Perumpamaan tentang hakim te ndai benar ¹ Yesus madah sutik perumpamaan ngau sidak untuk negas ke antik sidak kalah bedoa ndai jemu-jemu. ² Jekuh Ya: "Alam sebuah kota bisik hakim te ndai takut ngau Allah ngau ndai ngehormat sapa-sapa. ³ Ngau de kota yak bisik sikuk janda te seruntik datai ngau hakim yak, samil banai: Pangan ke hak aku teradap lawan aku. ⁴ Pelelamak hakim yak ngai (nolak) Tapi udek hakim yak banai alam ati ya: Walaupun aku ndai takut ngau Allah ngau ndai ngehormat sapa-sapa, ⁵ tapi empadai janda tuk nyusah ke aku, isak me aku ngemenar ke ya, isak ya nang seruntik datai ngau udek nyerang aku." ⁶ Jekuh Tuhan: "Cam ke nama te jekuh hakim te lalim yak! ⁷ Ndak me Allah bakal ngemenar ke urang-urang pemilih Yate lawas malam beseru ngau Ya? adai me bisik Ya ngulur-ngulur waktu seapan nulung sidak? ⁸ Aku madah kitak: Ya lansung ngemenar ke sidak. Tapi, antik Anak Mensia datai, bisik ndai Ya nemu iman de bumi?" ⁹ Ngau sidak te madah dirik benar ngau medak semua urang bukai salah, Yesus madah perumpamaan tuk: ¹⁰ "Bisik dua urang angkat ke Bait Allah kak bedoa; te sikuk urang Farisi ngau te sikuk agik pemungut cukai. ¹¹ Urang Farisi yak bediri ngau bedoa alam ati ya piak: Allah, aku ngucap syukur ngau Nuan, empadai aku ndai sama ngau semua urang bukai, bukai perampuk, bukai urang lalim, bukai pezinah, ngau bukai ugak upa pemungut cukai in; ¹² aku bepuasa dua kalik semingu, aku merik sepuluh bage re pengasil aku. ¹³ Tapi pemungut cukai bediri jauh-jauh, ya sampai ndai tekik ngupuk ke langit, ya maluk dirik samil banai: Ya Allah, kasih ke aku urang bedosa tuk. ¹⁴ Aku madah kitak: Urang tuk pulai ke rumah sebagai urang te debenar ke Allah ngau sikuk agik ndai. Empadai barangsapa ningik ke dirik, ya depebabah, ngau barangsapa ngerenah ke dirik, ya bakal detingik ke." ¹⁵ Datai bala urang ngemaik nemiak mit ngau Yesus, isak Ya nyapai sidak. ¹⁶ Tapi Yesus ngumai sidak ngau banai: "Isak bala nemiak yak datai ngau Aku, ngau nang kitak mekang sidak, empadai urang te upa yak me te empu kerajaan Allah. ¹⁷ Aku madah kitak: Sebenar, barangsapa ndai nyamut Kerajaan Allah upa nemiak mit, ya ndai bakal tamak ke dalam yak." ¹⁸ Bisik surang pemimpin betanyak ngau Yesus, jekuh ya: "Guru te baik, nama te kalah ku pulah isak bulih idup te kekal?" ¹⁹ Saut Yesus: "Nama nok dirik madah Aku baik? Ndai sik te baik bukai re Allah na. ²⁰ Dirik tentu ketau semua perintah Allah: Nang bejinah, nang munuh, nang encuri, nang besaksi bulak, hormat ngau apai inai." ²¹ Jekuh urang yak: "Semua yak dah kutunak mulai re kebiak." ²² Ninga miak Yesus banai ngau ya: "Agik tedudi sutik agik te kalah dirik pulah: jual semua pemisik, debagi ke ngau bala urang meskin, maka dirik bakal bulih reta de surga, udek datai kituk ngau namai Aku." ²³ Rama mensia yak ninga anai yak, ya sedih bebenar empadai ya kara bebenar. ²⁴ Udek Yesus ngupuk ke ya ngau banai: "Pedih bebenar urang kaya tamak kalam Kerajaan Allah. ²⁵ Empadai lebih mudah unta tamak ngelalu lubang jarum repada urang kaya tamak kalam Kerajaan Allah. ²⁶ Ngau sidak te ninga anai yak banai: Antik upa yak, sapa te tau deselamat ke?" ²⁷ Jekuh Yesus: Nama te ndai mungkin bagi mensia, mungkin bagi Allah." ²⁸ Petrus banai: "Kami tuk dah nudi ke semua empu kami ngau namai Nuan." ²⁹ Jekuh Yesus ngau sidak: "Aku madah kitak, tiap urang te empadai Kerajaan Allah nudi ke laangkau ya, bini, menyadik, urang tuai, bala anak ya, ³⁰ bakal bulih belipat-lipat rama tuk ugak, ngau page lusak ya bulih idup kekal." ³¹ Yesus ngumai kedua belas murid Ya, udek banai ngau sidak: "Pituk kita angkat ke Yerusalem, ngau semua utai te detulis bala nabi tentang Anak Mensia bakal degenap. ³² Empadai Ya bakal deserah ngau bala bansa te ndai ngelala Allah, dekeluluk, dehina, ngau deludah, ³³ sidak nyesah ngau munuh Ya, ngau ari ketiga Ya bakal bangkit." ³⁴ Tapi sidak sama sekalik ndai nyaruk semua yak; reti anai yak tepelabuk bagi sidak ngau sidak ndai ketau nama te jekuh Ya. ³⁵ Rama Yesus dah kak datai de Yerikho, bisik urang butak ketengah duduk de sisi jalai ngau mintak-mintak. ³⁶ Rama mensia yak ninga urang mayuh ngelalu, ya betanyak: "Nama yak?" ³⁷ Jekuh sidak ngau ya: "Yesus urang Nazaret ngelalu." ³⁸ Udek ya mangkas: "Yesus, Anak Daud, kasih ke aku!" ³⁹ Nyak nyuruh, sidak te bejalai demua ya ngerara ya isak ya sunyik. Tapi makin kayah ya mangkas: "Anak Daud, kasih me ke aku!" ⁴⁰ Udek Yesus betegak, nyuruh urang ngemaik mensia yak ngau Ya. Ngau rama mensia yak dah damping ngauYa, Yesus betanyak: ⁴¹ "Nama te kedekak nuan isak Kupulah?" Saut urang yak: "Tuhan, isak aku tau medak!" ⁴² Udek jekuh Yesus ngau ya: "Medak em mih, iman mih dah nyelamat ke mih!" ⁴³ Ngau sekelin yak medak, udek tamai Yesus memulia ke Allah. Seluruh rakyat te medak hal yak muji-muji Allah.