Perumpamaan tentang domba te ayap ¹ Bala pemungut cukai ngau urang-urang berdosa biasa datai ngau Yesus untuk ninga ke Ya. ² Nyak nyuruh urang-urang Farisi ngau ahli-ahli Taurat ngerungut, jekuh sidak: "Ya nerimak urang-urang berdosa ngau makai bereta tamai sidak." ³ Udek Ya madah ke perumpamaan tuk ngau sidak: ⁴ "Sapa dentara kitak dituk te bisik seratus ikuk domba, ngau antik ayap sikuk, ya ndai nudi ke te semilan puluh semilan ikuk yak ngau ngegak sikuk te sesat ya sampai detemu? ⁵ Ngau antik ya dah detemu ya, deengkah ya d'atau bau ngau gaga, ⁶ datai ke langkau ya ngumai bala kaban ngau bala tetangga ya sereta banai ngau sidak: Gaga me kitak tamai aku, empadai domba aku te ayap udah kutemu. ⁷ Aku madah kitak: Piak ugak pengaga de surga empadai sikuk urang bedosa te betobat, lebih repada te semilan puluh semilan urang benar te ndai merelu ke pertobatan." ⁸ "Atau inuk ni te bisik sepuluh dirham, ngau antik ya ayap sutik, ndai ngidup pelita ngau nyapu lantai, ngegak yak ngau bebuti sampai ya nemu? ⁹ Ngau antik ya dah nemu yak, ya ngumai bala kaban ngau tetangga ya, jekuh ya: "Gaga me kitak tamai aku empadai dirham ku te ayap dah kutemu. ¹⁰ Aku madah kitak: Piak ugak bakal bisik pengaga malaikat-malaikat Allah empadai sikuk urang bedosa betobat." ¹¹ Yesus banai agik: "Bisik urang empu dua anak bakas. ¹² Jekuh te bunsu ngau apai ya: "Apai, berik ngau aku pemisik empu kita te jadi hak aku. Udek apai ya magi-magi pemisik dentara sidak. ¹³ Dua tiga ari udah yak, anang bunsu yak nyual semua bagi ya, udek angkat ke negeri te jauh. Din ya ngabis ke semua pemisik ya ngau idup bepuya-puya. ¹⁴ Udah depabis semua yak, timul rama lapar de negeri yak ngau ya pun mulai melarat. ¹⁵ Udek ya angkat bekerja ngau majikan diak. Urang yak nyuruh ya kuma nyaga babi. ¹⁶ Udek ya ining ngisik perut ngau ampas te jadi umpan babi, tapi ndai sik urang te kak merik ngau ya. ¹⁷ Udek ya sadar ngau keadaan ya, jekuh ya: "Mayuh bebenar urang beupah ngau apai te belimpah-limpah pemakai, tapi aku dituk mati lepik. ¹⁸ Aku kak angkat ngau apai ku, kak banai ngau ya: Apai, aku dah bedosa ngau surga ngau nuan ugak, ¹⁹ aku ndai agik pantas dekumai anak apai; jadi ke aku urang te beupah na ngau apai. ²⁰ Maka ya angkat ngau apai ya, rama gik jauh, apai dah medak ya, tegerak ati apai ngau belaskasih. Apai ya beguang, mangkap ya ngau nyium ya. ²¹ Jekuh anak yak ngau ya: Apai, aku dah bedosa ngau surga ngau apai ugak, aku ndai gik pantas dekumai anak apai. ²² Tapi apai ya banai ngau bala hamba-hamba ya: Baik kituk sigat jubah te palin baik, saruk ke ngau ya, kenak ke cincin de jari ya, ngau sepatu de kaki ya. ²³ Ngau amik anak lembu gemuk yak, semelih ngau kita gawai (makai dan bersukacita). ²⁴ Empadai anak ku dah mati idup agik, dah ayap kutemu agik. udek mulai me sidak gaga. ²⁵ Tapi anak ya te tuai nugau d'uma, rama ya pulai dah minik rumah ya ninga ingan suling ngau tari-tarian. ²⁶ Udek ya ngumai sikuk hamba, lalu betanyak ngau ya, nama rete semua yak. ²⁷ Saut hamba yak: Saut hamba yak: Adik mih dah datai, apai mih nyemelih lembu gemuk ngau nyamut ya, empadai ya bulih adik mih sehat. ²⁸ Nyak nyuruh anak tuai yak luat ngau ngai tamak. Udek apai ya keluar banai ngau ya. ²⁹ Tapi ya nyaut apai ya, jekuh ya: Dah betaun-taun aku ngelayan apai, pan suah aku ngelangar perintah apai, tapi apai pan suah munuh ke aku kaming untuk aku besenang-senang ngau bala kaban aku. ³⁰ Tapi kemaya datai anak apai te dah ngabis ke semua pemisik tamai bala pelacur, apai nyemelih ke ya anak lembu gemuk. ³¹ Jekuh apai ya ngau ya: Anak, mih tamai aku selampur, semua empu aku empu mih ugak. ³² Kita patut gaga, empadai adik mih dah mati pituk idup, udah ayap pituk pulai."