Perumpamaan tentang bendahara te ndai jujur ¹ Yesus banai ngau murid-murid Ya: "Bisik surang kaya empu limak bendahara. Delapur ke ngau ya, bendahara ngamur ke pemisik ya. ² Udek ya ngumai bendahara yak, banai ngau ya: "Nama te dah ku dinga tentang dirik? Berik tangung jawab atas urusan dirik, empadai dirik ndai tau agik bekerja sebagai bendahara. ³ Jekuh bendahara yak alam ati ya: Nama te kalah kupulah deh? Tuan mecat aku re jabatan sebagai bendahara. Nyangkul aku ndai numut, ngemis aku malu. ⁴ Aku ketau nama te kalah kupulah, isak antik aku depecat re jabatanku sebagai bendahara, bisik urang te kak nerimak (menampung) aku de rumah sidak. ⁵ Udek ya ngumai sikuk-sikuk urang te berutang ngau yaJekuh ya ngau te peruba: Berapa utang mih ngau tuan aku? ⁶ Saut urang yak: Seratus tepayan minyak. Udek jekuh ya ngau mensia yak: Tuk surat utang mih, duduk ngau pulah agik surat utang bukai skelin tuk: Limak puluh tepayan. ⁷ Udek ya banai ngau urang kedua: Berapa utang mih? Saut urang yak: Seratus pikul genum. Jekuh ya ngau urang yak: Tuk surat utang mih, pulah surat utang bukai: Lapan puluh pikul. ⁸ Udek tuan yak muji bendahara te ndai jujur yak, empadai ya udah betindak cerdik. Empadai anak-anak denia lebih cerdik re anak-anak terang. ⁹ Aku madah kitak: Kebat persahabatn kitak ngau Mamon te ndai jujur, isak antik Mamon yak ndai dapat nulung agik, kitak deterimak alam kemah abadi." ¹⁰ "Barangsapa setia alam pekara-pekara mit, ya setia ugak alam pekara-pekara besai. Ngau barangsapa ndai benar ngau pekara-pekara mit, ya ndai benar ugak alam pekara-pekara besai. ¹¹ Jadi, antik kitak ndai setia alam hal Mamon te ndai jujur, sapa te kak pecayak ke ngau kitak reta te sebenar? ¹² Ngau antik kitak ndai setia alam reta te bukai, sapa te nyerah ke reta kitak ngau kitak? ¹³ Surang hamba ndai dapat ngabdi ngau dua tuan. Empadai antik upa yak, ya bakal ngasih te surang ngau ngemencik te surang agik, atau ya bakal setia ngau te sikuk ngau ndai peduli ngau te sikuk agik. Kitak ndai dapat mengabdi Allah ngau Mamon sekalikgus." ¹⁴ Semua yak dedinga urang-urang Farisi, bala hamba duit yak, ngau sidak ngencemooh Ya. ¹⁵ Udek Ya banai ngau sidak: "Kitak ngemenar ke dirik de mua urang, tapi Allah ketau ati kitak. Empadai nama te depuji mensia debencik Allah. ¹⁶ Ukum Taurat ngau kitab bala nabi belaku sampai ngau zaman Yohane; ngau mulai rama yak Kerajaan Allah depadah, ngau tiap urang berebut tamak. ¹⁷ Lebih mudah langit ngau bumi lenyap repada setitik re ukum Taurat balang. ¹⁸ Tiap urang te nyarak bini ya, udek kawin ngau inuk bukai, ya bebuat zinah; ngau barangsapa kawin ngau inuk te desarak laki ya, ya bebuat zinah. ¹⁹ "Bisik urang kaya te seruntik bepengau jubah ungu ngau kain alus, tiap ari ya gaga alam kemewah ya. ²⁰ Ngau bisik pengemis te benama Lazarus, tubuh ya penuh bisul (borok) galai damping lawang urang kaya, ²¹ ya ining kak ngayap ke lapar ngau nama te jatuk re mija urang kaya yak. Malah bala ukui datai nilat bisul ya ²² Udek mati urang miskin yak, debaik bala malaikat ke pangkuk Abraham. ²³ Urang kaya yak mati ugak udek dekubur. Sementara ya sisa sensara de alam maut, ya ngupuk ke katau, re jauh depedak ya Abraham, ngau Lazarus duduk de pangkuk ya. ²⁴ Udek ya banai, jekuh ya: Apai Abraham, kasih me ke aku. Suruh Lazarus, isak ya nculup ke ujung jariya kalam aik ngau nyejuk ke dilah aku, empadai aku pedih bebenar alam dilah api tuk. ²⁵ Tapi Abraham banai: Anak, kingat ke mih dah nerimak semua te baik selagik idup, sedang ke Lazarus semua te jaik. Pituk ya diibur ngau mih sisa bebenar. ²⁶ Selain repada yak, dentara kami ngau mih tebentang jurang te ndai mampu deseberang, isak sidak te kak angkat retuk ngau mih, ataupun sidak reyak te kak datai kituk ndai dapat nyemerang. ²⁷ Jekuh urang yak: Antik piak aku mintak muhun ngau nuan apai, suruh ya ke langkau apai aku, ²⁸ empadai agik sik limak urang menyadik aku, isak ya ngingat ke sidak bebenar, isak sidak page lusak ndai tamak kalam penisa tuk. ²⁹ Tapi jekuh Abraham: Bisik ntang sidak kesaksian Musa ngau bala nabi; baik sidak ninga ke yak na. ³⁰ Saut urang yak: Ndai, apai Abraham, antik bisik urang datai re entara urang mati ngau sidak, sidak bakal betobat. ³¹ Jekuh Abraham ngau ya: Antik sidak ndai ninga kesaksian Musa ngau bala nabi, sidak ndai ugak kak depadah, sekalikpun ulih urang te bangkit rentara urang mati."