¹ Kinie, Dolor-dolor, menganai waktu ngan zamannye, hopi perlu detuliskoh kepodome. ² Sabab, kowe dewek bonor-bonor tahu behwa hari Tuhan nak detong upa pemaleng podo malom hari. ³ Ketiko urang-urang bekehato, "Damai ngan aman," kebinasaon nak detong atas mike secaro tiba-tiba, upa raso saket betino nyo nak melaherko, ngan mike hopi pacok melolosko diri. ⁴ Hambok, Dolor-dolor, kowe hopi hidop delom kekolomon sehinggo hari iye nak mendetongi kowe upa seurang pemaleng. ⁵ Kowe segelo adolah anak-anak torang ngan anak-anak siang. Kite hopi beasal deri malom apo kemolomon. ⁶ Sabab iye, jengonlah kite tidur upa urang-urang loen, cuma ayoklah kite tetap tejago ngan waspada. ⁷ Urang nyo tidur, tidur podo malom hari ngan urang nyo mabok, jugo mabok podo malom hari. ⁸ Hambok, ulehnyo kite adolah anak-anak siang, ayoklah kite sadar, menganako beju zirah iman ngan kaseh, ngan memakoi ketopong pengharapon nak keselamaton. ⁹ Allah hopi menetapko kite untok mengalami murka, cuma untok mendepotko keselamaton melalui Tuhan kite, Yesus Kristus, lah mati bage kite empoknye kite, entah tejago ataupon tetidor, pacok tinggol besamo-Nye. ¹¹ Ulehnyo iye, kuatkolah siko ngan nyo loennye ngan saleng membangunlah, upa nyo sedang kowe lakukon kinie. ¹² Dolor-dolor, kamie memintame untok menghormati mike nyo begawe karas de antarome, ngan nyo memimpinme delom Tuhan, ngan nyo menegorme. ¹³ Hargailah mik bonor-bonor delom kaseh ulehnyo pekerjaon mike. ¹⁴ Kamie mendorongme, Dolor-dolor, tegorlah mike nyo hidop besogon-sogon, kuatkolah mike nyo bekecik hati, ngan bersoborlah ngan segelo urang. ¹⁵ Perhatikolah empoknye jengon ado urang nyo membelos kejahaton ngan kejahaton, meloenko selalu beusahalah melakuko nyo beik de antarome ngan untok segelo urang. ¹⁶ Besukacitalah selalu! ¹⁷ Teroslah bedoa! ¹⁸ Mengucap sukorlah delom segelo hal. Sabab, iyelah kehendok Allah bageme de delom Kristus Yesus. ¹⁹ Jengon memedomkoh Roh!* ²⁰ Jengon mengoleh rendah nubuat-nubuat!* ²¹ Hambok, ujila segelo sesuatu! Pogonglah ape nyo beik! ²² Menjouhlah deri segelo bentok kejahaton! ²³ Empok, damai sejahtera Allah dewek mengodosko kowe segelonye. Kironye roh, jiwa, ngan badanme tepeliharo segelonye, hopi cacat podo kedetongan Tuhan kite, Kristus Yesus. ²⁴ Nye nyo memantou kowe iyelah setia, Nye pasti nak melakukonye. ²⁵ Dolor-dolor bedoala jugo untok kamie! ²⁶ Borila salam kepodo segelo dolor ngan cium kudus. ²⁷ Ake memintame ngan sangat demi namo Tuhan, untok membacokoh surat nie kepodo segelo dolor de kion. ²⁸ Anugrah Tuhan kite, Kristus Yesus, menyertaime.