Zakeus ¹ Yesus tamak ke kota Yerikho ngau bejalai ngelintas kota yak. ² Diak bisik urang te benama Zakheus, kepalak pemungut cukai, ngau ya urang te kaya. ³ Ya berusaha medak urang nama Yesus yak, tapi ya ndai berasil empadai urang mayuh, empadai tubuh ya pan'us. ⁴ Nyak nyuruh ya rari ngelih urang mayuh, udek naik pun ara kak medak Yesus te kak ngelalu riyak. ⁵ Rama yesus datai kiak, Ya ngupuk katau samil banai: "Zakheus, turun sigat, empadai ari tuk Aku numpang de langkau mih." ⁶ Udek Zakheus lansung turun ngau nerimak Yesus ngau gaga. ⁷ Tapi semua te medak yak ngerungut, jekuh sidak: "Ya numpang de langkau urang berdosa." ⁸ Tapi Zakheus bediri, banai ngau Tuhan: "Tuhan, setengah re empu aku kuberik ngau urang meskin, ngau sekira bisik utai te kuperas re urang bakal kupulang empat kalik lipat." ⁹ Jekuh Yesus ngau ya: "Ari tuk udah tejadi keselamatan de rumah tuk, empadai urang tuk sik anak Abraham. ¹⁰ Empadai Anak Mensia datai untuk ngegak ngau nyelamat ke te ayap." ¹¹ Untuk sidak te ninga Ya diak, Yesus nampung anai Ya tadik ngau sutik perumpamaan, empadai Ya dah damping Yerusalem ngau sidak ngira, Kerajaan Allah kenak pedak sekelin. ¹² Nyak nyuruh Ya banai: "Bisik urang bangsawan angkat ke negeri te jauh, untuk denobat jadi raja din, udek baru bekalih. ¹³ Ya ngumai sepuluh urang hamba ya, ngau merik ke sepuluh mina ngau sidak, jekuh ya: "Ngau tuk untuk bedagang sampai aku datai kituk agik. ¹⁴ Tapi urang-urang sebansa ya ngemencik ya, udek ngirim urang suruh nyusul ngau madah: Kami ndai kak urang tuk jadi raja kami. ¹⁵ Ngau tejadi, rama ya pulai, udah denobat ke jadi raja, ya nyuruh ngumai hamba-hamba ya te udah deberik duit, untuk ngetau berapa asil dagang sidak sikuk surang. ¹⁶ Urang peruba datai ngau banai: Tuan, mina tuan te sutik yak dah ngasil ke sepuluh mina. ¹⁷ Jekuh ya ngau urang yak: Baik nar pempulah dirik, hamba te baik; dirik dah setia ngau pekara mit, nyak nyuruh, terimak me kekuasaan atas sepuluh kota. ¹⁸ Datai ugak te kedua ngau banai: "Tuan, mina tuan ngasil ke limak mina. ¹⁹ Jekuh ya ngau urang yak: Ngau dirik, kuasa ke limak kota. ²⁰ Ngau hamba te ketiga datai ngau banai: Tuan, tuk mina tuan, aku taruh alam sapu tangan. ²¹ Empadai aku takut ke nuan, empadai tuan yak mensia te kerampak (keras); tuan ngamik nama te ndai suah tuan taruh, ngau tuan mutik nama te ndai suah tuan tanam. ²² Jekuh ya ngau urang yak: Ui hamba te jaik, aku bakal ngehakim dirik sesuai ngau anai dirik. Dirik dah ketau aku uraang kerampak, ngamik nama te ndai kutaruh, mutik nama te ndai ku tanam. ²³ Antik piak, nama duit aku yak ndai dirik berik ngau urang te nyalai ke duit? Maka pas ku bekalih, aku tau ngamik yak sereta ngau bunga. ²⁴ Udek jekuh ya ngau bala urang te bediri diak: Amik mina te sutik yak re ya, berik ke ngau urang te bisik sepuluh mina. ²⁵ Jekuh sidak ngau ya: Tuan, ya dah bisik sepuluh mina. ²⁶ Saut ya: Aku madah kitak: tiap urang te bisik, ngau ya bakal deberik, tapi sapa te ndai sik, nama te re ya damik. ²⁷ Tapi semua seteru te ndai senang ku jadi raja, baik kituk ngau bunuh sidak dadap mua aku." ²⁸ Udah madah semua yak, Yesus ngenulau sidak nampung pejalai ke Yerusalem. ²⁹ Rama Ya dah damping Betfage ngau Betania, te teletak de bukit te penama Zaitun, Yesus nyuruh dua urang murid Ya ³⁰ ngau pesan: "Angkat ke kampung de mua kitak yak: Rama kitak tamak kiak, kitak bisik medak sikuk keledai biak tetamat, te pan suah detumpang urang. Lepas ke keledai yak, baik kituk. ³¹ Ngau antik bisik urang betanyak ngau kitak: Nama pulah kitak ngelepas? saut miak: Tuhan merelu yak." ³² Udek angkat sidak te desuruh yak, ngau sidak nemu upa te depadah ke Yesus ngau sidak. ³³ Rama sidak ngelepas keledai yak, urang te empu keledai yak banai: "nama kitaak ngelepas keledai yak?" ³⁴ Jekuh sidak: "Tuhan merelu yak." ³⁵ Sidak ngemaik keledai yak ngau Yesus, udek ngalas ya ngau pengau sidak, ngau nulung Yesus naik katau ya. ³⁶ Ngau rama Yesus numpang keledai yak, sidak ngampar ke pengau de jalai. ³⁷ Rama Ya damping Yerusalem, de tempat jalai nurun re Bukit Zaitun, mulai semua murid te ngelingik Ya gaga ngau muji Allah ngau ingan kayah ulih empadai semua mujizat te dah sidak pedak. ³⁸ Jekuh sidak: "Deberekat Ya te datai sebagai Raja alam nama Tuhan, damai sejahtera de surga ngau kemuliaan de tempat te palin tingik!" ³⁹ Mayuh (beberapa) urang Farisi te tamai ngau urang mayuh yak banai ngau Yesus: "Guru, rara murid-murid Mih yak." ⁴⁰ Saut Ya: "Aku madah kitak: Antik sidak sunyik, maka batu tuk te banai." ⁴¹ Ngau rama Yesus dah damping ngau medak kota yak, ya nyabak ke yak, ⁴² jekuh Ya: "Ui dai, baik nar antik ari tuk ugak kitak nyaruk nama te perelu untuk damai sejahtera kitak! Tapi pituk hal tuk tepelabuk bagi mata kitak. ⁴³ Empadai bisik datai ari yak, munsuh bakal ngelingik kitak ngau gerup (kubu), udek ngepung kitak re semua penyuru, ⁴⁴ ngau sidak bakal ngemenasa ke kitak sereta ngau penduduk kitak ngau entang pagar (tembok) sidak ndai bakal ngisak ke batu sutik tesusun datai batu bukai, empadai kitak ndai ketau sebila, Allah nyaga (melawat) kitak." ⁴⁵ Udek Yesus tamak ke Bait Allah ngau mulai ngusir sidak semua pedagang diak, ⁴⁶ jekuh Ya ngaau sidak: "Bisik tetulis: Rumah Ku yak rumah doa. Tapi kitak nyadi ke yak sarang penyamun." ⁴⁷ Tetiap ari Ya ngajar alam Bait Allah. Imam-imam kepalak ngau ahli-ahli Taurat ngau urang tekemuka re bansa Israel berusaha kak ngeminasa ke Ya, ⁴⁸ tapi sidak ndai ketau tipa cara ngereja yak, empadai seluruh rakyat tepikat ngau Ya ngau ining ninga ke Ya.