Agik penyemuh pada ari Sabat ¹ Pada sutik ari Sabat Yesus datai ke rumah salah sikuk pemimpin re urang-urang Farisi untuk makai diak. Semua te bisik diak nguman ngupuk ke Ya bebuti. ² Tiba-tiba datai urang te kenak pedih busung aik bediri de mua Ya. ³ udek Yesus banai ngau bala ahli Taurat ngau urang-urang Farisi yak, jekuh Ya: "Tau ndai nyemuh ke urang pada ari Sabat?" ⁴ Sidak sunyik semua. Udek Ya megai jari urang te pedih yak ngau nyemuh ke ya udek nyuruh urang yak angkat. ⁵ Udek Ya banai ngau sidak: "Sapa dentara kitak te ndai lansung narik jari anak antik ya teberesuk kalam lubang, sekalikpun ari yak ari Sabat?" ⁶ Sidak ndai sangup mantah Ya. ⁷ Empadai Yesus medak, tamu-tamu diak berusaha duduk de tempat-tempat kehormatan, Ya madah perumpamaan tuk ngau sidak: ⁸ "Antik urang ngunang kitak ke gawai kawin, nang kitak duduk de tempat kehormatan, empadai amang urang yak dah ngunang urang te lebih terhormat repada kitak, ⁹ isak urang te ngunang kitak nang sampai banai ngau kitak: Berik ke tempat yak ngau urang in. Udek kitak ngau mua malu kalah pin'ah duduk de tempat te palin babah. ¹⁰ Tapi, antik kitak d'unang, duduk na de tempat te palin babah. Amang tuan rumah yak banai ngau kitak: Kaban, nuan duduk de mua. Ngau upa yak kitak nerimak hormat dadap mua semua tamu diak. ¹¹ Empadai barangsapa ningik ke dirik, ya derendah ke, ngau barangsapa ngerendah ke dirik ya bakal detingik ke." ¹² Yesus banai ugak ngau rang te ngunang Ya: "Antik mih mulah gawai lawas atau malam, nang mih ngunang bala kaban, bala menyanak, bala tetangga mih te idup bisik, empadai sidak pesti malas ngunang mih, ngau mih udah bulih upah ya. ¹³ Tapi antik kitak mulah gawai, unang na urang-urang meskin, urang-urang cacat, urang-urang lumpuh ngau urang-urang butak. ¹⁴ Ngau kitak bakal gaga, empadai sidak ndai sik nama-nama untuk malas kitak. Empadai kitak bakal bulih balas pada ari kebangkitan urang-urang benar." ¹⁵ Ninga miak, banai surang re re tamu-tamu diak ngau Yesus: "Gaga urang te bakal dejamu alam Kerajaan Allah." ¹⁶ Tapi Yesus banai ngau ya: "Bisik urang mulah gawai besai ngau ya ngunang mayuh urang. ¹⁷ Rama gawai yak dak kak mulai, ya nyuruh hamba ya madah ngau bala tamu undangan: Buh, empadai semua utai dah siap. ¹⁸ Tapi sidak bereta minta maaf. Te peruba banai ngau ya: Aku dah meli uma ngau aku kalah angkas medak ya; aku mintak demaaf ke. ¹⁹ Te bukai agik banai: aku dah meli limak pasang lembu kebiri ngau aku kalah angkat ngencuba ya; aku mintak demaaf ke. ²⁰ Te bukai agik banai: Aku baruk kawin nyak nyuruh aku ndai dapat datai. ²¹ Maka hamba yak bekalih, madah ke semua yak ngau tuan ya. Udek tuan rumah yak rutau udek banai ngau hamba ya: Angkat sigat ke semua jalai ngau jurung kota ngau baik kituk urang-urang miskin ngau urang-urang cacat ngau urang-urang buta ngau urang-urang lupuh. ²² Udek hamba yak ngelapor: Tuan, nama te tuan perintah ke yak dah kupuluh, tapi sekalikpun piak agik sik pengkerang. ²³ Udek jekuh tuan ngau hamba ya: Angkat ke semua jalai dan lintasan ngau paksa sidak te bisik diak, tamak, empadai rumah ku kalah penuh. ²⁴ Empadai aku madah kitak: Ndai sikuk pun re urang-urang te dah dunang yak bakal ngasai jamuanku." ²⁵ Bisik sekalik mayuh urang begerumung tamai Yesus alam pejalai Ya. Samil melingung Ya banai ngau sidak: ²⁶ "Antik kitak datai ngau Aku, ngau ya ndai ngemencik apai ya, inai ya, bini ya, anak-anak ya, menyadik bakas atau inuk, atau nyawa ya kedirik, ya ndai dapat jadi muridKu. ²⁷ Barangsapa ndai mikul salib ya ngau tamai Aku, ya ndai dapat jadi murid Aku. ²⁸ Empadai, sapa dentara kitak te antik kak niri ke sebuah menara ndai duduk dulau mulah anggaran biaya ya kalau-kalau cukup duit ya untuk betemuk kereja yak. ²⁹ Isak antik ya dah ngeletak dasar ya ngau ndai dapat betemuk ya, nang-nang semua urang te medfdak yak, ngejek ya, ³⁰ samil banai: Urang yak mulai niri ke tapi ya ndai sangup betemuk. ³¹ Atau, raja ni te antik kak angkat perang ngelawan raja lain ndai duduk dulau untuk nim'ang-nim'ang, apakah ngau sepuluh ribu urang ya sangup ngadap lawan te datai ngau ya ngau dua puluh ribu urang? ³² Antik ndai, ya bakal ngirim utusan selagik munsuh yak agik jauh untuk nanyak sarat damai. ³³ Piak ugak me tiap-tiap urang dentara kitak, te ndai ngelepas dirik ya ari semua pemisik ya, ndai dapat jadi murid Ku. ³⁴ Garam memang baik, tapi antik ya jadi tabar, ngau nama ya demasin? ³⁵ Ndai sik agik guna, untuk uma atau untuk pupuk ngau debuai urang na. Sapa bisik pening, ya kalah ninga!"