Penanyak ngenak Kuasa Yesus ¹ Bisik ari rama Yesus ngajar urang mayuh de Bait Allah ngau madah ke Injil, datai imam-imam kepalak, ahli-ahi Taurat ngau bala tuai kiak, ² sidak betanyak ngau Yesus: "Padah ngau kami, ngau kuasa ni Mih mulah bala hal tuk, ngau sapa te merik kuasa yak ngau Mih!" ³ Saut Yesus ngaua sidak: "Aku sik kak nanyak kitak ugak. Padah ngau Aku: ⁴ Baptisan Yohanes yak, re surga atau re mensia?" ⁵ Sidak nim'ang-nim'ang dentara sidak, ngau banai: "Antik kita madah: Re surga, Ya bakal madah: Nama kitak ndai pecayak ngau ya? ⁶ Tapi antik kita madah: Re mensia, seluruh rakyat nikam kita ngau batu, empadai sidak yak pecayak Yohanes yak nabi." ⁷ Udek sidak nyaut, antik sidak ndai ketau reni baptisan yak. ⁸ Maka jekuh Yesus ngau sidak: "Antik piak Aku sik ngai madah kitak ngau kuasa nama Aku mulah bala hal yak." ⁹ Udek Yesus madah perumpamaan tuk ngau urang mayuh: "Surang mukak kebun anggur; udek ya nyewa ke yak ngau bala pengarap, udek angkat lamak ke negeri bukai. ¹⁰ Ngau rama dah senta musim nyak, ya nyuruh surang hamba ngau pengarap-pengarap yak, isak sidak nyerah ke bage re asil kebun anggur yak ngau ya. Tapi pengarap-pengarap yak maluk hamba yak ngau nyuruh hamba yak pulai puang. ¹¹ Udah yak ya nyuruh hamba bukai, tapi hamba yak sik depaluk ugak, ngau depemalu sidak, udek desuruh pulai puang. ¹² Udek ya nyuruh hamba te ketiga, tapi urang yak depedih sidak ugak, udek desempalung sidak keluar kebun. ¹³ Nyak nyuruh, jekuh tuan kebun anggur yak: Nama te kalah kupulah? Aku kak nyuruh anak te dekasih aku, pasti sidak segan ngau ya. ¹⁴ Tapi rama pengarap-pengarap yak medak anak ya, sidak bepekat, jekuh sidak: Ya yak ali waris, buh kita munuh ya, isak warisan jadi empu kita. ¹⁵ Udek sidak nyempalung ya ke luar kebun anggur ngau munuh ya. Pituk nama te bakal depulah tuan kebun anggur yak ngau sidak? ¹⁶ Ya bakal datai ngemenasa ke pengarap-pengarap yak, ngau mecayak ke kebun anggur yak ngau urang bukai." NInga yak sidak banai: "Sekalik-kalik nang!" ¹⁷ Tapi Yesus ngupuk ke sidak ngau banai: "Antik piak nama reti semua nas tuk: Batu te debuai tukang, bakal jadi batu penyuru? ¹⁸ Barangsapa jatuk katau batu yak, ya dedak, ngau barangsapa detingang batu yak, ya depu." ¹⁹ Udek imam-imam kepalak ngau ahli-ahli Taurat berusaha kak nangkap Ya sekelin yak ugak, empadai sidak ketau, sidak me te depanai ke Yesus ngau perumpamaan yak, tapi sidak takut ngau urang mayuh. ²⁰ Ahli-ahli Taurat ngau imam-imam kepalak ngupuk ke Yesus. Sidak nyuruh mata-mata te bempulah seulah-ulah urang jujur datai ngau Ya, isak sidak tau nyerat Ya ngau bala pertanyaan ngau nyerah ke Ya ngau wewenang wali negeri. ²¹ Bala urang yak ngaju ke tanyak tuk ngau Ya: "Guru, kami ketau, anai ngau pengajar Nuan yak kenak, ngau Nuan ndai ngegak mua, tapi ngau jujur ngajar jalai Allah. ²² Kami tau mayar pajak ngau kaisar ndai?" ²³ Tapi Yesus ketau maksud sidak te licik, udek Ya banai ngau sidak: ²⁴ "Tunjuk ke ngau Aku sutik dinar; gamar ngau tulis sapa diak?" Saut sidak: "Gamar ngau tulis Kaisar." ²⁵ Udek jekuh Yesus ngau sidak: "Antik piak, berik ngau Kaisar nama te kalah kitak berik ngau Kaisar, berik ngau Allah nama te kalah kitak berik ngau Allah!" ²⁶ Ngau sidak ndai dapat nyerat Ya alam anai Ya de mua urang mayuh. Sidak ikan saut Ya yak ngau sidak sunyik. ²⁷ Maka, datai ngau Yesus, urang Saduki te ndai ngakuk bisik kebangkitan. Sidak betanyak ngau Ya: ²⁸ "Guru, Musa nulis perintah tuk untuk kita: Antik urang bisik menyadik bakas, mati nudi ke bini ya, tapi ndai sik nudi ke anak, menyadik ya kalah jadi ngau bini ya ngau mulah kenturun bagi menyadik ya yak. ²⁹ Bisik tujuh urang menyadik. Te peruba kawin ngau inuk, udek mati ngau ndai sik nudi ke anak. ³⁰ Udek inuk yak dekawin te numur dua, ³¹ ngau ulih te ketiga sampai ketujuh menyadik, semua mati ndai nudi ke anak. ³² Udek inuk yak mati ugak. ³³ Pituk tipa ngau inuk yak, sapa dentara sidak te jadi laki ya rama ari kebangkitan? Empadai ketujuh menyadik bebini ke ya." ³⁴ Saut Yesus ngau sidak: "Urang-urang denia tuk kawin ngau dekawin, ³⁵ tapi sidak te dangap layak bulih bagi alam denia lain ngau alam kebangkitan re entara urang mati, ndai kawin ngau dekawin. ³⁶ Empadai sidak ndai dapat mati agik; sidak sama upa malaikat-malaikat ngau sidak yak anak-anak Allah, empadai sidak udah debangkit ke. ³⁷ tentang pemangkit urang-urang mati, Musa dah madah ke yak alam nas tentang rampuk durik, dini Tuhan detelah Allah Abraham, Allah Ishak, ngau Allah Yakub. ³⁸ Ya bukai Allah urang mati tapi Allah urang idup, empadai de mua Ya semua urang idup." ³⁹ Ninga yak, ahli Taurat banai: "Guru, saut Nuan yak nampal nar." ⁴⁰ Empadai sidak ndai tekik agik nanyak ke nama-nama ngau Yesus. ⁴¹ Tapi Yesus banai ngau sidak: "Tipa urang tau madah, Mesias Anak Daud? ⁴² Empadai Daud kedirik banai alam kitab Mazmur: Tuhan dah befirman ngau Tuanku: duduk me desepiak kanan Aku, ⁴³ sampai Ku puluh munsuh-munsuh Mih jadi penumpu kaki Mih. ⁴⁴ Antik Daud madah Ya yak Tuan, tipa patut Ya anak Daud ugak?" ⁴⁵ Rama semua urang mayuh ninga, Yesus banai ngau murid-murid Ya: ⁴⁶ "Belubah teradap ahli-ahli Taurat te rajin bejalai ngau jubah panyai ngau tugam nerimak penghormatan de pasar, te tugam duduk de mua de rumah ibadat ngau tempat terhormat de gawai, ⁴⁷ te nelan langkau bala janda, ngau te ngelabuk mata urang ngau doa te panyai-panyai. Sidak yak pesti bakal nerimak ukuman te lebih berat."