(Menganai Perkaro Hukom de Antaro Urang Pecayo) ¹ Tekaloh saloh sikok deri kowe memileki perselisehon ngan nyo loen, apokoh lah berani lari untuk delok keadelon dehadopon urang-urang nyo hopi bonor ngan bukon dehadopon urang-urang kudus? ² Apekah kowe hopi tahukoh behwa urang-urang kudus nak menghakemi denia? munye denia dehakemi ulehme, apekah kowe hopi layak untok mengadeli pekaro-pekaro nyo sajo kecik? ³ Apekah kowe hopi tahukoh behwa kite nak mengadeli para melekat ? apolagi anyo pekaro-pekaro biaso sehari-hari! ⁴ Jedi munye kowe menghadopi pekaro-pekaro biaso upah iye, mengkah kowe ngundahnye kepado mike nyo hopi deperhitungkoh delom jemaat ? ⁵ Ake memboeko nie empoknyo kowe malu apekah hopi ado seurang deantaro dolor-dolornye ? ⁶ Malahon, antaro dolor ngan dolor lari delok keadelon dehadopon urang-urangnyo hopi pecayo! ⁷ Sebonornye, sodah menjedi kegagalon bage kowe ulehnyo kowe mempunyai pekaro-pekaro hukom de antaro kowe. Mengkah kowe hopi lobeh agom desalohko ? mengkah kowe hopi lobeh agom derugiko? ⁸ Sebeleknye, kou dewek besaloh ngan merugiko. Bahkon, kowe melakukonye tehadop dolor-dolorme. ⁹ Apekah kowe hopi tahukoh behwa urang nyo hopi bonor hopi nak mewaresi kerajaon Allah ? jengon sosot! urang-urang cabul, para penyembah berhala, urang-urang nyo bezina, banci , para homoseksual, ¹⁰ para pemaleng, urang-urang nyo serakah, para pemabuk, para pemitnah, ngan penipu-penipu, mike segelo hopi nak mewaresi Kerajaaon Allah. ¹¹ Beberape deri kowe jugo upah iye. Hambok, kowe sodah deberesehkoh, sodah dekodoskoh, ngan soda debonorkoh delom namo Tuhan Yesus Kristus ngan delom Roh Allah kite. ¹² Segelo hal deperbulehkoh bageke, ulehnyo hopi segelonyo beguna. Memang segelo hal deperbulehkoh bageke,ulehnyyo ake hopi endok deperhambokoh uleh apo pun. ¹³ Makonon untok porot, nga porot untok makonon, hambok Allah nak membinasokoh kedua-duanye. Badan bukonlah untok perjinahon, meloenkoh untok Tuhan, ngan Tuhan untok badan. ¹⁴ Allah membangketkoh Tuhan ngan jugo na membangketkoh kite uleh kuasonye. ¹⁵ Apekah kowe hopi tahukoh behuwa badenme adolah anggota-anggota Kristus ? Apokeh ake nak, ngambek anggota-anggota Krisus nan menjedikoh mika angota-anggota pelacur ? samo sekali hopi ! ¹⁶ Apekah kowe hopi tahuko behuwe urang nyo mengobatkoh dirinye dengan pelajur menjdei siko badan ngannye ? Sabab, enye boek, "keduanye nak, menjedi sikok degeng " ¹⁷ Ulehnyo hambok, urang nyo mengobatkoh diri dengan Tuhan menjdei siko Roh ngan Nye. ¹⁸ Jouhilah perzinaon ! setiap doso loen nyo seseurang lakuko adolah deluor badannye, hambok urang nyo berzinah, bedoso tehadop badannye dewek. ¹⁹ Apekah kowe hopi tahuo behuwa badanme adolah baik Roh kudus, nyo ado de delom kowe, nyo kou terimo deri Allah, ngan behwa dirime bukonlah milekme dewek ? ²⁰ Sabab kowe lah detobus ngan rego lunas. Ulehnyo iye, muliakolah Allah ngan badanme!