Erangkaulun hingka Gadara Nalapas teka Roh Ra'at ¹ Dami here hampe ma sabarang danau, hang daerah kawan ulun Gadara. ² Hantek Yesus minau teka jukung, salenga erangkaulun hingka ogang sa narasuk roh najis hawi nunung Yesus. ³ Hanye muneng hang pulau ogang. Mahi ulun sa sangup nuruk hanye lagi, biar makai rantai. ⁴ Deya, hanye haut gaha nahuruk andri napasung pee ni nelang narantai, kude iyuhni nampitus rantai ru andri nantepu pasungni. Mahi erangkaulun sa gagah pakai mewehni. ⁵ Saban kaandrau andri kamalem, hanye nantiak hang ogang andri hang kawan wungkur balalu nampibatan tengani raerai andri watu. ⁶ Hantek ulun yiru kadinung Yesus hingka lawit, hanye palus nempat balalu basujud nahadapan Yesus. ⁷ Balalu, nalang nantiak andri laengan sa mehet hanye kaeau, "Inun urusan helang aku andri Hanyu, Yesus, Iya Alatalla Sa Palingamau? Aku mohon ma-Hanyu demi Alatalla, ada manyiksa aku!" ⁸ Deya Yesus haut kaeau ma hanye, "Kaluar leh teka ulun yina, hi ro najis!" ⁹ Udihie, Yesus nunti ma ulun yiru, "Hie arannu?" Balalu, hanye nyangai, "Aranku hi Legion deya kami rama," ¹⁰ Hanye sa ulang-ulang laku ma Yesus nampan ada ngunur here hingka pulau yiru. ¹¹ Hang yaru naan kawan iwek rama ganyah kuman hang riet wungkur. ¹² Balalu, kawan roh raat yiru laku ma Yesus, eauni, ''Huyu ai kami ma kawan iwek ru hampan kami masuk ma wuangni," ¹³ Yesus pun nu'u. Deya yiru, kawan roh najis ru tulak balalu masuk ma kawan iwek. Kawan iwek sa jumalahni kakira rueh ribu kaukui ru bu nempat ma iring jurang hampe ma danau, balalu leteng. ¹⁴ Udihie, here sa nyaga iwek ru nempat balalu iwara ma kawan ulun sa hang kota andri hang tumpuk. Kawan ulun sa nyandrengei kaluar neu nantau inun sa haut terjadi. ¹⁵ Balalu, kawan ulun ru hawi nunung Yesus nelang ngini hanye sa hu'anni karasukan roh raat, sa bangaran legion, ganyah maharung, andri haut bapakaian, andri hanye haut mulek waras. Kajadian ru ngulah here jari takut. ¹⁶ Udihie, here sa kadinung kajadian yiru, here ngesah ma kawan ulun kala awe hal yiru terjadi ma ulun sa karasukan roh raat andri hal kawan iwek yiru. ¹⁷ Deya yiru, kawan ulun laku ma Yesus neu nanan uneng here. ¹⁸ Udihie, ganyah Yesus mamai ma jukung, ulun sa ni'enru karasukan laku nampan hanye ta'u uma baya andri Yesus. ¹⁹ Kude, Yesus pa hakun, balalu kaeau ma hanye, "Mudileh ma pulaksanainu. Kesah ma here katuluh kajadian sa haut Tuhan ulah ma hanyu andri kalaawe Tuhan haut hayang tu'u ma hanyu." ²⁰ Balalu, ulun yiru pada tulak andri mulai mangesah ma kawan ulun hang Dekapolis katuluh kajadian sa haut Yesus ulah ma hanye. Andri, katuluh ulun pun jari wauh. Iya hi Yairus Nabangkitkan andri Wawei sa Pendarahan Nasamare ²¹ Hantek Yesus nyabarang lagi makai jukung ma sabarang, ulun rama haut bakumpul nyanriet-Hanye, ²² balalu Hanye tarie hang iring danau. Udihie, erang kaulun pamimpin sinagoge sa bangaran Yairus hawi dami hanye kadinung Yesus, hanye basujud hang pee-Ni. ²³ Balalu hanye laku tu'u ma Yesus, eauni,"Iya ku sa wawei sa masih rumis ane matei. Awat tunung andri andak tangan-Nu hang amauni hampan hanye ware andri welum." ²⁴ Udihie Yesus tulak sindrah Yairus. Naan rama tu'u ulun sa ngiring Yesus andri mangarumuni-Hanye. ²⁵ Andri, naan erangkaulun wawei sa pendarahan salawah rueh walas ta'un. ²⁶ Hanye haut papire kali kararaen deya rama dukun, nelang haut rama harata bana galis, kude mahi badiran deya wangunni magin batamah buruk. ²⁷ Udi hanye nyandrengei hal Yesus, wawei yiru nunung Yesus teka wading hang helang karumunan ulun rama balalu nyama jubah-Ni. ²⁸ Wawei yiru kaeau, "Asal aku kaiyuh negei jubah-Ni ai, aku sagar ware." ²⁹ Hantek yiru jua pendarahanni taduh nelang hanye ngingkam tengani haut ware teka panyakitni. ³⁰ Yesus palus karasa hingka tenga-Ni naan kuasa sa haut kaluar teka Hanye. Hanye bapaling hang helang penah karumunan yiru balalu kaeau: "Hie sa haut negei jubahku?" ³¹ Udihie kawan murid Yesus kaeau ma Hanye, "Hanyu kadinung karumunan ulun bagagasak riet Hanyu balalu Hanyu kaeau, "Hie sa negei jubah-Nu?"" ³² Balalu, Yesus nantau kuliling neu ngini hie sa haut ngulahni. ³³ Kude, dami karasa inun sa terjadi ma tengani, wawei yiru jari pahe'ei andri neter. Hanye hawi balalu basujud hang hadapan Yesus nelang iwara Yesus kajadian sa tu'uni. ³⁴ Udihie, Yesus kaeau ma wawei yiru, "Iya-Ku, Iman-nu haut nyalamat hanyu. Tulak leh wuang damai sejahtera andri wareleh teka panyakitnu." ³⁵ Rahat Yesus lagi bapaner, hawi papire kaulun teka lewu pamimpin sinagoge balalu kaeau, "Iyanu haut matei. Deya inun masih ngakaur Guru?" ³⁶ Kude, Yesus pa hakun nyandrengei inun sa haut aneau here, Hanye kaeau ma pamimpin sinagoge yiru, "Ada takut, parasaya ai." ³⁷ Udihie, Yesus nguring ulun uma Hanye, kasuali hi Petrus, hi Yakobus, andri hi Yohanes tawari hi Yakobus. ³⁸ Balalu, here hampe ma lewu pamimpin sinagoge yiru, palus kadinung rawek, andri kawan ulun nungkau mehet tu'u. ³⁹ Udihie, hantek Yesus masuk, Hanye kaeau ma here, "' deya inun hanyu rawek andri ngiak? Iya yiru puang matei, kude ganyah mandre," ⁴⁰ Kude here ngasese Yesus. Balalu, Hanye nunyu here katuluh kaluar andri Hanye ngayak amah andri ineh iya yiru, nelang kawan ulun sa sindrah-Ni, masuk ma kamar uneng iya rumis yiru mangkading. ⁴¹ Udihie, nategei-Ni tangan iya rumis ru balalu Hanye kaeau, "Talita kum!" (Artini, "Wawei rumis, Aku kaeau ma hanyu, amuan!") ⁴² Iya wawei yiru hinang mindri andri palus takia, deya umurni rueh walas ta'un, balalu katuluh ulun wauh tu'u. ⁴³ Balalu, Yesus ngami parintah ma ulun matu'eh iya yiru nampan ada isa kaulun sa karasa kajadian yiru, andri nunyu here ngami iya yiru kuman.