¹ Tapi dini ari pada ari peruba mingu yak, sidak angkat ke kubur ngemaik rempah-rempah te dah desiap ke sidak. ² Sidak medak batu dah teguling re kubur yak, ³ ngau udah tamak sidak ndai nemu mayat Tuhan Yesus. ⁴ Ketengah sidak bediri temangu-mangu empadai hal yak, tetiba bisik dua uraang bediri damping sidak, bepengau bepilik-bepilik (berkilau-kilauan). ⁵ Sidak takut bebenar ngau nunuk ke kepalak, tapi kedua urang yak banai ngau sidak: "Nama kitak ngegak Ya te idup dentara urang mati? ⁶ Ya ndai sik dituk, Ya dah bangkit. Kingat ke nama te depadah Ya ngau kitak rama Ya agik de Galilea, ⁷ bahwa Anak Mensia kalah deserah ke jari urang-urang bedosa ngau desalib ke ngau bangkit ari ketiga." ⁸ Maka tekingat sidak ngau anai Yesus yak. ⁹ Ngau sidak udaah bekalih re kubur, sidak ngisah ke yak ngau kesebelas murid, ngau semua te bukai. ¹⁰ Bala inuk yak Maria re Magdala ngau Yohana sedua Maria inai Yakobus. Ngau bala inuk bukai ugak tamai sidak ngisah ke yak ngau bala rasul. ¹¹ Tapi bagi sidak anai yak s'akan akan bulak, ngau sidak ndai pecayak ngau bala inuk yak. ¹² Sunguhpun piak Petrus angkat udek sigat-sigat angkat ke kubur. Rama ya nyenguk ke dalam, ya cuma medak kaian kapan na. Udek ya angkat, ngau ya betanyak alam ati ya, nama sebenar te udah tejadi. ¹³ Pada ari yak ugak dua urang re murid Yesus angkat ke sebuah kampung benama Emaus, te teletak kekira tujuh mil penyauh re Yerusalem, ¹⁴ ngau sidak banai ke semua utai te dah tejadi. ¹⁵ Rama sedua ketengah banaai ngau betukar paham, datai Yesus minik sedua, udek bejalai tamai sedua. ¹⁶ Tapi bisik utai te ngehalang mataa sidak, nyak nyuruh sidak ndai dapat ngelala Ya. ¹⁷ Yesus banai ngau sidak: "Nama te kitak panai ketengah kitak bejalai?" Maka sidak betegak ngau mua masam. ¹⁸ Sikuk re sedua te benama Kleopas nyaut: "Nama Nuan sikuk me urang asing de Yerusalem te ndai ketau nama te tejadi diak pan lamak tuk?" ¹⁹ Jekuh Ya ngau sidak: "Nama yak?" Saut sidak: "Nama te tejadi ngau Yesus urang Nazaret. Ya nabi, te bekuasa alam kereja ngau anai d'adap Allah ngau demua seluruh bansa kami. ²⁰ Tapi imam-imam kepalak ngau pemimpin-pemimpin kami dah nyerah ke Ya untuk dukum mati ngau sidak dah nyalib ke Ya. ²¹ Padahal kami subak ngarap ke Ya yak me te datai ngebebas ke bansa Israel. Tapi sementara yak dah ngilah tiga ari mulai re semua tuk tejadi. ²² Tapi bala inuk re kalangan kami dah ngejut ke kami: Agik dini ari butak sidak dah angkat ke kubur, ²³ ngau sidak ndai nemu mayat Ya. Udek sidak datai ngau berita dah kenak pedak sidak malaikat-malaikat te madah Ya idup. ²⁴ Ngau bisik kaban kami dah angkat ke kubur yak ngau nemu, memang benar te depadah bala inuk yak, tapi Ya ndai sik sidak pedak." ²⁵ Udek Ya banai ngau sidak: "Ui kitak urang budu, lubah benar ati kitak, nyuruh kitak ndai pecayak semua utai, te depadah bala nabi! ²⁶ Ndai me mesias kalah sisa semua yak lau untuk tamak alam kemuliaan Ya?" ²⁷ Udek Ya nyelas ke ngau sidak nama te tetulis tentang Ya alam seluruh kitab suci, mulai re kitab Musa ngau semua kitab nabi-nabi. ²⁸ Sidak minik kampung te sidak tuju, udek Ya mulah direk kak bejalai agik. ²⁹ Tapi sidak matang nesak Ya, jekuh sidak: "Dudi lau tamai kami dituk empadai dah malammari, ngau mata panas dah kak tengelam." ³⁰ Rama Ya duduk makai ngau sidak, Ya ngamik ruti, ngucap berekat, udek deperarak Ya ngau debagi ke Ya ngau sidak. ³¹ Rama yak mata sidak tebukak, ngau sidak ngelala Ya, tapi Ya ayap detengah-tengah sidak. ³² Jekuh sidak banai ngau pangan: "Ndai me ati kita gaga bebenar (berkobar-kobar) ninga Ya banai ngau kita de tengah jalai ngau rama Ya nerang ke Kitab Suci ngau kita?" ³³ Udek sidak angkat ke Yerusalem. Diak sidak medak kesebelas murid. Sidak ketengah bekumpul ngau bala kaban sidak. ³⁴ Jekuh sidak yak: "Sebenar Tuhan dah bangkit ngau dah nampak ke dirik ngau Simon." ³⁵ Udek kedua urang tadik ngisah ke ugak nama te tejadi de tengah jalai ngau tipa sidak ngelala Ya rama Ya mecah-mecah ke ruti. ³⁶ Ngau sementara sidak ketengah banai tentang hal yak, Yesus tetiba bediri detengah-tengah sidak ngau banai banai: "Damai sejahtera bagi kitak!" ³⁷ Sidak tekejut ngau takut, desangkak sidak, sidak medak antu. ³⁸ Tapi Ya banai ngau sidak: "Nama kitak tekejut, ngau nama sebab timul ragu de ati kitak? ³⁹ Pedak kaki ngau jari Aku: Aku me tuk, japai Aku ngau pedak, empadai Antu ndai bedagin ndai betulang, upa te kitak pedak entang Aku." ⁴⁰ Samil banai miak Ya madah ke kaki jari Ya ngau sidak. ⁴¹ Ngau rama sidak apan pecayak empadai gaga ngau agik iran, Ya banai ngau sidak: "Bisik pemakai ndai entang kitak dituk?" ⁴² Udek sidak merik ngau Ya sekerat ikan gurin. ⁴³ Ya ngamik ngau makai yak demua sidak. ⁴⁴ Ya banai ngau sidak: "Tuk anak Ku te Kupadah ngau kitak, rama Aku agik tamai kitak, nyak me kalah degenap ke semua te bisik tetulis tentang Aku alam kitab Taurat Musa, Kitab nabi-nabi, ngau kitab Mazmur." ⁴⁵ Udek Ya mukak pemikir sidak, nyak nyuruh sidak nyaruk Kitab Suci. ⁴⁶ Jekuh Ya ngau sidak: "Bisik tetulis piak: Mesias kalah sisa ngau bangkit dentara urang mati pada ari ketiga, ⁴⁷ ngau agik: alam nama Ya berita tentang pertobatan ngau pengampunan dosa kalah depadah ke semua bansa, mulai re Yerusalem. ⁴⁸ Kitak me saksi re semua tuk. ⁴⁹ Ngau Aku bakal ngirim ngau kitak nama te dejan'yi ke Apai Ku. Tapi kitak kalah nugau alam kota tuk sampai kitak depelengkap ngau kekuasaan re tempat tingik." ⁵⁰ Udek Yesus ngemaik sidak ke luar kota sampai damping Betania. Diak Ya ngatung jari Ya ngau ngemerekat sidak. ⁵¹ Ngau rama Ya ketengah ngemerekat sidak, Ya perarak ngau sidak ngau terangkat ke surga. ⁵² Sidak sujud nyemah ngau Ya, udek sidak bekalih ke Yerusalem ngau perasai gaga. ⁵³ Sidak seruntik nugau alam Bait Allah ngau memulia ke Allah.