¹ Setelah aman pe’kaduhan itu, Paulus menyu'u pengekot dan buat kuat ati mike. Dan sesude minte di'i, iye bekayo ka Makedonia. ² Iye menjelaje dae'a itu dan dengen anyak naseat, na nguatkan ati sauda'e-sauda'e ka situ. Lalu tibelah iye ka tana Yunani. ³ Sesude tige bulen lamenya tinggal ka situ iye endak belaya’ ka Siria. Tapi pade mase itu u'ang-u'ang Yahudi be’maksud munoh die. Ka'ena itu iye potoskan untok bale lewat Makedonia. ⁴ Iye besame Sopater buda Pirus, da'i Berea, dan Aristarkhus dan Sekundus, due-duenye da'i Tesalonika, dan Gayus da'i Derbe, dan Timotius dan dua u'ang da'i Asia, yaitu Tikhikus dan Trofimus. ⁵ Mike bekayoh lebih dolo dan menunggu kami ka Troas. ⁶ Tapi selesai hari ‘aye Roti Tak Be’agi kami belaya’ da'i Filipi dan empat ha'i kemudian kami sampai ka Troas dan jumpe dengen mike. Ka situ kami netap tujo ha'i. ⁷ Pade ha'i petame minggu itu, waktu kami kumpol untok mo'a-mo'a ‘oti, Paulus becakap dengen sauda'e-sauda'e ka situ, ka'ene iye ingen untok bekayo pade esok ha'i. Mike becakap sampe jaoh malem. ⁸ Ka bilek atas, ka mana kami bekumpol, dinyalekan beluba lampu. ⁹ Seo'ang bujang be’name Etikhus dudok ka jendela. Kae'ne Paulus lama amet becakap, u'ang bujang itu ide dopot nahan ngantuknye. Akhe’nya iye nyenyak tido dan jatoh da'i lantai tige ka bowoh. Waktu iye diangkat u'ang, iye dah mati. ¹⁰ Tapi Paulus tu'un ka bowoh, me’ebahka nyawe ka atas u'ang bujang itu, menindihnye, dan bekate, “Usah biseng, sebeb iye mase idop. ¹¹ Setelah bale da'i bilek atas, Paulus pora-pora ‘oti lalu makan; abes makan mase lame lagi, iye becakap. Sampai panca matea’i naek. Kemudian iye bekayo. ¹² Sementa'a itu mike menganta'kan u'ang bujang itu idop ka ‘umah die, dan mike semue merase sangat te'ibo. ¹³ Kami la kayoh lebih dulo ka kapal dan bekayo ka Asos dengen maksot untok jempot Paulus ka situ suai dengen pesannye, sebeb iye seo'ang na bejalan kaki lewat da'at. ¹⁴ Ketike iye be’temu kami ka Asos, kami membawenya ka kapal, lalu lanjotkan pelaya’an kami ka Metilene. ¹⁵ Da'i situ kami te'us belaya’ dan pada esok ha'i kami be’adapan dengen pulau Khios. Pada ha'i be'ikutnya kami menuju Samsos dan seha’i kemudian tibela kami ka Miletus. ¹⁶ Paulus lah memutuskan untok ide singge ka Efesus, supaye jengen abes masenya ka Asia. Sebeb iye bu'u-bu'u, aga’ jika mongken, iye lah ade ka Yerusalem pade ha'i ‘aye Pentakosta. ¹⁷ Kae'ne itu iye menyu'o seo'ang da'i Miletus ka Efesus dengen pesan supaye pa'a penatua jemaat dotong ka Miletus. ¹⁸ Sesudah mike dotong, bekatelah die pade mike, “Ikau tau, bagaimane aku idop di anta'a ikau sejak ha'i petame aku tibe ka Asia ikin: ¹⁹ dengen segale 'enda hati ambe melayani Tuhan. Dalam pelayan itu aku banyak mencoco’kan ae mate dan anyak mengalami pencobaan da'i pihak u’ang Yahudi yang nda munoh aku. ²⁰ Sunggoh pon begitu Aku tak pe’na melalaikan ape yang be’gune bagi ikau. Semue ambe be’itakan dan ambe aja’kan pada ikau, bae ka depan umom maupon dalam pekumpulan-pekumpulan da umah ikau; ²¹ aku senantiase be’saksi pade u’ang-u’ang Yahudi dan u’ang- u’ang Yunani, supaye mike betobat pade Allah dan pe’caye pade Tuhan kite, Yesus Kristus. ²² Tetapi keneng sebagai tawanan Roh aku pe’gi ka Yerusalem dan aku tak tahu ape yang nak te’jadi atas di’i aku ka situ, ²³ selain da’i pade yang dinyatekan Roh Kudus da’i kota ka kota kepada aku. ²⁴ Tetapi aku tide menghi’aukan jiwa aku sikit pon, asal saje aku dopot capai ga’is akhi’ dan selesaikan pelayanan yang be’i tugas oleh Tuhan Yesus pade aku untok membe’i kesaksean tentang Injil kasih karunie Allah. ²⁵ Dan seka’ang aku tahu, bahwe ikau tak nak meliat muke aku lagi, ikau semue yang lah aku kunjungi untok membe’itakan ke’ajaan Allah. ²⁶ Sebeb itu pade ha’i ikin aku be’saksi kepade ikau, bahwe aku berseh, tak be’sale te’adap siapepon yang akan minasa. ²⁷ Sebeb aku ide lalai membe’itakan selo’oh maksud Allah pade ikau. ²⁸ Ka’ena itu jagelah nyawe ikau dan jagelah semue kawanan, ka’ena ikau yang ditetapkan Roh Kudos menjadi penilik untok menggembalakan jemaat Allah yang dipe’oleh dengen da’ah Anak Die sendi’i. ²⁹ Aku tau, bahwe sesude aku pe’gi, se’igala-se’igala yang buas nak masok ka tenga-tenga ikau dan tak nak nyayangkan kawanan itu. ³⁰ Bahken da’i anta’e ikau sendi’i nak muncol bebe’apa u’ang, yang dengen aja’an palsu mike be’usaha mena’ik pengekot-pengekot da’i jolon yang bena’ dan supaye mengikot mike. ³¹ Sebeb itu bejage-jagela dan ingatla, bahwe aku tige tahun lamenye, siang malem, dengen tak be’henti-hentinya be’i nasehat pade mike maseng-maseng dengen mencoco’kan ae’ mate. ³² Dan keneng aku se’ahkan ikau pade Tuhan dan kepade firman kaseh karunia-Nya, yang be’kuase membangun ikau dan membe’ikan kepade ikau bagean yang ditentukan bagi semue u’ang yang lah Die kuduskan. ³³ Pe’ak atau emas atau boju ide pe’nah aku ingen da’i sapapon juge. ³⁴ Ikau sendi’i tau, bahwe dengen tangen aku sendi’i aku lah beke’ja untok penuhi kepe’luan aku dan kepe’luan-kepe’luan kawan-kawan yang be’jalan besame aku. ³⁵ Dolom segale sesuatu lah aku be’ikan contoh pade ikau, bahwe dengen beke’ja demikian kite ha’us membantu u’ang-u’ang yang lemah dan ha’us mengingat pe’kataan Tuhan Yesus Kristus, sebeb Die sendi’i lah becakap: “ Adelah lebeh bebahagiye membe’i da’i pade mene’ima”. ³⁶ Sesudah ucapkan kate-kate itu Paulus be’lutut dan be’doa besame-same dengen mike semue. ³⁷ Make menangesla mike semue te’sedu-sedu dan sambel melo’ Paulus, mike be’ulang-ulang cium die. ³⁸ Mike amat beduka cita, lebeh-lebeh ka’ena iye becakap bahwe mike ide nak liat muke die lagi. Lalu mike menganta’ die ka kapal.