Nasihat ¹ Yesus banai ngau murid-murid Ya: "Ndai patut ndai sik penyesatan, tapi celaka me urang te mulah yak. ² Lebih baik bagi ya antik batu kilangan deketang de rekung ya, udek desempalung kalam laut, repada nyesat ke salah sikuk re urang-urang lemah tuk. ³ Jaga dirik kitak! Antik menyadik kitak mulah dosa, rara ya, ngau antik ya nyesal, ampun ya." ⁴ Antik ya mulah dosa ngau kitak tujuh kalaik sari, ngau tujuh kalaik ugak ya datai ngau kitak samil banai: Aku nyesal, kitak kalah ngampun ya." ⁵ Udek jekuh rasul-rasul yak ngau Tuhan: "Tamah ke iman kami!" ⁶ Saut Tuhan: "Antik sekira kitak bisik iman mesai igik sesawi na, kitak tau banai ngau pun ara tuk: Tebantun riak ngau tetanam alam laut, ngau ya bakal taat ngau kitak." ⁷ "Sapa dentara kitak te bisik sikuk hamba te ngebajak ngau ngintu pengidup bagi ya, bakal banai ngau hamba yak, seudah ya pulai re uma: Buh makai pituk! ⁸ Ndai me sempalik ya banai ngau hamba yak: Siap ke pemakai ku. Ketang pungung dirik ngau layan aku sampai temuk makai minum. ⁹ Bisik ndai ya beterimak kasih ngau hamba yak, empadai hamba yak dah ngereja ke nama te detugas ke ngau ya? ¹⁰ Piak ugak kitak. Antik kitak udah mulah nama semua te detugas ke ngau kitak, kitak kalah banai: Kami tuk hamba-hamba te ndai beguna; kami sangak mulah nama te kalah kami pulah." ¹¹ Alam pejalai Ya ke Yerusalem, Yesus nganyak batas Samaria ngau Galilea. ¹² Rama Ya tamak ke sutik desa, datai sepuluh urang kusta nemu Ya. Sidak nugau bediri agak jauh ¹³ ngau mangkas: "Yesus, Guru, kasih ke kami!" ¹⁴ Udek Ya ngupuk ke sidak ngau banai: "Angkat, padah ke dirik ngau imam-imam." Ngau sementara sidak detengah jalai, sidak dah tahir. ¹⁵ Sikuk dentara sidak, rama medak direk semuh, bekalih samil memulia ke Allah ngau ingan kayah, ¹⁶ udek tesungkam de kaki Yesus ngau ngucap sukur ngau Ya. Yak urang Samaria. ¹⁷ Udek Yesus banai: "Ndai me kesepuluh urang tadik semua tahir? Dini te semilan urang? ¹⁸ Ndai sik nama dentara sidak te bekalih memulia ke Allah bukai re urang tuk?" ¹⁹ Udek Ya banai ngau urang yak: "Bediri ngau angkat, iman dah nyelamat ke dirik." ²⁰ Atas tanyak urang-urang Farisi, antik Kerajaan Alalah bakal datai, Yesus nyaut, jekuh Ya: "Kerajaan Allah datai ndai sik kecelik, ²¹ urang sik ndai tau madah: Pedak, pedak ya bisik dituk atau ya bisik din! Empadai sebenar Kerajaan Allah bisik dentara kitak." ²² Ya banai ngau murid-murid Ya: "Bakal datai rama kitak ining kak medak sekalik re ari-ari Anak Mensia yak ngau kitak ndai bakal medak. ²³ Ngau urang bakal banai ngau kitak: Pedak, ya bisik din, ya bisik dituk! Nang kitak kiak, nang kitak tamai. ²⁴ Empadai upa kilat mancak re ujung langit sutik ke ujung langit sutik agik, piak ugak page lusak Anak Mensia pada ari penatai Ya. ²⁵ Tapi Ya kalah nanagung mayuh penisa lau ngau ndai deterimak angkatan tuk. ²⁶ Sama ngau te udah tejadi de zaman Nuh, piak ugak page lusak ari-ari Anak Mensia: ²⁷ sidak makai minum, kawin ngau dekawin, sampai pada ari Nuh tamak kalam perau, udek datai aik bah ngemenasa ke sidak semua. ²⁸ Piak ugak upa te tejadi de zaman Lot: sidak makai minum, sidak bejual beli, sidak nanam ngau membangun. ²⁹ Tapi rama Lot angkat keluar re Sodom, turun ujan api ngau ujan belerang re langit ngau ngemenasa ke sidak semua. ³⁰ Piak ugak me page rama Anak Mensia madah ke direk. ³¹ Barangsapa pada ari yak ketengah beribut datau atap ngau bala barang ya bisik alam rumah, nang sampai ya turun ngamik, piak ugak ngau urang te ketengah d'uma, nang ya bekalih. ³² Kingat ke bini Lot! ³³ Barangsapa berusaha nyaga nyawa ya, ya bakal ayap nyawa, ngau barangsapa ayap nyawa, ya bakal nyelamat ke ya. ³⁴ Aku madah kitak: Pada malam yak bisik dua urang datau peninuk, surang debaik, te surang dedudi. ³⁵ bisik dua ikuk inuk bereta mengilang, te sikuk debaik te sikuk agik dedudi." ³⁶ Antik bisik dua urang duma, sikuk debaik, te sikuk agik dedudi. ³⁷ Jekuh sidak ngau Yesus: "Dini, Tuhan?" Jekuh Ya ngau sidak: "Dini bisik mayat, diak begerumung burung Nasar."