Yesus dadap Pilatus ¹ Udek angkat seluruh sidang yak, ngau Yesus debaik ngadap Pilatus. ² Diak sidak mulai nyangkak Ya, jekuh sidak: "Dah kenak temu kami, urang tuk nyesat ke bansa kami, ngau ndai nyagi mayar pajak ngau Kaisar, udek tentang diri Ya, Ya madah dirik Ya Kristus, Raja." ³ Pilatus betanyak ngau Ya: "Mih raja urang Yahudi?" Saut Yesus: "Nuan kedirik te madah miak." ⁴ Jekuh Pilatus ngau imam-imam kepalak ngau semua urang mayuh diak: "Aku ndai sik nemu kesalah nama-nama entang Mensia tuk." ⁵ Tapi sidak mangkin kayah nesak, jekuh sidak: "Ya nyesat ke rakyat ngau pengajar Ya de seluruh Yudea, Ya beruba re Galilea ngau dah sampai kituk." ⁶ Rama Pilatus ninga yak ya betanyak, nama urang yak urang Galilea. ⁷ Ngau rama ya ketau, Yesus urang re wilayah Herodes, Yesus dekirim ya ngadap Herodes, te rama yak bisik ugak de Yerusalem. ⁸ Rama Herodes medak Yesus, ya gaga bebenar. Empadai udah lamak ya ining kak medak Ya, empadai ya pisit ninga tentang Ya, udek ya ngarap medak tipa Yesus mulah kecelik. ⁹ Ya ngaju ke mayuh tanyak ngau Yesus, tapi Yesus ndai sik nyaut nama-nama. ¹⁰ Sementara yak imam-imam kepalak ngau ahli-ahli Taurat maju ke mua ngau madah (melontarkan) nyangkak-nyangkak te berat teradap Ya. ¹¹ Maka mulai mek Herodes ngau bala pasukan ya ngolok-ngolok Ya, ya nyaruk ke jubah kebesaran ngau Ya udek ngirim Ya agik ngau Pilatus. ¹² Ngau pada ari yak, Herodes sedua Pilatus bekaban, padahal seapan yak sedua bemunsuh. ¹³ Udek Pilatus ngumpul ke imam-imam kepalak ngau pemimpin-pemimpin ngau bala rakyat, ¹⁴ udek banai ngau sidak: "Kitak dah ngemaik urang urang tuk ngau Aku sebagai urang te nyesat ke rakyat. Kitak medak kedirik aku dah nisa Ya, ngau ari kesalah-kesalah te kitak sangkak ke ngau Ya ndai sik ku nemu entang Ya. ¹⁵ Ngau Herodes si ndai, empadai ya ngirim ke Ya ngau kami kituk. benar me ndai sik te depulah Ya te sesuai ngau ukum mati. ¹⁶ Udek aku bakal nisa Ya ngau ngelepas ke Ya udah yak." ¹⁷ Empadai ya kalah ngelepas ke surang bagi sidak pada ari raya. ¹⁸ Tapi sidak besurak bereta: "Pabis ke Ya, lepas ke Barabas bagi kami!" ¹⁹ Barabas yak detepuk kalam penyara empadai bisik pemeruntak te tejadi alam kota ngau bisik bebunuh ugak. ²⁰ Sekalik agik Pilatus banai ngau ingan kayah ngau sidak, empadai ya ining ngelepas ke Yesus. ²¹ Tapi sidak besurak malas ya, jekuh sidak: "Salib ke Ya! Salib ke Ya!" ²² Jekuh Pilatus ketiga kalik ngau sidak: "Pengenyaik nama sebenar te depulah Mensia tuk?" Ndai sik penyalah te kutemu ntang Ya, te setimpal ngau ukum mati. Jadi aku nisa Ya tuk udek kulepas agik." ²³ Tapi ngau besurak sidak nesak ngau nuntut, isak Ya desalib, ngau kebadok sidak menang ngau ingan sidak. ²⁴ Udek Pilatus mutus ke tuntutan sidak dekabul. ²⁵ Ngau ya ngelepas ke urang te detepuk kalam penyara empadai meruntak ngau munuh sesuai ngau tuntutan sidak, tapi Yesus deserah ke ngau sidak, sepenekak sidak mulah. ²⁶ Rama sidak ngemaik Yesus, sidak ngetan urang te benama Simon re Kirene, te baruk datai re luar kota, udek deletak ke salib atau bau ya, isak depikul ya samil namai Yesus. ²⁷ Mayuh urang tamai Ya; diak mayuh urang inuk te nyabak ngau meratap Ya. ²⁸ Yesus malik ngupuk sidak ngau banai: "Kitak inuk-inuk Yerusalem, nang kitak nyabak ke Aku, tapi sabak na dirik ngau anak-anak kitak! ²⁹ Empadai pedak, bisik masa urang banai: Gaga inuk matai ngau sarang peranak te ndai suah beranak, ngau te susu ya ndai suah desusu. ³⁰ Maka urang bakal banai ngau bukit-bukit: Jatuh me tingang kami! Ngau gunuk-gunuk: Timun ke kami! ³¹ Empadai antik urang mulah te piak ngau kayu idup, nama te bakal tejadi ngau kayu rangkai?" ³² Ngau bisik ugak deiring dua urang bukai, dua urang penjahat untuk dukum mati tamai Ya. ³³ Rama sidak datai te tempat te benama tengkorak, sidak nyalib ke Yesus diak, tamai kedua urang penjahat, te surang desepiak kanan, surang agik desepiak kibak. ³⁴ Yesus banai: "U Apai, ampun sidak empadai sidak ndai ketau nama te sidak pulah." Ngau sidak nyabut undi untuk magi pengau Ya. ³⁵ Urang mayuh bediri diak ngau medak semua yak. pemimpin-pemimpin ngolok Ya, jekuh sidak: "Urang bukai deselamat ke Ya, isak pituk Ya nyelamat ke direk, antik Ya Mesias, urang te depilih Allah." ³⁶ Bala prajurit sik ngolok-ngolok Ya ugak; sidak nyucuk ke anggur masam ngau Ya ³⁷ ngau banai: "Antik Mih raja urang Yahudi, selamat ke dirik Mih!" ³⁸ Bisik ugak tulis datau kepalak Ya: "Tuk me raja urang Yahudi." ³⁹ Sikuk re penjahat te degantung diak menghujat Ya, jekuh ya: " ndai me Mih yak Kristus? Selamat ke Mih ngau kami!" ⁴⁰ Tapi te sikuk ngerara ya, jekuh ya: "Ndai nama Mih takut, ndai ugak ngau Allah, sedang ke mih nerimak ukuman te sama? ⁴¹ Kita tuk patut d'ukum, empadai kita nerimak balas te setimpal ngau pempulah kita, tapi urang tuk ndai sik mulah te salah." ⁴² Udek ya banai: "Yesus, kingat ke aku, antik Nuan datai sebagai Raja." ⁴³ Jekuh Yesus ngau ya: "Aku madah mih, ari tuk ugak mih bisik tamai Aku alam Firdaus." ⁴⁴ Rama yak ari kekira jam duabelas, udek keleman sekamat yak sampai jam tiga, ⁴⁵ empadai mata panas ndai mancak. Ngau tabir Bait Suci tebelah dua. ⁴⁶ Udek Yesus banai ngau ingaan kayah: "U Apai, k'alam jari Nuan Ku serah ke nyawa Ku." Ngau udah banai miak, Ya nyerah ke nyawa Ya. ⁴⁷ Rama kepalak pasukan medak hal yak, Ya memulia ke Allah, jekuh ya: "Benar, urang tuk urang benar!" ⁴⁸ Ngau dah semua urang mayuh te datai bekerumun diak, medak nama te tejadi, sidak pulai samil maluk-maluk dirik. ⁴⁹ Semua urang te ngelala Yesus re damping, temasuk inuk-inuk te tamai Ya re Galilea , bediri jauh-jauh ngau medak semua yak. ⁵⁰ Bisik urang benama Yusuf. Ya anggota Majelis Besai, urang te baik ngau benar. ⁵¹ Ya ndai setuju ngau putusan ngau pempulah sidak. Ya berasal re Arimatea, sigik kota Yahudi ngau ya nunguk-nunguk ke Kerajaan Allah. ⁵² Ya angkat ngadap Pilatus ngau mintak mayat Yesus. ⁵³ Ngau udah ya nurun mayat yak, debalut ya ngau kain lenan, udek depegalai ya alam kubur te dekali alam bukit batu, dini pan suah depegalai mayat. ⁵⁴ Ari yak ari pesiapan ngau sabat ampir mulai. ⁵⁵ Ngau inuk-inuk te datai tamai Yesus re Galilea, tamai bereta ngau sidak medak kubur yak, ngau tipa mayat yak depegalai. ⁵⁶ Ngau udah pulai, sidak nyiap ke rempah-rempah ngau minyak mur. Ngau pada ari Sabat sidak betegak menurut ukum Taurat,