesus nyaut sidak: "Sangkak kitak urang-urang Galilea tuk lebih besai dosa ya repada dosa semua urang Galilea bukai, empadai sidak mengalami nasib yak? ³ Ndai! Ku madah kita. Tapi antik kitak ndai betobat, kitak semua bakal benasa ngau cara piak. ⁴ Atau sangkak kitak kelapan belas urang, te mati detingang menara damping Siloam, lebih besai kesalah re semua urang bukai te nugau de Yerusalem? ⁵ Ndai! Ku madah kitak. Tapi antik kitak ndai betobat, kitak semua bakal benasa ngau cara piak." ⁶ Udek Yesus madah ke perumpamaan tuk: "Bisik surang te empu pun ara te tumuh de kebun anggur ya, ngau ya datai kak ngegak buah entang pun yak, tapi ya ndai sik nemu. ⁷ Udek ya banai ngau pengurus kebun anggur yak: Udah tiga taun aku datai ngegak buah entang pun tuk ngau aku ndai sik medak. Tebang pun tuk! Kak kenama ya idup detanah tuk ngau pecuma! ⁸ Saut urang yak: Tuan, isak ke ya tunuh taun tuk agik, aku bakal nyangkul tanah desekamat yak ngau merik ya pupuk, ⁹ amang taun tuk ilak ya bebuah; antik ndai, tebang na ya!" ¹⁰ Bisik sekalik Yesus ketengah ngajar de sebuah rumah ibadat pada ari Sabat. ¹¹ Diak bisik inuk te dah lapan belas taun kesarung roh nyak nyuruh ya sampai bungkuk pungung ya ngau ndai tau bediri ngau tegak agik. ¹² Rama Yesus medak inuk yak, Ya ngumai udek banai ngau inuk ya: "Ui ibuk, pemedih nuan dah semua." ¹³ Udek Ya ngeletak ke jari Ya atau inuk ya, ngau sekelin yak ugak, inuk ya bediri, ngau memulia ke Allah. ¹⁴ Tapi kepalak rumah ibadat yak sau empadai Yesus nyemuh ke urang pada ari Sabat, udek ya banai ngau urang mayuh: "Bisik enam ari untuk bekerja. Nyak nyuruh kalah datai pada salah sutik ari yak untuk desemuh ke ngau nang pada ari Sabat." ¹⁵ Tapi Tuhan nyaut ya, jekuh Ya: "Ui urang-urang munafik, ndai me setiap urang dentara kitak ngelepas ke lembu ya atau keledai ya pada ari Sabat re kanang ya ngau ngemaik ya ke tempat minuman? ¹⁶ Ndai kah inuk tuk, te udah lapan belas taun deketang ulih Iblis kalah delepas re penamat ya yak, empadai Ya yak kenturun Abraham?" ¹⁷ Ngau rama Ya banai miak, semua lawan Ya berasai malu, ngau semua urang mayuh gaga empadai semua pekara mulia, te dah depulah Ya. ¹⁸ Maka jekuh Yesus: "Sempama nama Kerajaan Allah, ngau nama Aku kalah ngumpama ke yak? ¹⁹ Ya sempama igik sesawi, te damik ngau desemai urang dekebun ya; igik yak tumuh ngau jadi pun ngau burung-burung de udara besarang entang dan-dan ya." ²⁰ Ngau Ya banai agik: "Ngau nama Aku ngumpama ke Kerajaan Allah? ²¹ Ya sempama ragi te damik surang inuk ngau degudak kalam tepung terigu tiga sukat sampai khamir semua yak." ²² Udek Yesus bejalai ngelingik re kota ke kota ngau ari desa ke desa samil ngajar ngau nyamung pejalai Ya ke Yerusalem. ²³ Bisik surang te banai ngau Ya: "Tuhan, sikit na nama urang te deselamat?" ²⁴ Saut Yesus ngau urang-urang diak: "Bejuang me untuk telus ngelalu lawang te sekut yak! Empadai Ku madah kitak: Mayuh urang berusaha kak tamak, tapi ndai dapat. ²⁵ Antik tuan rumah dah angkat ngau lawang, kitak bakal bediri deluar ngau ngetuk-ngetuk lawang samil banai: Tuan, bukak ke kami lawang! Ngau Ya bakal nyaut ngau banai ngau kitak: Aku ndai ketau reni mih datai. ²⁶ Maka kitak bakal banai: Kami dah makai minum dadap Nuan ngau Nuan dah ngajar de jalai-jalai kota kami. ²⁷ Tapi Ya bakal banai ngau kitak: Aku ndai ketau reni mih datai, rari na radap mua Aku, ui kitak semua te mulah pengenyaik! ²⁸ Din me bisik ratap ngau kerit gigi, antik kitak kak medak Abraham ngau Isak ngau Yakub ngau semua nabi alam Kerajaan Allah, tapi kitak kedirik dejuk keluar. ²⁹ Ngau urang datai re Timur ngau Barat ngau Utara ngau Selatan ngau sidak bakal duduk makai alam Kerajaan Allah. ³⁰ Ngau benar, bisik urang te penudi bakal jadi urang te peruba ngau urang te dulau bakal jadi penudi." ³¹ Rama yak datai limak nam urang Farisi banai ngau Yesus: "Angkat, dudi ke tempat tuk, empadai Herodes kak munuh Mih." ³² Saut Yesus ngau sidak: "Angkat, padah ngau serigala yak: Aku ngusir sitan ngau nyemuh ke urang, pada ari tuk ngau pagi, pada ari ketiga Aku dah temuk. ³³ Tapi ari tuk ngau pagi ngau lusak Aku kalah nampung pejalaiKu, empadai ndai semestinya surang nabi debunuh kalau ndai de Yerusalem. ³⁴ Yerusalem, Yerusalem, dirik munuh nabi-nabi ngau nyempalung ngau batu urang-urang te dutus ngau kitak! Bekalik-kalik Aku gauk ngumpul ke anak-anak dirik, upa inuk manuk ngumpul ke anak-anak ya debabah sayap ya, tapi dirik ngai. ³⁵ Sebenar rumah dirik tuk bakal dedudi ngau jadi sunyik. Tapi Aku ngau dirik: Dirik ndai bakal medak Aku agik sampai dirik banai: Deberkat Ya te datai atas nama Tuhan!"