¹ Akherny, Dolor-dolor, kamie memintak ngan menasehatime delom Tuhan Yesus empoknyo sodah kowe terimo deri kamie tentang upamone kowe haros hidop ngan menyenangko Allah, lakukolah iye lobeh lage. ² Sabab, kowe tahu perentah-perentah apo nyo kamie sampoykoh kepodome melaluo kuaso Tuhan Yesus. ³ Sabab, nielah kehendok Allah: pengudusonme*, behwa kowe haros menjouhkoh diri deri pecabulan; ⁴ behwa kowe maseng-maseng tahu upamone menguasoi badanme dewek delom kekuduson ngan kehormaton, ⁵ bukon delom gairah nyo ponoh nafsu upa urang-urang nyo hopi mengenal Allah, ⁶ empoknyo jengon ado seurang pon nyo melanggor ngan menipu dolornye delom hal nie. Sabab, Tuhan adolah Pembelos deri segelo nie, upa nyo kamie beritahuko sebolomnye ngan kamie peringotko ngan songgoh-songgoh kepodome. ⁷ Allah memantou kite bukon untok kehopikuduson, meloenko untok kekuduson. ⁸ Ulehnyo iye, siapo pon nyo menolak ajaron nie, bukon menolak mendesio, meloenko menolak Allah, nyo memborikoh Roh Kudus-Nye* kepodome. ⁹ Hambok, tentang kaseh pedoloron, kowe hopi membotohko seurang untok menolesko kepodome ulehnyo kowe dewek lah diajor Allah untok saleng mengasehi. ¹⁰ Bahkan, kowe lah melakukonye kepodo segelo dolor nyo ado de Makedonia. Cuma, Dolor-dolor, kamie memintakme ngan sangat empoknyo kowe melakukonye lobeh lage, ¹¹ ngan beusaholah untok hidop ngan tenang, uruslah uruson-urusonme dewek, ngan begawelah ngan tangonme dewek, upa nyo lah kamie perentahkoh kepodome, ¹² empoknye kowe pacok menjelonie hidop ngan pantas de hadapon urang-urang luor ngan hopi kekurangon apo-apo. ¹³ Dolor-dolor, kamie hopi endok kowe hopi mengetahui tentang urang-urang nyo sodah mati empoknye kowe hopi bedukacita upa urang nyo hopi memeleki pengharapon. ¹⁴ Sabab, munye kite pecayo behwa Yesus lah mati ngan bangket kembali, kite jugo pecayo behwa Allah nak mengompolkoh mike nyo mati de delom Yesus besamo-samo ngan Nye. ¹⁵ Kamie mengehatoko hal nie kepodome ngan firman Tuhan, behwa kite nyo maseh hidop, nyo maseh ado hinggo kedetongan Tuhan, hopi nak mendahului mike nyo sodah meninggal. ¹⁶ Tuhan dewek nak turun deri surga ngan suaro, suaro deri penghulu malaikat, ngan suaro trompet Allah, ngan urang-urang nyo mati delom Kristus nak bangket lobeh dahulu. ¹⁷ Kemudion, kite nyo maseh hidop, nyo maseh tinggol, nak deangkot besamo-samo delom awan-awan ngan mike untok betomu ngan Tuhan de udara, ngan demikionla kite nak selalu besamo Tuhan. ¹⁸ Ulehnyo iye, hiburla sikok ngan nyo laen ngan kehato-kehato nie.