¹ Lawulawini, pulaksanai katuluh wuah naun arai daya naun haut mira baya anri Alatalla. Aku puang kaweatan ngulek inun sa haut nasurat ku ma naun dahulu yari daya hal yiru maeh tuu ma salamat naun. ² Mamaeh anri kawan ulun sa ngulah kawan hal sa jahat kawan ulun sa pantas naantuh antahu here mandasak nampan katuluh ulun nasunat. ³ Padahal takam yiti kawan ulun sa haut marine sunat sa sajati puang here takam nyambah Alatalla anri naayak daya Roh Alatalla daya puang ngulah parisaya ma hal sa lahiriah. ⁴ Sabujurni aku pada tau itegei ma hal sa lahiraiah daya amun sa kaingkam hanye uweng tujuan ma hal- hal lahir labis lagi aku. ⁵ Aku nasunat tawuk baumur walu anrau aku nakayaan yalah erang kaulun Israel,teka suku Benyamin ; aku ulun Ibrani sajati hawuang ngalut nuu kawan hukum Yahudi aku samula ulun Farisi. ⁶ Hawuang basamangat tatuu hampe aku ngahanangen ungkup Alatalla , amun nakakira teka hukum Taurat aku puang nawada. ⁷ Kude daya Kristus balalu katuluhni sa dahulu yiru anggapku ngami kauntungan itati jari isa karugian. ⁸ Puang ekat kawan yiru ala katantuluh uras naanggapku kawan hal sa ekat ngampi rugi sa namilikku itati labis baharaga hanye yiru kataru Yesus Kristus Alatallaku gana Kristus aku haut napas ala katantuluhni aku nganggap yiru rateh eleh nampan kaiyuh Kristus. ⁹ Aku kahaba wuang Kristus puang wuang kabujurani raerai ngakalini mitah lalan ngalut nuu ma hukum Taurat itati aku naan kahaba hingka hukum Taurat balalu mitah iman wuang Kristus, yalah kabanaran hingka Alatalla nelang pidasar iman takam. ¹⁰ Sakira aku kaiyuh kataru hanye sa kuasa nyamelum hanye teka pampatei aku sinni umma ngaret kahanangen baya hanye nelang jari sameh kala hanye hawuang hal pampatei. ¹¹ Nelang aku harap Aku raerai sagar nasamelum kamulek teka pampatei. Mahadapan herauan Surgawi ¹² Aku puang kaeau aku haut bahasil, atawa haut jari paruna kude aku saratang ngakali marabut sa nasadia daya Kristus Yesus daya hanye haut rabutni aku ngulah jari milikni. ¹³ Pulaksanai katuluh aku kapinuu puang kaingkam haut kaiyuh narabutni kude naan sa naulahku hanye yiru aku puang ngitung sa naan hang wading aku bahimat ngakali ngaiyuh inun sa naan hang hadapanku. ¹⁴ Yiru sababni aku puang taduh haut kaiyuh hadiah yalah herauan surgawi hingka Alatalla hawuang Yesus Kristus ¹⁵ Takam katuluh sa haut dewasa manyu rohani batingkah laku kalayiru kude amun hang penah naun sa padapat lain himat Alatalla sagar manarang ma naun. ¹⁶ Kude hal yiti wuah napantaru takam harus tatap welum ngalut aturan sa haut napakai takam hampe itati. ¹⁷ Pulaksanai katuluh ware naun isuntuh aku, haut ngami suntuh sa bujur daya yiru pantaru mamaeh kawan ulun sa umba ngalut suntuh kami yiru. ¹⁸ Sababni naan ulun rama sa pamelumni nanrusak arati pampatei Kristus hang balasangar aku haut gaha iwara kisahni ma naun hampe taati nakisah anri nungkau. ¹⁹ Pamelum kawan ulun kalayiru sagar jumpuh hawuang kabinasaan, sabab Alatalla here hang wuntung here,kawan sa hal ngumangan daya here ekat mamikir kawan hal dunia yiti ²⁰ Kude takam samula warga Karajaan surga teka yiru pada raja panyalamat sa naanrei takam Alatalla Yesus Kristus ²¹ Tenga takam sa maleme nelang tau hansur yiti sagar naubah daya Kristus jari kala tengani raerai sa mulia Hanye tau ngulah daya naan kuasaNi Kristus pakai nyatalau ala katantuluh.