Persembahan janda meskin ¹ Rama Yesus ngangkat mua Ya, Ya medak urang-urang kaya nepuk persembahan sidak kalam peti. ² Ya medak ugak surang janda meskin nepuk ke dua pisir kalam peti yak. ³ Udek Ya banai: "Aku madah kitak, janda meskin yak merik lebih mayuh repada semua urang bukai. ⁴ Empadai sidak bukai merik persembahan re kelebih, tapi janda tuk merik re kekurang, ya merik semua empu ya." ⁵ Rama urang banai tentang Bait Allah ngau muji bangunan yak te dehias ngau batu te baik-baik, ngau mayuh macam persembahan, Yesus banai: ⁶ " Nama te kitak pedak diak---bakal datai ari, dini ndai sik sigik batu tesusun atau batu te bukai; semua bakal dererak." ⁷ Murid-murid betanyak ngau Yesus, jekuh sidak: "Guru, sebila yak bakal tejadi? Nama kecelik antik yak tejadi?" ⁸ Saut Ya: "Ati-ati, nang sampai kitak desesat ke. Empadai mayuh urang datai mengau nama Aku ngau banai: Aku me Ya, ngau: Senta dah damping. Nang kitak tamai sidak. ⁹ Ngau antik kitak ninga tentang perang ngau pemeruntak, nang kitak tekejut. Empadai semua yak kalah tejadi dulau, tapi ndai bereti yak kebaduk bakal datai sekelin." ¹⁰ Ya banai ngau sidak: "Bansa bangkit ngelawan bansa, kerajaan ngelawan kerajaan, ¹¹ ngau bakal tejadi gempa bumi te hebat de sekamat tempat, ngau bisik pemedih sampar ngau lapar, ngau bakal tejadi ugak hal-hal te nyuruh tekejut ngau kecelik-kecelik te hebat re langit. ¹² Tapi seapan semua yak, kitak bakal detangkap ngau desisa; kitak bakal deserah ke rumah ibadat ngau penyara-penyara, ngau kitak bakal dadap ngau raja-raja ngau penguasa-penguasa empadai nama Aku. ¹³ Hal bakal jadi kesempatan kitak ngau besaksi. ¹⁴ Nyak nyuruh tetap ke alam ati kitak, isak kitak nang mikir dulau mangan ke dirik. ¹⁵ Empadai Aku kedirik merik kitak igik anai hikmat, te nyuruh kitak ndai tau detentang atau debantah lawaan-lawan kitak. ¹⁶ Ngau kitak bakal deserah ulih urangtuai kitak, menyadik kitak, menyanak bilik, kaban belayan, ngau mayuh dentara kitak bakal debunuh ¹⁷ ngau kitak bakal debencik semua urang empadai nama Aku. ¹⁸ Tapi selamar buk dekepalak kitak ndai bakal ayap. ¹⁹ Antik kitak tetap tan, kitak bulih idup." ²⁰ Antik kitak medak Yerusalem dikepung ulih tentara-tentara, kalah ketau, yak dah kak damping rubuh. ²¹ Rama yak urang-urang te nugau de Yudea kalah rari bukit, ngau urang te nugau alam kota kalah ngunsi, ngau urang-urang te nudau de dusun nang tamak kalam kota, ²² empadai yak mek masa pemalas dini bakal genap semua te bisik tetulis. ²³ Celaka mek bala ibuk te ketengah nganung ngau te agik nusu ke anak rama yak! Empadai bakal datai kesesak te hebat katau seluruh negeri ngau petaka atau bansa tuk, ²⁴ ngau sidak bakal mati ulih mata pedang ngau debaik sebagai tawanan ke semua bansa, ngau Yerusalem detijak-tijak bansa te ndai ngelala Allah, sampai genap me zaman bansa-bansa yak." ²⁵ "Ngau bisik bala kecelik ntang mata panas, bulan ngau bala bintang, ngau bansa-bansa de bumi takut ngau bingung ngadap deru ngau gelora laut. ²⁶ Urang mati takut empadai gaduh ngau nama semua te nimpak bumi tuk, empadai kuasa-kuasa laangit guncang. ²⁷ Rama yak urang medak Anak Mensia datai alam awan ngau semua kekuasaan ngau kemuliaan Ya. ²⁸ Antik semua yak mulai tejadi, angkat, tenguak ke mata mua, empadai penyelamatan kitak dah damping." ²⁹ Udek Yesus madah perumpamaan tuk ngau sidak: "Perati ke pun ara ngau pun nama semua. ³⁰ Antik kitak medak pun-pun kayu yak nyelingir, kitak ketau kedirik yak musim panas dah damping. ³¹ Piak ugak, antik kitak medak hal-hal yak tejadi, ketau ke Kerajaan Allah dah damping. ³² Aku madah kitak: Sebenar angkatan tuk ndai bakal ngilah seapan semua tuk terjadi. ³³ Langit ngau bumi bakal ngelalu, tapi anai Aku ndai bakal ngelalu." ³⁴ "Jaga dirik kitak, isak ati kitak ndai sarat ngau pesta pora, mabuk, ngau bala kepentingan duniawi, ngau isak ari Tuhan nang ngau tiba-tiba jatuk katau kitak upa jerat. ³⁵ Empadai yak nimpak semua penduduk bumi tuk. ³⁶ Bejaga-jaga seruntik samil berdoa, isak kitak bulih penguat untuk luput re semua te bakal tejadi yak, ngau isak kitak tan bediri dadap Anak Mensia." ³⁷ Rama lawas Yesus ngajar de Bait Allah, ngau malam Ya keluar ngau bemalam de bukit te benama bukit Zaitun. ³⁸ Ngau lelam kenyung semua urang mayuh datai ngau Ya alam Bait Allah untuk ninga ke Ya.