Rencana munuh Yesus ¹ Ari raya Ruti ndai beragi, te detelah Paskah, udah damping. ² Imam-imam kepalak ngau ahli-ahli Taurat ngegak jalai, tipa sidak tau munuh Yesus, empadai sidak takut ngau urang mayuh. ³ Maka Iblis tamak kalam Yudas te benama Iskariot yak, sikuk dentara kedua belas murid. ⁴ Udek Yudas angkat ngau imam-imam kepalak ngau kepalak-kepalak pengawal Bait Allah bepekat ngau sidak, tipa ya nyerah ke Yesus ngau sidak. ⁵ Sidak gaga bebenar ngau bepekat kak merik duit ngau ya. ⁶ Ya setuju, ngau mulai riak ya seruntik ngegak saat te tumas nyerah ke Yesus ngau sidak tanpa sepengetau urang mayuh. ⁷ Datai ari raya Ruti ndai Beragi, ari raya urang kalah nyemelih domba Paskah. ⁸ Udek Yesus nyuruh Petrus ngau Yohanes, jekuh Ya: "Angkat, siap ke pejamuan Paskah bagi kita isak kita makai." ⁹ Jekuh sidak ngau Ya: "Dini Nuan kak kami nyiap ke yak?" ¹⁰ Saut Ya: "Antik kitak tamak kalam kota, kitak bakal betemu ngau urang te ngemaik kendi berisik aik. Tamai ya kalam rumah te detamak ya, ¹¹ ngau padah ngau tuan rumah yak: Guru betanyak ngau nuan: Dini ruai pengkerang Aku tamai murid-murid Aku tau makai Paskah? ¹² Udek urang yak nunyuk ke ngau kitak dua ruai datau te besai te udah lengkap, diak kitak dua nyiap ke yak." ¹³ Udek sedua angkat, ngau nemu nama semua upa te depadah ke Yesus ngau sedua. Udek sedua nyiap ke Paskah. ¹⁴ Dah senta, Yesus duduk makai tamai bala rasul-rasul Ya. ¹⁵ Jekuh Ya ngaau sidak: "Aku gauk nar makai Paskah tuk tamai kitak, seapan Aku sisa. ¹⁶ Empadai Ku madah kitak: Aku ndai makai tuk agik sampai bulih kegenap alam Kerajaan Allah." ¹⁷ Udek Ya ngamik cawan, ngucap sukur udek banai: "Amik tuk ngau bagi ke dentara kitak. ¹⁸ Aku banai ngau kitak: Mulai re pituk Aku ndai ngirup asil pun anggur sampai Kerajaan Allah dah datai." ¹⁹ Udek Ya ngamik ruti, ngucap sukur, mecah-mecah ke yak ngau merik ke nyak ngau sidak, jekuh Ya: "Tuk tubuh Ku te deserah ke bagi kitak; pulah tuk jadi peringatan ngau Aku." ²⁰ Piak ugak depulah Ya ngau cawan udah baduk makai; Ya banai: "Cawan tuk perjanjian baru ulih darah Ku, te detumpah ke bagi kitak. ²¹ Tapi, pedak, jari urang te nyerah ke Aku, bisik tamai Aku de mija tuk. ²² Empadai Anak Mensia, matang kalah angkat upa te udah detetap ke, tapi celaka me urang te empadai ya Aku deserah ke!" ²³ Udek sidak mulai nyoal ke yak, sapa dentara sidak te piak. ²⁴ Bisik tangkap dentara murid-murid Yesus, sapa te tau dangap palain besai dentara sidak. ²⁵ Yesus banai ngau sidak: "Raja-raja bansa-bansa merintah rakyat sidak ngau urang-urang te nyalai ke kuasa atau sidak detelah pelinung-pelinung. ²⁶ Tapi kitak ndai upa yak, te besai dentara kitak kalah te biak ngau pemimpin sebagai pelayan. ²⁷ Empadai sapa te besai: te duduk makai, atau te ngelayan? ndai me ya te duduk makai? Tapi Aku bisik detengah-tengah kitak sebagai pelayan. ²⁸ Kitak yak me tetap nugau tamai Aku alam semua pencobaan te Ku asai. ²⁹ Ngau Aku nentu ke hak-hak Kerajaan bagi kitak, sama ngau Apai nentu ke yak bagi Aku, ³⁰ kitak bakal makan ngirup semeja ngau Aku alam alam Kerajaan Aku ngau kitak bakal duduk datau tahta untuk ngakim kedua belas suku Israel. ³¹ Simon, Simon, pedak, Iblis dah nuntut nampik mih upa genum, ³² tapi Aku dah bedoa untuk mih, isak iman mih nang jatuk. Ngau mih, antik mih dah insyaf, kuat ke bala menyadik mih." ³³ Saut Petrus: "Tuhan, aku kak tamak penyara ngau mati tamai Nuan!" ³⁴ Tapi Yesus banai: "Aku madah mih, Petrus, ari tuk manuk engkukuk seapan mih tiga kalik nyangkal antik mih ndai ngelala Aku." ³⁵ Udek Ya banai ngau sidak: "Rama Aku ngutus kitak ngau ndai ngemaik bala pundi-pundi, bekal ngau sanal, bisik ndai kitak kurang nama-nama?" ³⁶ Saut sidak: "Murung ke sutik bisik." Jekuh Ya angau sidak: "Tapi pituk, sapa te bisik pundi-pundi ya kalah ngemaik, piak ugak te bisik bekal; ngau sapa te ndai sik ya kalah nyual jubah ya ngau meli pedang. ³⁷ Empadai Aku madah kitak, nas Kitab Suci kalah degenapi ntang Aku: Ya teritung dentara bala pemeruntak. Empadai nama te tetulis tentang Aku ketengah degenapi." ³⁸ Jekuh sidak: "Tuhan, tuk dua pedang." Saut Ya: "Udah cukup." ³⁹ Udek Yesus angkat ke luar kota ngau upa selama Ya nuju Bukit Zaitun. Murid-murid Ya tamai Ya ugak. ⁴⁰ Udah datai de tempat yak, Ya banai ngau sidak: "berdoa isak kitak nang jatuk alam pencobaan." ⁴¹ Udek Ya nyauh ke dirik re sidak kekira sepenikam batu penyauh, udek Ya belutut ngau bedoa, jekuh Ya: ⁴² "U Apai, antik Nuan kak, amik cawan tuk re Aku; tapi bukai penekak Aku, tapi kalah penekak Nuan te tejadi." ⁴³ Maka surang malaikat re langit nampak ke dirik ngau Ya kak merik penguat ngau Ya. ⁴⁴ Ya takut bebenar ngau Ya bedoa bebenar. Peluh Ya upa titik-titik darah, terutuk ke tanah. ⁴⁵ Udek Ya angkat re doa Ya, bekalih ngau bala murid Ya, tapi Ya medak sidak ketengah tinuk empadai sedih. ⁴⁶ Jekuh Ya ngau sidak: "Nama kitak tinuk? angkat ngau bedoa, isak kitak nang jatuk alam pencobaan." ⁴⁷ Rama Yesus ketengah banai datai segerumung urang, sedang murid Ya te benama Yudas, surang re kedua belas murid Ya, bejalai demua sidak. Yudas minik Yesus kak nyium Ya. ⁴⁸ Maka jekuh Yesus ngau ya: "U Yudas, mih nyerah ke Anak Mensia ngau sium?" ⁴⁹ Rama sidak te tamai Yesus, medak nama te tejadi, sidak banai: "Tuhan, kalah kami nyeraang sidak ngau pedang?" ⁵⁰ Ngau sikuk re sidak nyerang hamba Imam Besai nyuruh putus pening kanan ya. ⁵¹ Tapi Yesus banai: "Baduk yak." Udek Ya nyapai pening mensia yak ngau nyemuh ke ya. ⁵² Maka Yesus banai ngau imam-imam kepalak ngau kepalak-kepalak pengawal Bait Allah ngau tuai-tuai te datai untuk nangkap Ya, jekuh Ya: "Sangkak kitak Aku tuk penyamun, nyak nyuruh kitak datai lengkap ngau pedang ngau pentung? ⁵³ Padahal tetiap ari Aku bisik de tengah-tengah kitak alam Bait Allah, ngau kitak ndai nangkap Aku. Tapi tuk me saat kitak, ngau tuk mek kuasa jaik (kegelapan) yak." ⁵⁴ Udek Yesus detangkap ngau debaik re tempat yak. Ya diring ke rumah Imam Besai. Ngau Petrus namai re jauh. ⁵⁵ De tengah-tengah halaman rumah yak urang ngidup api ngau sidak duduk ngelingik yak. ⁵⁶ Surang hamba inuk medak ya duduk damping api; ya medak-medak, udek banai: "Mensia tuk ugak tamai Ya." ⁵⁷ Tapi Petrus nyangkal, jekuh ya: "Ndai, aku ndai ngelala Ya!" ⁵⁸ Ndai lamak udah yak urang bukai medak ya udek banai: "Dirik sikuk re sidak ugak!" Tapi Petrus banai: "Bukai, bukai aku!" ⁵⁹ Ngau kekira sejam udah yak, urang bukai agik banai ngau tegas: "Matang me, mensia tuk tamai Ya empadai ya tuk urang Galilea ugak." ⁶⁰ Tapi Petrus madah: "Bukai, aku ndai ketau nama te kitak panai. Sekelin yak ugak, ketengah ya banai manuk engkukuk. ⁶¹ Udek Tuhan malik ngupuk ke Petrus. Nyak me Petrus tekingat ke Tuhan udah banai ngau ya: "S'apan manuk engkukuk pada ari tuk, mih dah tigak kalik nyangkal Aku." ⁶² Udek ya angkat keluar, nyabak ngau sedih bebenar. ⁶³ Ngau bala urang te ngetan Yesus, ngeluluk ngau maluk Ya. ⁶⁴ Sidak nutup mua Ya ngau nanyak: "Bak labak padah sapa te maluk Mih?" ⁶⁵ Ngau mayuh agik hujat te ducap ke sidak ngau Ya. ⁶⁶ Ngau udah tengah ari, bekumpul sidang bala tuai-tuai bansa Yahudi ngau imam-imam kepalak ngau ahli-ahli Taurat, udek sidak ngadap ke Ya ngau Mahkamah Agama sidak, ⁶⁷ jekuh sidak: "Antik Mih Mesias padah ngau kami." Saut Yesus: "Sekalikpun Aku madah ngau kitak, tapi kitak matang ndai pecayak; ⁶⁸ ngau sekalikpun Aku betanyak ngau kitak, kitak sik ndai kak nyaut. ⁶⁹ Mulai pituk Anak Mensia udah duduk de sepiak kanan Allah te palin bekuasa." ⁷⁰ Jekuh sidak semua: "Antik piak Mih tuk Anak Allah? Saut Yesus: "Kitak me te madah Aku Anak Allah." ⁷¹ Udek jekuh sidak: "Kak kenama kita kesaksian agik? Kita dah ninga re mulut Ya."