¹ Ulehnyo iye, ketiko kamie sodah hopi tahan lage, kamie memotoskoh untok tinggol seurang diri de Atena, ² ngan mengirem Timotius, dolor kamie ngan pelayan Allah, ngan rekan sepekerja kamie delom Injil Kristus, kepodome untok menguatkoh ngan menasehatime berkoeton ngan imanme, empoknyo hopi ado seurang pon nyo degoyahkoh uleh penderitaon-penderitaon nie. Sabab, kowe dewek tahu behwa kite memang detentukoh untok iye. ⁴ Bahkan, ketika kamie besamome, kamie teros-meneros memboritahume behwa kite nak mengalami penderitaon, ngan iye lah tejadi upa nyo kowe ketahui. ⁵ Ulehnyo iye, ketiko ake hopi tahan lage, ake mengotos untok mengetahui imanme. Ake takot, kalau-kalau si penggoda lah menggodame ngan jerih lelah kamie menjedi sio-sio. ⁶ Hambok, kinie, Timotius lah belek kepodo kamie deri tempatme, ngan lah membewo kabar beik tentang iman ngan kasehme untok kamie, behwa kowe selalu menyimpan kenangon nyo beik nak kamie ngan rindu untok betemu kamie, upa kamie jugo rindu betomu nganme. ⁷ Ulehnyo iye, Dolor-dolor, delom segelo kesusahon ngan penderitaon nie, kamie terhibur ulehme melalui imanme. ⁸ Kinie, kamie hidop munye kowe togok togoh delom Tuhan. ⁹ Sabab, ucapon sukor apokah nyo pacok kamie persembahko kepodo Allah ulehnyo kowe, sebagoi ganti segelo sukacita nyo kami rasoko de hadapon Allah ulehnyo kowe? ¹⁰ Siang mallom kamie bedoa ngan bonor-bonor untok kamie pacok betemu lage nganme, ngan pacok melengkapi apo nyo maseh kurang podo imanme. ¹¹ Kinie, biarlah Allah ngan Bepa dewek, ngan Yesus, Tuhan kite, nyo menuntun jelon kamie kepodome. ¹² Kironye Tuhan membuat kowe betumbuh ngan belempah delom kaseh nak seurang kepodo nyo loen, ngan nak segelo urang, upa nyo kamie lakuko kepodome. ¹³ Kironye Nye menogohkoh hatime hopi becacat delom kesucion de hadapon Allah ngan Bepa kite podo kedetongan Tuhan kite, Yesus, besamo urang-urang kudus-Nye.